ގަލްފު ގައުމުތަކު ރައްޔިތުން ނިކުމެ އެމެރިކާގެ ބޭރުކޮށް އަސްކަރީބޭސްތައް ހުއްޓުވުމަށް ގޮވާލަނީ
ގަލްފު ގައުމުތަކުގައި އެމެރިކާއަށް ދެކޮޅަށް މުޒާހަރާތައް ބޮޑުވެ، ސަރަހައްދުގެ ސިޔާސީ މަންޒަރު ބަދަލުވަނީ
މެދުއިރުމަތީގެ ގަލްފު ގައުމުތަކުގެ އެތެރޭގައި އެމެރިކާއާއި އިރާނާ ދެމެދު ހިނގަމުންދާ ހަނގުރާމައާ ގުޅިގެން މުޒާހަރާތައް ބޮޑުވެފައިވާއިރު، މިކަމުގެ ސަބަބުން މި ސަރަހައްދުގެ ސިޔާސީ ހާލަތަށް ބޮޑެތި ބަދަލުތަކެއް އަންނަ ކަމަށް ބެލެވެއެވެ. އެމެރިކާއަށް ވާގިވެރިވާ ގަލްފުގެ ބައެއް ގައުމުތަކުގެ ވެރިންނާއި، އެ ވެރިން ދެމުންދާ އެއްބާރުލުންތަކާ ދެކޮޅަށް، އެ ގައުމުތަކުގެ އާންމު ރައްޔިތުން ނިކުމެ އިހުތިޖާޖު ކުރަން ފަށާފައިވަނީ ސަރަހައްދުގައި އެމެރިކާގެ އަސްކަރީ މަރުކަޒުތައް ހުރުމާއި އަދި އީރާނާއި ދެކޮޅަށް ކުރަމުންދާ ހަނގުރާމައިގައި އެގައުމުތަކުން އެމެެިކާއަށް އެއްބާރުލުން ދިނުމާއި ދެކޮޅަށެވެ.
މުޒާހަރާގެ ބައިވެރިން ގޮވާލަނީ އެމެރިކާއަށް އެއްބާރުލުން ދޭ ވެރިން އިސްތިއުފާ ދިނުމަށާއި، މެދުއިރުމަތިން އެމެރިކާގެ އަސްކަރީ ބޭސްތައް ނެތިކޮށްލުމަށެވެ. މިހާރު ހިނގަމުންދާ މި ހަރަކާތްތައް އެމެރިކާއާއި އިޒްރޭލަށް ވަރަށް ބޮޑު ޕްރެޝަރެއް ކުރިމަތިކުރުވާ އިރު، އިރާނަށް މިއީ ބޮޑު ކާމިޔާބީއެއް ކަމަށް ސިޔާސީ މާހިރުން ދެކެއެވެ.
އެމެރިކާއާއި އިރާނާ ދެމެދު ހިނގަމުންދާ ހަމަނުޖެހުންތަކަކީ މެދުއިރުމަތީގައި ދިގު ތާރީހެއް އޮތް ކަމެކެވެ. އިރާނުގެ ނިއުކްލިއަރ ޕްރޮގްރާމްތަކާއި ސަރަހައްދުގައި އިރާނުގެ ނުފޫޒު ފުޅާވަމުންދާތީ، އެމެރިކާއާއި އެމެރިކާގެ ސަޕޯޓަރުން ކަންބޮޑުވުން ފާޅުކޮށްފައިވެއެވެ. މިކަމުގެ ސަބަބުން ސަޢޫދީ ޢަރަބިއްޔާ، ޔޫއޭއީ އަދި ބަހުރީން ފަދަ ގަލްފު ގައުމުތަކުން ވަނީ އެމެރިކާއާ ގާތް ގުޅުމެއް ބާއްވައި، އެމެރިކާގެ އަސްކަރީ ބޭސްތަކަށް އެ ގައުމުތަކުގައި ފުރުސަތު ދީފައެވެ. މި ބޭސްތަކަކީ މެދުއިރުމަތީގައި އެމެރިކާގެ ސިފައިންނާއި ހަތިޔާރަށް ވަރަށް މުހިންމު މަރުކަޒުތަކެކެވެ. ނަމަވެސް މިހާރު ހިނގަމުންދާ މުޒާހަރާތަކުން ދައްކުވައިދެނީ، މި ސިޔާސަތުތަކާ މެދު އާންމު ރައްޔިތުންގެ މެދުގައި ނުރުހުން އާލާވެފައިވާ މިންވަރެވެ.
