އިނގިރޭސިވިލާތުގެ ގޭސް ކާރިސާ: އީރާނާ ދެކޮޅަށް ހިންގި ހަރަކާތްތަކުގެ ނަތީޖާ؟
އިނގިރޭސިވިލާތަށް ގޭހުގެ ވަރަށް ބޮޑު ކާރިސާއެއް ކުރިމަތިވެއްޖެ ކަމަށް އެ ގައުމުގެ މީޑިއާތަކުން ރިޕޯޓުކުރަމުން އެބަދެއެވެ. ގައުމީ ރިޒާވްގައި ދެ ދުވަހަށް ވެސް ނުފުދޭ ވަރަށް ގޭސް ހުރިއިރު، މި ކާރިސާގެ ސަބަބުން އެ ގައުމުގެ އެނާޖީ ސެކިއުރިޓީއަށް ބޮޑު ހުރަހެއް ކުރިމަތިވެފައިވާ ކަމަށް ބެލެވެއެވެ. އިނގިރޭސިވިލާތް ބޮޑަށް ބަރޯސާވެފައިވަނީ މެދުއިރުމަތީގެ ހޮރްމޫޒް ކަނޑުއޮޅި ހުރަސްކޮށް ލިބޭ ގޭހުގެ ސަޕްލައިއަށް ކަމަށް މައުލޫމާތު ލިބެއެވެ.
މި ގޭސް ކާރިސާ ކުރިމަތިވެފައި މިވަނީ އިނގިރޭސިވިލާތުގެ އެތައް މިލިއަން ރައްޔިތުންނަށާއި، ސިނާއީ ދާއިރާތަކަށް ވަރަށް ބޮޑު ނުރައްކަލަކާ ކުރިމަތިވެފައިވާ ވަގުތެއްގައެވެ. ފިނި މޫސުން ފެށިފައިވާ މި ދުވަސްވަރު ގޭސް ނުލިބުމަކީ، ގޭގޭގައި ހޫނުކުރުމަށް ބޭނުންވާ އެނާޖީއަށް ދަތިވެ، އަދި ކަރަންޓު އުފެއްދުމަށް ވެސް ހުރަސްތަކެއް ކުރިމަތިވެދާނެ ކަމެކެވެ. މިކަމުގެ ސަބަބުން އިގްތިސާދީ ގޮތުންނާއި އިޖުތިމާއީ ގޮތުން ވެސް ބޮޑެތި މައްސަލަތަކެއް ކުރިމަތިވުމުގެ ފުރުސަތު އެބައޮތެވެ.
ދުނިޔޭގެ އެނާޖީ މާކެޓުގައި ހޮރްމޫޒް ކަނޑުއޮޅިއަކީ ނުހަނު މުހިއްމު ސަރަހައްދެކެވެ. ދުނިޔޭގެ ތެލުގެ 20% އާއި ގޭހުގެ ބޮޑު ބައެއް މި ކަނޑުއޮޅި ހުރަސްކޮށް، ގަލްފު ސަރަހައްދުން އެހެން ގައުމުތަކަށް ދަތުރުކުރެއެވެ. މި ކަނޑުއޮޅިއަށް އެއްވެސް ސަބަބަކާ ހުރެ ހުރަހެއް ކުރިމަތިވެއްޖެނަމަ، ދުނިޔޭގެ އެނާޖީ ސަޕްލައިއަށް ވަރަށް ބޮޑެތި އަސަރުތަކެއް ކުރެއެވެ. މީގެ ސަބަބުން ތެލާއި ގޭހުގެ އަގުތައް އުފުލި، ގައުމުތަކުގެ އިގްތިސާދަށް ބޮޑެތި ގެއްލުންތައް ލިބެއެވެ.
