އީރާނުގެ ކާރގް އައިލެންޑަށް އެމެރިކާ-އިޒުރޭލުން ހަމަލާދީފި: ކައިރީގެ ސަރަޙައްދުގައި ހަނގުރާމައިގެ ބިރުވެރިކަން އިތުރުވެއްޖެ

އެމެރިކާ އާއި އިޒުރޭލުން ގުޅިގެން އީރާނުގެ މުހިންމު ކާރގް އައިލެންޑު ހިފުމުގެ މަސައްކަތް ފަށާފައިވާކަމުގެ ރިޕޯޓުތައް ލިބެން ފަށައިފިއެވެ. މިކަމުގެ ސަބަބުން މި ސަރަޙައްދުގެ ސަލާމަތީ ކަންކަމަށް އާ ބޮޑު ގޮންޖެހުމެއް ކުރިމަތިވެފައިވާ ކަމަށް ބައިނަލްއަޤްވާމީ މީޑިއާތަކުން ދަނީ ބުނަމުންނެވެ.

މި އޮޕަރޭޝަންގެ ތެރެއިން އެމެރިކާގެ އަސްކަރިއްޔާއިން ދަނީ ކާރގް އައިލެންޑުގައި ހުރި އީރާނުގެ ސިފައިންގެ އަމާޒުތަކަށް ވައިގެ މަގުން ބޮން އަޅަމުންނެވެ. މި ހަމަލާތަކުގެ ތެރޭގައި ސިފައިންގެ ބެރެކްތަކާއި، އަސްކަރީ މަރުކަޒުތަކާއި، ހަތިޔާރު ރައްކާކުރާ ގުދަންތައް ހިމެނޭކަމަށް ޚަބަރު ލިބެއެވެ. އެމެރިކާއިން މި ހަމަލާތައް ދެމުންދަނީ، އީރާނުގެ މިލިޓަރީ ޤާބިލުކަން ކަނޑުވާލައި، ކާރގް އައިލެންޑުގެ ކޮންޓްރޯލް ހޯދުމުގެ މަޤްޞަދުގައެވެ. މި ހަމަލާތަކުގެ ސަބަބުން އެސަރަހައްދުން ބޮޑެތި އަލިފާނުގެ ހާދިސާތަކާއި ދުމުގެ އަސަރު ފެންނަމުންދާ ކަމަށް މީޑިއާ ރިޕޯޓުތައް ބުނެއެވެ.

އިޒުރޭލުން ވެސް މި އޮޕަރޭޝަންގައި ދައުރެއް އަދާކުރަމުން އެބަދެއެވެ. ލިބިފައިވާ މައުލޫމާތުތަކަށް ބަލާއިރު، އިޒުރޭލުން ދަނީ ކާރގް އައިލެންޑަށް އީރާނުގެ މައި ބިމުން އާދެވޭނެ ހުރިހާ ރެއިލް ދުއްވާ މަގުތަކެއް ގޮއްވައިލަމުންނެވެ. މި ހަރަކާތްތަކުގެ މަޤްޞަދަކީ ކާރގް އައިލެންޑު ފަސޭހައިން އެކަހެރިކޮށްލައި، އެތަނަށް ސިފައިންގެ އެއްވެސް އިތުރު އެހީއެއް ނުވަތަ ސަޕްލައިއެއް ފޯރުކޮށްދިނުން ހުއްޓުވުމެވެ. ރެއިލްވޭ މަގުތަކަށް ދެމުންދާ ހަމަލާތަކަކީ، ކާރގް އައިލެންޑު ވަށައިގެން އީރާނަށް އޮތް ލޮޖިސްޓިކް ސަޕޯޓު ކަނޑުވައިލުމަށް ދެވޭ ސްޓްރެޓީޖިކް ހަމަލާތަކެކެވެ. މީގެ ސަބަބުން ކާރގް އައިލެންޑުގައި ތިބި އީރާނުގެ ސިފައިންނަށް ފަހުން ލިބިދާނެ އެހީތެރިކަން މުޅިން ހުއްޓި، އެމީހުންގެ ދިފާޢީ ޤާބިލުކަން ނެތިކޮށްލުމުގެ އުންމީދުގައެވެ.

ކާރގް އައިލެންޑަކީ އީރާނުގެ ތެޔޮ އެކްސްޕޯޓުކުރާ މައި މަރުކަޒެވެ. މި ބަނދަރުން ދުނިޔޭގެ ބާޒާރަށް އީރާނުން ބޭރުކުރާ ތެލުގެ %90 އެކްސްޕޯޓުކުރެއެވެ. މިހާ މުހިންމު ސަރަޙައްދަކަށް ހަމަލާދިނުމަކީ، އީރާނުގެ އިޤްތިޞާދަށް ވަރަށް ބޮޑު ގެއްލުމެއް ލިބި، ދުނިޔޭގެ ތެލުގެ ބާޒާރުގައި ބޮޑު ހަލަބޮލިކަމެއް އުފެދިގެންދާނެ ކަމެކެވެ. މި ހަމަލާތަކުގެ ސަބަބުން އީރާނުގެ ތެލުގެ އުފެއްދުންތައް މެދުކަނޑާލައި، ދުނިޔޭގެ ތެލުގެ އަގުތައް މައްޗަށް ދިއުމުގެ ބިރު އެބައޮތެވެ.

އީރާނުން އަދި މިކަމާ ގުޅޭގޮތުން ރަސްމީ ބަހެއް ބުނެފައެއް ނުވެއެވެ. ނަމަވެސް، މި ހަމަލާތަކަށް ދޭނެ ރައްދު ހަރުކަށިވާނެ ކަމަށް ބެލެވެއެވެ. މީގެ ކުރިން ވެސް އެމެރިކާއާއި އިޒުރޭލުން އީރާނަށް ދިން ކޮންމެ ހަމަލާއަކަށް އީރާނުން ދީފައިވަނީ ވަރަށް ހަރުކަށި ރައްދެކެވެ.

އީރާނުންވަނީ މީގެ ކުރިން އެތައްފަހަރަކު އެމެރިކާއާއި އޒްރޭލުން ދެކެމުންދަނީ ހުވަފެނެއް ކަމަށާއި ކާރގް އައިލެންޑް ހިފައިގެން އެންމެ ދުވަހަކަށްވެސް އޮތުމަކީ ކުރެވޭނެކަމެއް ނޫންކަމަށެވެ. މަސްރަހު ދިރާސާކުރާ ފަރާތްތަކާއި ހަވާލާދީ ރިޕޯޓުތައް ބުނާގޮތުން އީރާނުން ވަނީ މިކަމަށް ވަރަށް ފުރިހަމަޔަށް ތައްޔާރުވެފައެވެ. އަދި ރައްދު ހަމަލަތައް މިހާރު ދެމުން އަންނަ ކަމަށްވެސް ރިޕޯޓުތައް ބުނެއެވެ.

މި ހަމަލާތަކާ ގުޅިގެން ދުނިޔޭގެ ބޮޑެތި ޤައުމުތަކުން ދަނީ ކަންބޮޑުވުން ފާޅުކުރަމުންނެވެ.