ގަލްފުގެ އެކި ގައުމުތަކުގައި ފެށިގެންފައިވާ މުޒާހަރާތަކުގައި ބައިވެރިވާ މީހުން ދަނީ، އެމެރިކާގެ ސިޔާސަތުތަކަށް އެއްބާރުލުން ދޭ އެމީހުންގެ ސަރުކާރުތަކަށް ނުރުހުން ފާޅުކުރަމުންނެވެ. ވެރިންގެ އިސްތިއުފާއަށް ގޮވާލައި އެ ގައުމުތަކުގެ މަގުތަކަށް ނިކުމެފައިވާ ރައްޔިތުން ގޮވާލަނީ "އެމެރިކާ ނޫން" އަދި "އަޅުގަނޑުމެންގެ ސަރަހައްދުން އެމެރިކާ ބޭރުކުރާށެވެ" ފަދަ ޝުއޫރުތަކަށެވެ. މުޒާހަރާގެ ބައިވެރިން ބުނަނީ، އެމެރިކާގެ އަސްކަރީ ބޭސްތަކުގެ ސަބަބުން މެދުއިރުމަތީގެ ސުލްހައާއި ހަމަޖެހުމަށް ބުރޫ އަރައި، ސަރަހައްދުގައި ހަމަނުޖެހުން އިތުރުވަމުންދާ ކަމަށެވެ. މީގެ އިތުރުން އެމީހުން ދަނީ އެމެރިކާގެ ސިފައިންނަށް ފުރުސަތު ދިނުމުގެ ބަދަލުގައި، ސަރަހައްދުގެ ގައުމުތައް އެއްބައިވަންތަވެ، އެއްގައުމު އަނެއް ގައުމަށް އެހީތެރިވެގެން އަމިއްލަ ސަލާމަތީ ކަންކަން ހަމަޖެއްސުމަށް ގޮވާލަމުންނެވެ.
މި މުޒާހަރާތަކުގެ ސަބަބުން އެމެރިކާއާއި އިޒްރޭލަށް ވަރަށް ބޮޑެތި ދަތިތަކެއް ކުރިމަތިވަމުން ދެއެވެ. މެދުއިރުމަތީގައި އެމެރިކާގެ އަސްކަރީ ބޭސްތަކަކީ އެމެރިކާގެ ސަރަހައްދީ ނުފޫޒާއި ސަލާމަތީ މަސްލަހަތުތަކަށް ވަރަށް މުހިންމު ތަނެކެވެ. މި ބޭސްތައް ނެތިކޮށްލުމަށް ގޮވާލުމަކީ އެމެރިކާގެ ސިޔާސަތުތަކަށް ސީދާ ގޮންޖެހުމެކެވެ. ހަމައެއާއެކު، އިޒްރޭލަށް ވެސް މިއީ ކަންބޮޑުވުމެކެވެ. އިޒްރޭލުގެ ސަލާމަތަށް ޓަކައި ސަރަހައްދުގައި އެމެރިކާގެ ވަރުގަދަ އަސްކަރީ ބާރެއް އޮތުމަކީ އިޒްރޭލުން އަބަދުވެސް ބޭނުންވާ ކަމެކެވެ. ގަލްފުގެ ގައުމުތަކުގައި އެމެރިކާއާ ދެކޮޅަށް އާންމުން ނިކުތުމަކީ، މި ގައުމުތަކުގެ ސަރުކާރުތަކަށް އެމެރިކާއާ އެއްބާރުލުން ދިނުމަށް ދަތިވާނެ ކަމެކެވެ. މިކަމުގެ ސަބަބުން އެމެރިކާއާއި އިޒްރޭލަށް ސަރަހައްދުގެ ހަމަނުޖެހުންތަކާ ކުރިމަތިލުމުގައި އިތުރު ގޮންޖެހުންތަކެއް ކުރިމަތިވުން އެކަށީގެންވެއެވެ.