ބައިނަލްއަޤްވާމީ މަސްރަހުން ފާހަގަކުރެވޭ ގޮތުގައި، އިނގިރޭސިވިލާތުން ވަނީ އީރާނާ ދެކޮޅަށް އެމެރިކާއިން ހިންގާ ހަރަކާތްތަކަށް ވަރަށް ބޮޑު އެއްބާރުލުމެއް ދީފައެވެ. އީރާނަށް ޙަމަލާ ދިނުމަށް އެމެރިކާއަށް އެ ގައުމުގެ ބޭސްތައް ބޭނުންކުރުމުގެ ހުއްދަ ދިނުމަކީ މިފަދަ އެއްބާރުލުމެއްގެ މިސާލެއް ކަމަށް ބެލެވެއެވެ. މިފަދަ ސިޔާސަތުތަކުގެ ސަބަބުން، ހޮރްމޫޒް ކަނޑުއޮޅި ހިމެނޭ ސަރަހައްދުގައި ނުތަނަވަސްކަން އުފެދި، އީރާނުން އެ ކަނޑުއޮޅި ބަންދުކުރުމުގެ އިންޒާރު ދިނުމަށް މަޖުބޫރުވި ކަމަށް ގިނަ ބަޔަކު ގަބޫލުކުރެއެވެ. ހޮރްމޫޒް ކަނޑުއޮޅި ބަންދުވުމަށް ދިމާވި ސަބަބުތަކުގެ ތެރޭގައި އިނގިރޭސިވިލާތުގެ ބައިވެރިވުން ވެސް ހިމެނޭ ކަމަށް ފާހަގަކުރެވުނެވެ.
މިހާރު އިނގިރޭސިވިލާތަށް ދިމާވެފައިވާ ގޭސް ކާރިސާއަކީ، އެ ގައުމުން މެދުއިރުމަތީގައި ހިންގި ޖިއޯޕޮލިޓިކަލް ހަރަކާތްތަކުގެ ސީދާ ނަތީޖާއެއް ކަމަށް ގިނަ ފަރާތްތަކުން ދެކެއެވެ. އެމީހުންގެ އަމިއްލަ ސިޔާސަތުތަކުގެ ސަބަބުން ދިމާވި މި ހާލަތުގެ "ހިތި ބޭސް ބޯން ޖެހިފަ" މިތިބީ ކަމަށް ބައެއް ސިޔާސީ މާހިރުން ހާމަކުރައްވައެވެ. މި ކާރިސާއަކީ، ބައިނަލްއަޤްވާމީ ގުޅުންތަކުގައި ސިޔާސީ ނިންމުންތަކުގެ ދުރު ރާސްތާގެ އަސަރުތައް ހަނދާންކޮށްދޭ އެއް ކަމެއް ކަމަށް ވެސް ބެލެވެއެވެ.
މި ކާރިސާއިން ދައްކައިދެނީ ބައިނަލްއަޤްވާމީ ގުޅުންތަކާއި ޖިއޯޕޮލިޓިކަލް ސިޔާސަތުތަކުގެ ސީދާ އަސަރު އެތެރޭގެ އިގްތިސާދަށާއި، ރައްޔިތުންގެ ދިރިއުޅުމަށް ކުރާކަމެވެ. އިނގިރޭސި ސަރުކާރުން މިހާރު މިވަނީ ބޮޑު ގޮންޖެހުމަކާ ކުރިމަތިވެފައެވެ. ގޭހުގެ ސަޕްލައި ކަށަވަރުކުރުމަށްޓަކައި ބައިނަލްއަޤްވާމީ ގުޅުންތައް ރަނގަޅުކުރުމާއި، ސިޔާސަތުތައް މުރާޖަޢާކުރުން މުހިއްމުކަމަށް ސިޔާސީ މަސްރަހު ދިރާސާކުރާ ފަރާތްތަކުން ހާމަކުރެއެވެ. މިފަދަ ކާރިސާތަކުން ދަސްކުރަންޖެހޭ ފިލާވަޅަކީ، އެހެން ގައުމުތަކުގެ ސަރަހައްދީ ހަމަޖެހުމަށް ބުރޫއަރާފަދަ ހަރަކާތްތަކުގެ ނަތީޖާ އަމިއްލަ ގައުމަށް ވެސް ކުރިމަތިވެދާނެ ކަމެވެ.
