އީރާނަށް ދެކޮޅަށް ޓްރަންޕްގެ ގޮވާލެއްވުމަށް ނޭޓޯގެ އެއްވެސް ގައުމަކުން އިޖާބަ ނުދިނުމުން ބޮޑާހާކަނީ
އީރާނާއި ދެކޮޅަށް ހަނގުރާމައަށް ނުނިކުތުމުން އެމެރިކާގެ ރައީސް ޑޮނަލްޑް ޓްރަންޕް، ނޭޓޯ (NATO) އަކީ "ބޭވަފާތެރި" ޖަމާއަތެއް ކަމަށް ސިފަކުރައްވައިފި. ޓްރަންޕް ވިދާޅުވީ، ނޭޓޯއާ ގުޅިގެން ކުރިން ހިނގާފައިވާ ކަންކަން ހަނދާނުން ނުފޮހެވޭނެ ކަމަށާއި، އެކަންތައްތަކުގެ ސަބަބުން ނޭޓޯއާ އެމެރިކާއާ ދެމެދު އޮތް ގުޅުމަށް ބޮޑެތި ގޮންޖެހުންތަކެއް ކުރިމަތިވެދާނެ ކަމަށެވެ.
ޓްރަންޕް ވަނީ ނޭޓޯގެ މެންބަރު ގައުމުތަކުން އެމެރިކާއަށް ބަރޯސާވެ، އެކަށީގެންވާ ދިފާއީ ހަރަދު ނުކުރާ ކަމަށް ތަކުރާރުކޮށް ތުހުމަތުކުރައްވާފައެވެ. އޭނާ ދެކެވަޑައިގަންނަވާ ގޮތުގައި، ނޭޓޯގެ ގިނަ މެންބަރު ގައުމުތަކުން އެމެރިކާގެ ދިފާއީ ވިއުގައަށް ފައިސާ ނުދައްކައި، އެމެރިކާގެ ރައްކާތެރިކަމުގެ ހިޔާވަހިކަމުގެ ދަށުގައި ދިރިއުޅެނީއެވެ.
މިކަމުގެ ސަބަބުން އެމެރިކާގެ އިގްތިސާދަށް ބޮޑު ބުރައެއް އުފުލަންޖެހޭ ކަމަށް ޓްރަންޕް ދެކެވަޑައިގަންނަވައެވެ. "ތިޔައީ ބޭވަފާތެރިން" މިބަސްފުޅުން، ޓްރަންޕް އިޝާރާތްކުރައްވަނީ، ނޭޓޯގެ ގައުމުތަކަށް އީރާނާއި ދެކޮޅަށް ހަނގުރާމަކޮށްދިނުމަށް އެދުމުން އެއްވެސް ގައުމަކުން އިޖާބަ ނުދިނުމެވެ.
ޓްރަންޕް ވިދާޅުވީ ނޭޓޯއިން ކަންތައް ކުރި ގޮތް ހަނދާނުން ނުފޮހެވޭނެ ކަމަށެވެ. މި ބަސްފުޅުގެ އަސްލަކީ، އެމެރިކާގެ މަސްލަހަތުތަކަށް ނޭޓޯގެ މެންބަރު ގައުމުތަކުން އިސްކަން ނުދީ، އެމެރިކާއަށް ބޭވަފާތެރިވެފައިވާ ކަމަށް ޓްރަންޕް ދެކެވަޑައިގަންނަވާ ދެކެވުންކަމަށް ސިޔާސީ ތަޖުރިބާކާރުން ބުނެއެވެ.
ޚާއްސަކޮށް، އީރާން އަދި ރަޝިޔާގެ ނުރައްކަލާ ކުރިމަތިލުމުގައި، ނޭޓޯގެ މެންބަރު ގައުމުތަކުން އެކަށީގެންވާ ހަރަކާތްތަކެއް ނުކުރާ ކަމަށް ޓްރަންޕް ބުރަލައްވައެވެ. ޓްރަންޕް ދެކެވަޑައިގަންނަވާ ގޮތުގައި މިފަދަ ކަންކަމަކީ އެމެރިކާގެ ރައްކާތެރިކަމަށް ހުރި ނުރައްކަލެކެވެ.