އެމެރިކާއަށް ވާގިވެރިވާ ގަލްފު ގައުމުތަކުގައި ހިނގާ މި މުޒާހަރާތަކަކީ އިރާނަށް ލިބުނު ބޮޑު ކާމިޔާބީއެއް ކަމަށް ސިޔާސީ މާހިރުން ދެކެއެވެ. ގިނަ ދުވަސްތަކެއް ވަންދެން އިރާނުން ދަނީ މެދުއިރުމަތިން އެމެރިކާގެ ސިފައިން ބޭރުކުރުމަށް ގޮވާލަމުންނެވެ. އާންމު ރައްޔިތުން މިހާރު ނިކުމެފައިވަނީ އިރާނުގެ މި ބޭނުމާ އެއް މިސްރާބަކަށެވެ. މީގެ ސަބަބުން ގަލްފުގެ ސަރުކާރުތަކާއި އެމީހުންގެ އާންމު ރައްޔިތުންނާ ދެމެދު އިތުރު ހިތްހަމަނުޖެހުންތަކެއް އުފެދުމުގެ ފުރުސަތު ބޮޑުވެއެވެ. އިރާނަށް އެމީހުންގެ ސަރަހައްދީ ނުފޫޒު ފުޅާކުރުމަށް މިއީ ރަނގަޅު ފުރުސަތެކެވެ. ސަބަބަކީ އެމެރިކާއަށް ސަޕޯޓުކުރާ ސަރުކާރުތައް ބަލިކަށިވެ، އެމީހުންގެ ސިޔާސީ ބާރު ކުޑަވުމެވެ.
ގަލްފުގެ ވެރިންނަށް އެމީހުންގެ އާންމު ރައްޔިތުންގެ ޝުއޫރުތަކަށް އިޖާބަދޭން މަޖުބޫރުވާނެއެވެ. ނޫންނަމަ އެމީހުންގެ ވެރިކަމަށް އިތުރު ބުރޫއެރުން އެކަށީގެންވެއެވެ. މިކަމުގެ ސަބަބުން އެމެރިކާއަށް މެދުއިރުމަތީގައި އޮތް ބާރާއި ނުފޫޒަށް ވަރަށް ބޮޑެތި ބަދަލުތަކެއް އަންނާނެއެވެ. އަދި އިރާނާއި އެ ގައުމުގެ ޚާރިޖީ ސިޔާސަތުތައް މެދުއިރުމަތީގައި އިތުރަށް ވަރުގަދަވެގެން ދިއުމުގެ ފުރުސަތު ވެސް ބޮޑެވެ.
ގަލްފުގެ ގައުމުތަކުގައި ފެށިފައިވާ އެމެރިކާއާ ދެކޮޅު މުޒާހަރާތަކަކީ ހަމައެކަނި އެއް ހަރަކާތެއް ނޫނެވެ. މިއީ މެދުއިރުމަތީގެ ސިޔާސީ މަންޒަރު ބަދަލުކޮށްލާނެ ބާރުގަދަ ކަމެއްގެ ފެށުމެވެ. މިކަމުގެ ސަބަބުން އެމެރިކާއާއި އިޒްރޭލަށް އިތުރު ގޮންޖެހުންތަކެއް ކުރިމަތިވާ އިރު، އިރާނަށް ސަރަހައްދުގައި އެމީހުންގެ މަސްލަހަތުތައް ކުރިއެރުވުމަށް ފުރުސަތުތައް ހުޅުވިގެންދެއެވެ. މިހާރުގެ ހާލަތު ދައްކުވައިދެނީ، ގަލްފުގެ ރައްޔިތުން އެމީހުންގެ އަޑު އުފުލައި، ސަރަހައްދުގެ މުސްތަގުބަލު ކަނޑައެޅުމުގައި މުހިންމު ދައުރެއް އަދާކުރުމަށް ތައްޔާރުވެފައިވާ ކަމެވެ.
