ފ. ނިލަންދޫގެ ހިދުމަތްތެރިޔާ، ކަތީބުދޮންބެ 100 އަހަރުގައި އަވަހާރަވެއްޖެ

ފ. ނިލަންދޫ އަތިރީގޭ، ކަތީބުދޮންބެ، އުމުރުފުޅުން 100 އަހަރުގައި މިއަދު އަވަހާރަވެއްޖެ އެވެ. ދިގު ހަޔާތެއްގައި ގިނަގުނަ ހިދުމަތްތަކެއް ރަށަށާއި ގައުމަށް ކޮށްދެއްވައި، ގިނަ ބަޔަކަށް ފައިދާ ކުރައްވައިފައިވާ ކަތީބުދޮންބެގެ ވަކިވެ ދިޔުމަކީ ދިވެހި މުޖުތަމައަށް ލިބުނު ބޮޑު ހީނަރުކަމެކެވެ.

ކަތީބުދޮންބެގެ 100 ވަނަ އުފަން ދުވަސް އާއިލާ އިން ފާހަގަކުރީ މިދިޔަ އަހަރުގެ އޮކްޓޫބަރު މަހު އެވެ. އެދުވަހު އާއިލާ އާއި ރަށުގެ ގިނަ ބަޔަކު ވަނީ ކަތީބުދޮންބެ ގެ ދިގު އުމުރުފުޅަށް ހެޔޮއެދުންތައް ފޮނުވައި، ކޮށްދެއްވި ހިދުމަތްތައް ފާހަގަ ކޮށްފަ އެވެ.

މުޖުތަމައަށް ކޮށްދެއްވި ހިދުމަތްތައް

ކަތީބުދޮންބެއަކީ ޒަމާންތަކެއް ވަންދެން ފ. ނިލަންދޫގެ ކަތީބުކަން ވަރަށް އިހުލާސްތެރިކަމާއެކު ކުރައްވާފައިވާ ބޭފުޅެކެވެ. ރަށުގެ އިސް ވެރިޔެއްގެ ހައިސިއްޔަތުން ކަތީބުދޮންބެ ވަނީ ރަށުގެ ތަރައްގީއަށާއި ރައްޔިތުންގެ ހައްގުގައި ގިނަގުނަ މަސައްކަތްތަކެއް ކުރައްވާފަ އެވެ. އެކަމަށް ރަށުގެ ރައްޔިތުން އަބަދުވެސް އުފަލާއި އިހުތިރާމާއެކު ދެކެމުން އައެވެ.

ކަތީބުދޮންބެގެ ހުނަރުވެރިކަން ހަމައެކަނި ކަތީބުކަމަށް ހުދޫދުވެފައެއް ނެތެވެ. އެ މަނިކުފާނަކީ ގިނަ ރަށްތަކަށް ދަތުރުކޮށްފައިވާ، ކުޅަދާނަ މާލިމީއެއްގެ އިތުރުން، ފެހުމާއި ތެދުއިވަޑާމާއި ކެޔޮޅުކަމާއި ދިވެހި ބޭސްވެރިކަމާއި ކަށުކަމާ ކެމީގެ ކަންކަން ވެސް ކުރެއްވި ނަމޫނާ ހިދުމަތްތެރިއެކެވެ. އެ މަނިކުފާނުގެ މި އެކި ހުނަރުތަކުގެ ސަބަބުން ރަށުގެ ގިނަ ބަޔަކަށް ތަފާތު އެކި ގޮތްގޮތުން އެހީތެރިކަން ފޯރުކޮށްދެއްވައިފައިވެ އެވެ. އަދި އެކި ދާއިރާތަކުން ރަށުގެ ބަޔަކަށް އިރުޝާދު ދެއްވައި، އެ ދާއިރާތައް ކުރިއެރުވުމަށް މަސައްކަތް ކުރެއްވުމުގައި އިސްދައުރެއް އަދާކުރެއްވި އެވެ.

ބޮޑު އާއިލާއެއްގެ ބައްޕަ

ކަތީބުދޮންބެއަކީ ބޮޑު އާއިލާއެއްގެ ބައްޕަ އެކެވެ. ތިން ކައިވެންޏަކަށް ޖުމްލަ 16 ކުދިން ލިބިވަޑައިގެންނެވި އެވެ. އޭގެ ތެރެއިން މިހާރު ދުނިޔޭގައި ތިއްބެވީ 14 ބޭފުޅުންނެވެ. ދޮންބެގެ ދަރިދަރިކޮޅު ވަރަށް ބޮޑަށް ފުޅާވެފައިވާއިރު، މިހާރު ދުނިޔޭގައި ތިއްބެވި ދަރިންނަށް ދަރިން ލިބި، އެ ދަރިންނަށް ވެސް ދަރިން ލިބިފައިވެ އެވެ.

