ރާޅު މީޑިއާ – ނޫސްވެރިކަމުގެ އަޚުލާޤީ މިންގަނޑު

ރާޅު މީޑިއާގެ ނޫސްވެރިންގެ މަސައްކަތް ބިނާވެގެންވަނީ އިސްލާމްދީނުގެ އަޞްލުތަކާއި، ދިވެހިރާއްޖޭގެ ޤާނޫނުއަސާސީ އާއި ބައިނަލްއަޤުވާމީ ނޫސްވެރިކަމުގެ އެންމެ މަތީ މިންގަނޑުތަކުގެ މައްޗަށެވެ. އަޅުގަނޑުމެންގެ ނޫސްވެރިން އަބަދުވެސް އިސްކަންދޭނީ ތިރީގައިވާ ތިން އަސާސަށެވެ:

• ޙަޤީޤަތް ބަޔާންކުރުން

• އިންސާފުވެރިވުން

• މިނިވަންކަމާއެކު މަސައްކަތްކުރުން

އަޅުގަނޑުމެން ހިފަހައްޓާނެ މިންގަނޑުތައް:

1. ސައްޙަ މަޢުލޫމާތު: ޚަބަރު ފޯރުކޮށްދޭނީ ވީ އެންމެ ބޮޑަށް ޙަޤީޤަތާ އެއްގޮތަށެވެ. ޔަޤީންކަމެއް ނެތް މަޢުލޫމާތު ޝާއިޢެއް ނުކުރާނެއެވެ.

2. ސިޔާސީ ނުފޫޒުން އެއްކިބާވުން: ރާޅު މީޑިއާގެ ނޫސްވެރިން ސިޔާސީ އެއްވެސް ޕާޓީއެއްގެ ހަރަކާތްތަކުގައި ބައިވެރިއެއް ނުވާނެއެވެ. އަދި ސޯޝަލް މީޑިއާގައިވެސް ވަކި ސިޔާސީ ފިކުރަކަށް ތާއީދުކޮށް ނުފޫޒު ފޯރުވުމުން އެއްކިބާވާނެއެވެ.

3. މަސްދަރު ހާމަކުރުން: މަޢުލޫމާތު ދޭ ފަރާތުގެ ނަން ސިއްރުކުރަން ޖެހިއްޖެ ހާލަތެއްގައި މެނުވީ، މަޢުލޫމާތުގެ މަސްދަރު ސާފުކޮށް ބަޔާންކުރާނެއެވެ.

4. ޒާތީ ދިރިއުޅުމަށް އިޙްތިރާމްކުރުން: މީހުންގެ ޒާތީ ވާހަކަތައް އާއްމުކުރާނީ މުޖުތަމަޢުގެ މަޞްލަޙަތު އޮތް މިންވަރަށް ބަލައިފައެވެ.

5. ރިޝްވަތާއި ނުފޫޒު: ޚަބަރެއް ލިޔުމަށް ނުވަތަ ނުލިޔުމަށް ބާރުއަޅާ އެއްވެސް ބާވަތެއްގެ ހަދިޔާއެއް ނުވަތަ ރިޝްވަތެއް ނޫސްވެރިން ގަބޫލެއް ނުކުރާނެއެވެ.

6. ކުޑަކުދިންގެ ރައްކާތެރިކަން: ކުޑަކުދިންނާ ގުޅޭ ޚަބަރުތައް ގެނެސްދިނުމުގައި އެކުދިންގެ ވަނަވަރު ސިއްރުކޮށް، ކަރާމާތް ހިފަހައްޓާނެއެވެ.

7. ކުށް އިޞްލާޙުކުރުން: ޝާއިޢުކުރެވުނު ލިޔުމެއްގައި ކުށެއް އޮތްކަން އެނގިއްޖެނަމަ، ވީ އެންމެ އަވަހަކަށް އެކަން އިޞްލާޙުކޮށް ކިޔުންތެރިންނަށް ހާމަކުރާނެއެވެ.