މަޙްދީ ނިޔާވި ހާދިސާ: ތަޙްޤީޤަށް ހުރަސް އެޅިދާނެ ކަމަށް ބުނެ ޑިފެންސް މިނިސްޓްރީން މައުލޫމާތު ދިނުމަށް ދެކޮޅު ހަދައިފި

ޑިފެންސް މިނިސްޓްރީން، ސަރޖަންޓް ފަސްޓްކްލާސް މުޙައްމަދު މަޙްދީ ނިޔާވި ހާދިސާގައި ކަން ހިނގައިދިޔަގޮތުގެ މައުލޫމާތު ހާމަކުރުމަށް ދެކޮޅު ހަދައިފިއެވެ. ތަޙްޤީޤަށް ހުރަސްއެޅިދާނެ ކަމަށް ބުނެ، މައުލޫމާތު ހޯދައި ލިބިގަތުމުގެ ހައްޤުގެ ޤާނޫނުގެ ދަށުން ހުށަހެޅުނު އެދުމަކަށް މިނިސްޓްރީން ދިން ޖަވާބުގައި ވަނީ މިމައުލޫމާތުތައް ދެވެންނެތް ކަމަށް ބުނެފައެވެ. ސިފައިންގެ އޮފިސަރެއްގެ ފުރާނަ ގެއްލުނު މިފަދަ ހާދިސާއެއްގައި ހިނގާދިޔަ ކަންކަން ސިއްރުކުރުމަކީ އާއްމު ރައްޔިތުންގެ މެދުގައި ބޮޑު ސުވާލުތަކެއް އުފައްދާފައިވާ ކަމެކެވެ.

މައުލޫމާތު ދިނުމަށް ދެކޮޅު ހެދި ސަބަބު

މިނިސްޓްރީއަށް މިމައުލޫމާތު ހޯދުމަށް އެދި ހުށަހެޅީ މިދުއަމް ސަޢުދުއެވެ. އޭނާ ވަނީ، ސަރޖަންޓް ފަސްޓްކްލާސް މުޙައްމަދު މަޙްދީ ނިޔާވި ޑައިވިންގ އޮޕަރޭޝަނާ ގުޅޭގޮތުން، އެފަދަ އޮޕަރޭޝަނަކަށް ތައްޔާރުވެފައި ހުރި މިންވަރާއި، ލިބިފައިވާ ވަސީލަތްތަކާއި، ސަލާމަތީގޮތުން އަޅާފައިވާ ފިޔަވަޅުތަކާއި ގުޅޭގޮތުން ސުވާލުތަކެއް ކޮށްފައެވެ. ޑިފެންސް މިނިސްޓްރީން ދިން ޖަވާބުގައި ބުނެފައި ވަނީ، މިހާދިސާ އަކީ ސަރުކާރުގެ ކަމާބެހޭ ފަރާތްތަކުން ތަޙްޤީޤުކުރަމުންދާ ހާދިސާއަކަށް ވާތީ، މައުލޫމާތު ހާމަކޮށްފިނަމަ ތަޙްޤީޤަށް އަސަރުކޮށްފާނެ ކަމަށް ފެންނާތީ، މައުލޫމާތު ދެވެންނެތް ކަމަށެވެ. މިހާދިސާ ތަޙްޤީޤުކުރަމުންދާކަމުގައި ބުނުން ފިޔަވައި، އެކަމާއި ގުޅޭ އިތުރު އެއްވެސް މައުލޫމާތެއް މިހާތަނަށް ފުލުހުންވެސް ހާމަކޮށްފައެއް ނުވެއެވެ.

މަޙްދީ ނިޔާވި ހާދިސާގެ ތަފްސީލު

ސަރޖަންޓް ފަސްޓް ކްލާސް މުޙައްމަދު މަޙްދީ ނިޔާވީ މެއި މަހުގެ 16 ވަނަ ދުވަހުއެވެ. މި ހާދިސާ ހިނގާފައިވަނީ، މެއި 14 ވަނަ ދުވަހު 58 މީޓަރު އަޑީގައިވާ ހޮހަޅައެއްގެ ތެރެއިން މަރުވި އިޓަލީގެ 4 ޑައިވަރުން ހޯދުމަށް ކުރިޔަށް ގެންދިޔަ އޮޕަރޭޝަންގެ ތެރެއިންނެވެ. މައުލޫމާތު ލިބިފައިވާ ގޮތުގައި، މަޙްދީގެ ހަށިގަނޑު ނެގީ 3 ޗެމްބަރު ހުންނަ އެހޮހަޅައިގެ ދެވަނަ ޗެމްބަރުގެ ތެރެއިން ފުލުހުންގެ ޑައިވް ޓީމުންނެވެ. ނަމަވެސް މިހާތަނަށް މިހާދިސާއާ ގުޅޭގޮތުން އެމްއެންޑީއެފްއިން އެއްވެސް މައުލޫމާތެއް ހާމައެއް ނުކުރެއެވެ. މިކަމުގެ ސަބަބުން އާއްމުންގެ ކަންބޮޑުވުން އިތުރުވެފައިވެއެވެ.