ކަތީބުދޮންބެގެ ކާފަދަރިންގެ އަދަދަކީ 72 އަށެވެ. މުނިކާފަ ދަރިންގެ ގޮތުގައި 118 ދަރިން ތިބިއިރު، ކަތީބުދޮންބެއަށް ހޫރުކާފަ ކިޔާ 14 ދަރިން ވެސް މިހާރު ދުނިޔޭގައި އެބަ ތިއްބެވެ. މި ބޮޑު އާއިލާގެ ތެރެއިން ގިނަ ބޭފުޅުން މުޖުތަމައުގެ ތަފާތު ދާއިރާތަކުން ފާހަގަކޮށްލެވޭ މަސައްކަތްތައް ކުރައްވަމުން ގެންދަވަ އެވެ.

އާއިލާގެ ފާހަގަކޮށްލެވޭ ބޭފުޅުން

ކަތީބުދޮންބެގެ ދަރިންގެ ތެރޭގައި ހިތުގެ ބަލިތަކަށް ހާއްސަ ޑޮކްޓަރު އަބްދުލް އަޒީޒް އަހުމަދާއި، ރައްޔިތުންގެ މަޖިލީހުގެ ކުރީގެ މެންބަރު އަލީ އަހުމަދާއި، ޔޫތު މިނިސްޓްރީގެ ސްޓޭޓް މިނިސްޓަރު އަބްދުލްލަތީފް އަހުމަދު (އުދަރެސް ލަތީފް) އާއި، ފ. އަތޮޅު ތައުލީމީ މަރުކަޒުގައި 25 އަހަރު އަދި ގާޒީ ސްކޫލުގެ ސެން ޓީޗަރަކަށް އެތައް އަހަރެއް ވަންދެން މަސައްކަތް ކުރެއްވި އުމްނިއްޔާ އަހުމަދު ހިމެނިވަޑައިގަންނަވަ އެވެ.

ކާފަދަރިންގެ ތެރޭގައި ހައި ކޯޓުގެ މީޑިއާ އޮފިޝަލް އަދި ކުރީގެ ނޫސްވެރިޔާ އަމީން ފައިސަލާއި، ކުރީގެ މަޝްހޫރު ފުޓްބޯޅަ ކުޅުންތެރިޔާ އަންވަރު އަލީ އާއި، ފަރުހާދު އިސްމާއީލް ހިމެނިވަޑައިގަންނަވަ އެވެ. މުނިކާފަ ދަރިންގެ ތެރޭގައި އިލެކްޝަންސް ކޮމިޝަންގެ މެންބަރު އަބްދުލް ހަސީބު އިސްމާއީލް ހިމެނިވަޑައިގަންނަވަ އެވެ. މި ހުރިހާ ބޭފުޅުން ވެސް ރާއްޖޭގެ ތަފާތު ދާއިރާތަކުން ފާހަގަކޮށްލެވޭ ހިދުމަތްތަކެއް ކުރައްވަމުން ގެންދަވަ އެވެ.

ފ. ނިލަންދޫގެ ހިދުމަތްތެރިޔާ ކަތީބުދޮންބެ ދިގު އުމުރުފުޅެއްގައި ކުރެއްވި ހިދުމަތްތަކާއި، ބޮޑު އާއިލާއެއް ބިނާކުރައްވައި، މުޖުތަމައަށް ގިނަ ބޭފުޅުން ހަދިޔާކުރެއްވުމަކީ ކަތީބުދޮންބެ ހަޔާތުން ފެނިގެންދިޔަ މުހިންމު ކަންތައްތަކެކެވެ. ކަތީބުދޮންބެގެ ވަކިވެ ދިޔުމަކީ ދިވެހި މުޖުތަމައަށް ލިބުނު ބޮޑު ހީނަރުކަމެއް ކަމުގައި ދެކެމެވެ. އެ މަނިކުފާނުގެ ފުރާނައަށް ސުވަރުގޭގެ ދާއިމީ ނިއުމަތް މިންވަރު ކުރެއްވުން އެދި ދުއާ ކުރަމެވެ.