ޝަހުޒާނާއި ލީވާން ތިބި ގޮޅިން ފޯނެއް ފެނި، މައްސަލަ ތަހުގީގު ކުރަނީ: ހޯމް މިނިސްޓަރު
މާފުށީ ޖަލުގައި "އަދަދު" ނޫހުގެ ނޫސްވެރިން ކަމަށްވާ މުހައްމަދު ޝަހުޒާނާއި ލީވާން އަލީ ނަސީރު ބަންދުކޮށްފައި ތިބި ގޮޅިން މޮބައިލް ފޯނެއް ފެނުނު ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ. އެ މައްސަލަ މިހާރު ތަހުގީގު ކުރަމުން އަންނަ ކަމަށް ވެސް މިނިސްޓަރު ވިދާޅުވި އެވެ. ނޫސްވެރިންގެ ބަންދާ ގުޅިގެންނާއި، އެ ދެމީހުން ޖަލުން މިނިވަންވުމަށް ފަހު ދެއްކި ވާހަކަތަކާ ގުޅިގެން ސަރުކާރާއި، ޝަހުޒާނާއި ލީވާނާ ދެމެދު ވަނީ ހިޔާލު ތަފާތުވެ، އެކި ވާހަކަތައް ދެކެވެން ފަށާފަ އެވެ.
މިނިސްޓަރު އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، އާންމު މީހަކު ދިން މައުލޫމާތަކާ ގުޅިގެން ޝަހުޒާނާއި ލީވާން އަދި އިތުރު ދެ މީހަކު ބަންދުކޮށްފައި ތިބި ޖަލު ގޮޅި ކަރެކްޝަން އޮފިސަރުން ވަދެ ބަލާފާސްކުރި ކަމަށެވެ. އެމީހުންގެ ހާޒިރުގައި ކުރި ބަލާފާސްކުރުމުގައި، ކަބަޑުގެ ތެރޭގައި ހުރި އަންނައުނުތަކެއްގެ ތެރެއިން ފޯނެއް ފެނިފައިވާ ކަމަށް މިނިސްޓަރު ވިދާޅުވި އެވެ. މިކަމާ ގުޅިގެން ޖަލުގެ އެހެން ގައިދީންނާ ވެސް މިފަދަ ކަންކަމުގައި އަމަލު ކުރާ ގޮތަށް އެ ދެ ނޫސްވެރިން ވަކިން ދެ ގޮޅީގައި ބަންދުކުރެވިފައިވާ ކަމަށާއި، އާންމު އުސޫލުން މޮނިޓާ ކުރަމުން އައި ކަމަށް އިހުސާން ވިދާޅުވި އެވެ. އަދި އެ ގޮޅިތައް ވަކި އިންޓަވަލްތަކުގައި ބަލާފާސްކޮށްފައިވާނެ ކަމަށް ވެސް މިނިސްޓަރު ވިދާޅުވި އެވެ.
މިނިސްޓަރުގެ މި ވާހަކަތަކުގެ ކުރިން، ޝަހުޒާން ވަނީ ޖަލުން މިނިވަންވުމަށް ފަހު އިއްޔެ މީޑިއާއަށް ދިން އިންޓަވިއުއެއްގައި ބިރުވެރި ތަޖުރިބާތަކެއް ކިޔައިދީފަ އެވެ. އޭނާ ބުނެފައި ވަނީ، އޭނާ އާއި ލީވާން އެކުގައި އެއް ގޮޅިއެއްގައި ފުރަތަމަ ބޭއްތިބުމަށް ފަހު، ވަކިކޮށް އެކަހެރި ގޮޅިއަކަށްލީ ސީދާ ރައީސް ޑރ. މުހައްމަދު މުއިއްޒު އަންގަވައިގެން ކަމަށެވެ. މީގެ އިތުރުން، އޭނާގެ ގޮޅިއަށް ކޮންމެ ރެއަކު ޖަލު އޮފިސަރުން ދަގަނޑު މުގުރާއި މަރުތޭލަ ހިފައިގެން ވަދެ، އެނދާއި ފާރުތަކުގައި ތަޅާހެދީ އޭނާއަށް ބިރުދައްކަން ކަމަށް ވެސް ޝަހުޒާން ބުނެފައިވެ އެވެ.
