ސްވިޒަލެންޑާ އެއްވަރުކޮށް ގަތަރަށް ފުރަތަމަ ފަހަރަށް ތާރީޚީ ޕޮއިންޓެއް

ފީފާ ވޯލްޑް ކަޕް 2026 ގެ ގްރޫޕް ބީގައި ސްވިޒަލެންޑް މޮޅުވާން ދަނިކޮށް ގަތަރުން ނަތީޖާ ހަމަހަމަކޮށް ތާރީޚީ ޕޮއިންޓެއް ހޯދައިފިއެވެ.

އެމެރިކާގެ ސެން ފްރެންސިސްކޯ ބޭ އޭރިއާ ސްޓޭޑިއަމްގައި 67،966 ސަޕޯޓަރުންގެ ކުރިމަތީގައި ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

މެޗު މުޅިންހެން ޑޮމިނޭޓްކުރީ ސުވިޒަލޭންޑުންނެވެ. މެޗުގެ 17 ވަނަ މިނެޓުގައި ލިބުނު ޕެނަލްޓީއަކުން ސުވިޒަލޭންޑަށް ކުރިހޯދައިދިނީ ބްރީލް އެމްބޯލޯއެވެ.

މި ޕެނަލްޓީ ދިން ނިންމުމާމެދު ބައެއް ސުވާލުތައް އުފެދުނެވެ. އެއީ ޕެނަލްޓީ ދިނުމުގެ ކުރިން އޮފްސައިޑް ހާލަތެއް އޮތް ކަމަށް ބެލެވޭތީއެވެ. ނަމަވެސް ވީއޭއާރް ބެލުމަށްފަހު ރެފްރީ ނިންމީ ޕެނަލްޓީއެއް ކަމަށެވެ. ފުރަތަމަ ހާފު ނިމުނީ 1-0 އިން ސުވިޒަލޭންޑް ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެސް ސުވިޒަލޭންޑުން ވަނީ ގިނަ ފުރުސަތުތަކެއް ތަނަވަސްކޮށްފައެވެ. ވަކިން ހާއްސަކޮށް ބްރީލް އެމްބޯލޯ އާއި ރޫބެން ވާގަސް އަށް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވިއެވެ. އަދި ބަދަލު ކުޅުންތެރިއެއްގެ ގޮތުގައި ކުޅެން އެރި 20 އަހަރުގެ ޖޯހަން މަންޒަމްބީ ފޮނުވާލި ނުރައްކާތެރި ހަމަލާއެއް ވެސް ދިޔައީ ގޯލްގެ ދަނޑިކައިރިން ބޭރަށެވެ.

ސުވިޒަލޭންޑަށް ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާއަކަށްވީ، މެޗުގެ ފަހުކޮޅު ގަތަރުން ކުޅުން ރަނގަޅުކޮށް ސުވިޒަލޭންޑަށް ބާރުބޮޑުކުރުމެވެ. މެޗުގެ 89 ވަނަ މިނެޓުގައި ގަތަރުގެ ތަޖުރިބާކާރު ކުޅުންތެރިޔާ ހަސަން އަލް ހައިދޮސް ކުޅެން އެރުވުމާއެކު ގަތަރުގެ އެޓޭކްތައް އިތުރަށް ވަރުގަދަވިއެވެ.

މެޗުން ސުވިޒަލޭންޑް މޮޅުވާން ދަނިކޮށް، ގަތަރުން ވަނީ ހިތްވަރު އެލުވާނުލައި ކުޅެ މެޗުގެ ފުރިހަމަ ވަގުތު ހަމަވެގެން ރެފްރީ ދެއްކި އިތުރުވަގުތުގެ އެންމެ ފަހު މިނެޓުގެ ތެރޭގައި ލަނޑެއް ޖަހައި މެޗުގެ ނަތީޖާ އެއްވަރުކޮށްފައެވެ.

ވާތްފަރާތުން ހޮމާމް އެލް އަމީން ނަގައިދިން ހިތްގައިމު ހުރަހަކުން، ގަތަރުގެ ކެޕްޓަން ބޫއާލެމް ހޫހީ ވަނީ ސުވިޒަލޭންޑްގެ ޑިފެންޑަރުންނަށްވުރެ މައްޗަށް އަރައި ބޮލުން ގޯލުގެ ތެރެއަށް ބޯޅަ ފޮނުވާލާފައެވެ. މިއީ ވޯލްޑް ކަޕްގެ ތާރީޚުގައި ގަތަރުން ހޯދި ފުރަތަމަ ޕޮއިންޓެވެ.

ސުވިޒަލޭންޑަކީ މީގެ ކުރިން ވެސް ވޯލްޑް ކަޕްތަކުގައި ވާދަކޮށް ތަޖުރިބާހުރި، ގްރާނިޓް ޝާކާ ފަދަ މުހިންމު ކުޅުންތެރިން ހިމެނޭ ވަރުގަދަ ޓީމެކެވެ. ނަމަވެސް މި މެޗުގައި ލިބުނު ފުރުސަތުތަކުގެ ބޭނުން ނުހިފުމުގެ ސަބަބުން އެ ޓީމަށް ވަނީ ބޮޑު މާޔޫސްކަމަކާ ކުރިމަތިލާން ޖެހިފައެވެ.

އަނެއްކޮޅުން ގަތަރަކީ އޭޝިއާގެ ގަދަ ބާރެއްގެ ގޮތުގައި ފަހަކަށް އައިސް ފާހަގަކުރެވޭ ޓީމެކެވެ. މި މެޗުގައި ގަތަރުން ދެއްކި ހިތްވަރުގަދަ ކުޅުމުގެ ސަބަބުން، ކުރިއަށް ހުރި މެޗުތަކަށް އެ ޓީމަށް ބޮޑު އިތުބާރެއް ލިބިގެންދާނެއެވެ.