ތިން ދައުވާއެއް ސާބިތުވެ، ޝަމްއާން 25 އަހަރަށް ޖަލަށްލުމަށް ހުކުމްކޮށްފި
ދައުލަތުން އެދުނީ އިސް މަގާމުތަކުގައި ތިއްބަވައިގެން ހިންގާ ކުށްތަކަށް ދޭ އެންމެ ބޮޑު އަދަބު ޝަމްއާނަށް ދިނުމަށް. އެއީ ފޭރުމުގެ ދައުވާއަށް 8 އަހަރު، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއަށް 2 އަހަރު، އަދި މަނީ ލޯންޑަރިންގ ދައުވާއަށް 15 އަހަރުގެ ޖަލުގެ ހުކުމެއް.
އިމިގްރޭޝަންގެ ކޮންޓްރޯލަރުގެ މަގާމު ކުރިން އަދާކޮށްފައިވާ މުހައްމަދު ޝަމްއާން ވަހީދުގެ މައްޗަށް ދައުލަތުން އުފުލި ތިން ދައުވާ ސާބިތުވާކަމަށް ކްރިމިނަލް ކޯޓުން ކަނޑައަޅައި، އޭނާ ޖުމްލަ 25 އަހަރަށް ޖަލަށްލުމަށް ދާދި ދެންމެއަކު ހުކުމްކޮށްފިއެވެ.
ކްރިމިނަލް ކޯޓުގެ ގާޒީ އިބްރާހިމް އިހުސާން އިއްވެވި މި ހުކުމުގައި، ޝަމްއާންގެ މައްޗަށް ދައުލަތުން އުފުލި ފޭރުމުގައި ބައިވެރިވުމުގެ ދައުވާއާއި، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާގެ އިތުރުން މަނީ ލޯންޑްރިންގެ ދައުވާ އެކަށީގެންވާ ޝައްކެއްނެތް މިންވަރަށް ސާބިތުވާކަމަށް ވަނީ ކަނޑައަޅުއްވާފައެވެ.
އަދަބުތަކުގެ ތަފްސީލު: ޝަމްއާންގެ މައްޗަށް އިއްވި 25 އަހަރުގެ ޖަލު ހުކުމް ބެހިގެންވަނީ އަންނަނިވި ގޮތަށެވެ:
މަނީ ލޯންޑްރިންގެ ދައުވާއަށް: 15 އަހަރުގެ ޖަލު ހުކުމެއް.
ފޭރުމުގައި ބައިވެރިވުމުގެ ދައުވާއަށް: 8 އަހަރުގެ ޖަލު ހުކުމެއް.
ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއަށް: 2 އަހަރުގެ ޖަލު ހުކުމެއް.
މި ހުކުމުގެ އިތުރުން، ޝަމްއާން 500,000 ރުފިޔާއިން ޖޫރިމަނާކުރުމަށާއި، ބިދޭސީ މީހާގެ އަތުން ފޭރިގަތް 500,000 ރުފިޔާ ތިން މަސް ދުވަހުގެ ތެރޭގައި އެމީހާއަށް ރައްދުކޮށްދިނުމަށްވެސް ކޯޓުން ވަނީ އަމުރުކޮށްފައެވެ. އަދި އޭނާގެ ގެއިން ފެނުނު ފައިސާގެ ތެރެއިން 125,000 ރުފިޔާ ދައުލަތަށް ނެގުމަށްވެސް ހުކުމުގައިވެއެވެ. ޝަމްއާން މި މައްސަލައިގައި ބަންދުގައި ހޭދަކުރި 9 މަހާއި 10 ދުވަސް ހުކުމުގެ މުއްދަތުން އުނިކުރެވޭނެއެވެ.
ޝަރީއަތަށް ސާބިތުވި ގޮތުގައި، އިމިގްރޭޝަނުން ހިފެހެއްޓި ބިދޭސީއަކު ޝަމްއާންގެ އަމުރަށް ދަންވަރުގެ ވަގުތެއްގައި ދޫކޮށްލާފައިވަނީ އޭނާގެ އަތުން 530,000 ރުފިޔާ އަތުލުމަށްފަހުއެވެ. މި ފައިސާގެ ތެރެއިން 400,000 ރުފިޔާ ޝަމްއާން ބަހައްޓާފައިވާއިރު، އޭގެ ތެރެއިން ބައެއް ފައިސާ ބޭނުންކޮށްގެން އޭނާގެ ނަމުގައި އޮތް ދެ ސްޓޫޑަންޓް ލޯނަކަށް ފައިސާ ދައްކާފައިވާކަން ވަނީ ސާބިތުވެފައެވެ.
ގާޒީ އިހުސާން ވިދާޅުވީ، ޝަމްއާނަށް އެންމެ ބޮޑު އަދަބު ދޭން ނިންމީ އިމިގްރޭޝަންގެ އެންމެ މަތީ ވެރިޔާގެ ގޮތުގައި ހުރެ، ބިދޭސީންނަށް ރައްކާތެރިކަން ދިނުމުގެ ބަދަލުގައި އަމިއްލަ ފައިދާއަށް މަސައްކަތްކޮށް، އެ މުއައްސަސާގެ އަގު ވައްޓާލާފައިވާތީ ކަމަށެވެ.
ދައުލަތުން މި މައްސަލައިގައި ވަނީ ފެނެކަ ކޯޕަރޭޝަންގެ ކުރީގެ އެމްޑީ މުހައްމަދު ސައީދުގެ މައްޗަށް ހުކުމް އިއްވި އުސޫލުން، ދައުލަތުގެ އިސް މަގާމުތަކުގައި ތިއްބަވައިގެން ހިންގާ މިފަދަ ބޮޑެތި ކުށްތަކަށް ހަރުކަށި އަދަބު ދިނުމަށް އެދިފައެވެ. ޝަމްއާންގެ ފަރާތުން އަދަބު ލުއިކޮށްދިނުމަށް އެދުނު ނަމަވެސް، ކޯޓުން ވަނީ އެކަމަށް އިންކާރުކޮށްފައެވެ.