ނަމަވެސް މިނިސްޓަރު އިހުސާން ވަނީ ޝަހުޒާން ދެއްކި މި ވާހަކަތަކަކީ "100 ޕަސެންޓް ދޮގު ވާހަކަ" ކަމަށް ބުނެ އޭނާގެ ވާހަކަތައް ދޮގުކޮށްފަ އެވެ. މިނިސްޓަރު ވިދާޅުވީ، ޖަލު ކަންކަމުގައި ރައީސް މުއިއްޒު ގޮތް ނިންމަވާ އަދި އެ މަނިކުފާނު އެއްވެސް ވަރަކަށް އިރުޝާދު ދެއްވާ ކަންކަމެއް ނޫން ކަމަށެވެ. އަދި ޖަލަށް ވެއްދުން މަނާތަކެތި ގޮޅިން ފެނުމުން އަމަލުކުރަނީ އާންމު އުސޫލުތަކުގެ ތެރެއިން ކަމަށާއި، އެއީ ވަކި ގައިދީއަކަށް ނުވަތަ ވަކި މީހަކަށް ހާއްސަކޮށްގެން ކުރާ ކަމެއް ނޫން ކަމަށް ވެސް އޭނާ ވިދާޅުވި އެވެ.
ނަމަވެސް، މިނިސްޓަރު އިހުސާން ވަނީ ގޮޅިން ފެނުނު މޯބައިލް ފޯނަކީ ދެ ނޫސްވެރިންނާ ގުޅުން އޮތް އެއްޗެއް ކަން ސާބިތުވި ކަމެއް ނުވަތަ ނޫން ކަމެއް ހާމަކޮށްފައެއް ނުވެ އެވެ. އަދި އެ ގޮޅީގައި ދެން ތިބި ދެ މީހުންނާ މެދު އެ ފިޔަވަޅުތައް އެޅި ކަމެއް ނުވަތަ ނޫން ކަމެއް ވެސް މިނިސްޓަރު ވިދާޅުވެފައެއް ނުވެ އެވެ. މިކަމުގެ ސާފު މައުލޫމާތެއް އަދިވެސް ލިބިފައެއް ނުވެ އެވެ.
ލީވާންގެ ގާނޫނީ ޓީމުން ބުނެފައިވާ ގޮތުގައި އޭނާ ބަންދުގައި ބެހެއްޓި ގޮޅީގައި އިތުރު މީހަކު ނެތް ކަމާއި، އެއީ މުޅިން އެކަހެރިކޮށް ބޭއްވުން ކަމަށެވެ. އަދި އެ ގޮޅިއާ ޖެހިގެން ހުރީ މަރުގެ މައްސަލަތަކުގައި ތުހުމަތުވާ މީހުން ތިބި ގޮޅިތަކެއް ކަމަށް ވެސް އެ ޓީމުން ބުނެފައިވެ އެވެ. މީގެ އިތުރުން، ލީވާންގެ ސިއްހީ ފަރުވާއަށް ވެސް ކަރެކްޝަނަލް ސާވިސް އިން ހުރަސްއެޅި ކަމަށް އޭނާގެ ވަކީލު ފާހަގަކޮށްފައިވެ އެވެ. އޭނާއަކީ ހަމުގެ މައްސަލައެއް ހުންނަ މީހަކަށް ވާއިރު، ޖަލަށްލީ ފަހުން އެ ހާލަތު ގޯސްވެ، އާއިލާއިން ފޮނުވި ހާއްސަ ލޯޝަނެއް ލީވާން އަށް ފޯރުކޮށްދީފައި ނުވާ ކަމަށް އާއިލާއިން ވެސް ވަނީ ބުނެފަ އެވެ.
ނޫސްވެރިންގެ ފަރާތުން ފާހަގަކުރެވުނު މި ކަންކަމާ ގުޅޭ ތަހުގީގެއް ހިއުމަން ރައިޓްސް ކޮމިޝަންއިން މިހާރު ދަނީ ކުރަމުންނެވެ. މިހުރިހާ މައްސަލަތަކެއްގެ ތެރެއިން، ޖަލުގެ ތެރޭގައި ހިނގާ ކަންތައްތަކާއި، ގައިދީންނަށް މުއާމަލާތް ކުރެވޭ ގޮތާ ބެހޭ ގޮތުން ގިނަ ސުވާލުތަކެއް ވަނީ އުފެދިފަ އެވެ.
ޖަލުގެ ގޮޅިން މަނާތަކެތި ފެނުމުގެ މައްސަލަ އާއި، ނޫސްވެރިންނަށް މުއާމަލާތް ކުރެވުނު ގޮތާ ބެހޭ ގޮތުން މިނިސްޓަރާއި ނޫސްވެރިންގެ ފަރާތުން ދެކެވުނު ދެކޮޅު ވާހަކަތަކުގެ ސަބަބުން މި މައްސަލައަށް އިތުރު ސަމާލުކަމެއް ލިބިގެންފި އެވެ. ފުލުހުންނާއި ހިއުމަން ރައިޓްސް ކޮމިޝަންގެ ތަހުގީގުތަކުން މި މައްސަލަތަކުގެ ހަގީގަތް ހާމަވެ، ޖަލުގެ ނިޒާމުގެ ދެމެހެއްޓެނިވި އިތުބާރު ކަށަވަރު ކުރެވޭނެ ކަމަށް އުންމީދު ކުރެވެ އެވެ.