މަޙްދީ ނިޔާވި ސަބަބާ މެދު އޮތް ތަފާތު މައުލޫމާތު

މަޙްދީ ނިޔާވި ސަބަބާ މެދު ތަފާތު މައުލޫމާތުތައް ލިބިފައިވެއެވެ. އެމްއެންޑީއެފްއިން މީޑިއާއަށް ދިން މައުލޫމާތުން ދޭހަވާގޮތުގައި، މަޙްދީ ނިޔާވީ ޑިކޮމްޕްރެޝަން ސިކްނެސް ކުރިމަތިވެ އޭޑީކޭ ހޮސްޕިޓަލުގައި ފަރުވާދެމުން ދަނިކޮށެވެ. ނަމަވެސް، ތަފާތު އެކި މަސްދަރުތަކުން ލިބުނު މައުލޫމާތުތަކަށް ބަލާއިރު، ސަރޖަންޓް ފަސްޓް ކުލާސް މުޙައްމަދު މަޙްދީ ނިޔާވީ އޭނާގެ ފުޅިން އޮކްސިޖަން ހުސްވެ، ހޮހަޅައިގެ ތެރޭގައި ކަމަށް ބެލެވެއެވެ. މަޙްދީ ހޮސްޕިޓަލަށް ގެންދިޔައިރުވެސް އޮތީ ނިޔާވެފައިތޯ ކުރި ސުވާލަށް ހޮސްޕިޓަލުންވެސް ސީދާ ޖަވާބެއް ދީފައެއް ނުވެއެވެ. މިއީ ހާދިސާގެ ތެދު ހަގީގަތް އޮޅުންފިލުވުމަށް ހުރަހަކަށް ވެފައިވާ ކަމެކެވެ.

ތަޖުރިބާކާރުންގެ އިންޒާރާއި އެމްއެންޑީއެފްގެ އިޢުތިރާފް

މަޙްދީ ނިޔާވުމުގެ ކުރިންވެސް، ރާއްޖޭގެ ތަޖުރިބާކާރު ޑައިވަރުން ވަނީ، އެފަދަ ހޮހަޅަތަކަށް އެކަށީގެންވާ ވަޞީލަތާއި ތަމްރީންނެތި ފީނުމަކީ އިތުރު ހިތާމަވެރި ހާދިސާތައް ހިނގުން ގާތްކަމެއް ކަމަށް އިންޒާރު ދީފައެވެ. އެމްއެންޑީއެފްގެ އިސްވެރިންވެސް ވަނީ، ސިފައިންގެ ޑައިވަރުން އަތުގައި ވަސީލަތާއި ތަކެތި ނެތި ނޯމަލް އެއާގައި އެހާފުނަށް ޑައިވްކުރީ، ޑައިވަރުންނަށް ރިސްކްބޮޑުކަން އެނގިތިބެ ކަމަށް ބުނެފައެވެ. މިފަދަ އިންޒާރުތަކަށް ބީރު ކަންފަތެއް ދީފައިވަނީ ކީއްވެކަމާއި، ސަލާމަތީގޮތުން އަޅަންޖެހޭ ފިޔަވަޅުތައް ނާޅާ އޮޕަރޭޝަން ކުރިއަށް ގެންދެވުނީ ކީއްވެކަމާމެދު ސުވާލުތަކެއް އުފެދެއެވެ.

އިހުމާލުގެ ތުހުމަތާއި ސިއްރުކުރުމުގެ ތާރީޚު

ސަރޖަންޓް ފަސްޓްކްލާސް މުޙައްމަދު މަޙްދީ ނިޔާވުމުގެ ހާދިސާގައި އެމްއެންޑީއެފްގެ އިހުމާލު އޮތް ކަމަށް ގިނަ ބަޔަކު ޤަބޫލުކުރެއެވެ. މީގެ ކުރިންވެސް ހިނގާފައިވާ މިފަދަ ހާދިސާތަކުގެ މައުލޫމާތު ހާމަނުކޮށް އެމްއެންޑީއެފްއިން ވަނީ ހިފަހައްޓާފައެވެ. މިގޮތަށް މައުލޫމާތު ހާމަނުކޮށް ސިއްރުކުރުމަކީ، މުއައްސަސާގެ ޖަވާބުދާރީވުން ކުޑަވެ، ރައްޔިތުންގެ އިތުބާރު ގެއްލިދާނެ ކަމެއް ކަމަށް ގިނަ ފަރާތްތަކުން ފާހަގަކުރެއެވެ.

ސަރޖަންޓް ފަސްޓްކްލާސް މުޙައްމަދު މަޙްދީ ނިޔާވި ހާދިސާގެ ތެދު ހަގީގަތް ހާމަކުރުމަށް ޑިފެންސް މިނިސްޓްރީން ދެކޮޅު ހަދާފައިވާއިރު، މިކަމުގެ ސަބަބުން އާއްމުންގެ ހިތްތަކުގައިވާ ސުވާލުތަކަށް ޖަވާބެއް ލިބިފައެއް ނުވެއެވެ. ތަޙްޤީޤަށް ހުރަސްއެޅޭނެ ކަމަށް ބުނެ މައުލޫމާތު ހާމަނުކުރުމަކީ، ޝައްކުތައް އިތުރުކޮށް، ސިފައިންގެ ތެރޭގައި މިފަދަ ހާދިސާތައް ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަށް ހުރަހަކަށް ވެދާނެ ކަމެކެވެ. ދައުލަތުގެ މުއައްސަސާތަކުގެ ޖަވާބުދާރީވުން ކަށަވަރުކުރުމަށްޓަކައި، މިފަދަ މުހިންމު މައުލޫމާތުތައް އާއްމުކޮށް ހާމަކުރުމަކީ ކޮންމެހެންވެސް ބޭނުންތެރި ކަމެކެވެ.