މޮސާޑްގެ ވެރިޔާ މިސައިލް ހަމަލާއެއްގައި މަރާލައިފި: އޭރު ހުރީ ނަތަންޔާހޫއާއި އެކު ބައްދަލުވުމެއްގައި
އިޒްރޭލުގެ އިންޓެލިޖެންސް އެޖެންސީ މޮސާޑްގެ ވެރިޔާ ޑޭވިޑް ބާނިއާ، ބޮޑުވަޒީރު ބެންޖަމިން ނަތަންޔާހޫއާ އެކު މުހިންމު ބައްދަލުވުމެއްގައި ހުންނަވަނިކޮށް، އީރާނުން ދިން ކަމަށް ބުނާ މިސައިލް ހަމަލާއެއްގައި އަވަހާރަވެއްޖެ އެވެ. އިޒްރޭލުގެ ސަރުކާރުން މިކަން ރަސްމީކޮށް ހާމަކޮށްފައިވާއިރު، މި ހާދިސާއަކީ ދެ ގައުމުގެ ގުޅުމަށް އައު ގޮންޖެހުމެއް ކުރިމަތިކުރުވާނެ ކަމަށް ބެލެވެ އެވެ. މީގެ ސަބަބުން ސަރަހައްދުގައި ކުރިއަށް އޮތްތަނުގައި ހަމަނުޖެހުންތައް އިތުރުވެދާނެ ކަމުގެ ބިރު ބޮޑުވެފައިވެ އެވެ.
މި ހަމަލާ ދީފައި ވަނީ އިޒްރޭލުގެ ސީކްރެޓް ސައިޓެއްގައި ބެންޖަމިން ނަތަންޔާހޫއާއި ޑޭވިޑް ބާނިއާ ސަލާމަތީ ކަންކަމާ ގުޅޭ ވަރަށް މުހިންމު ބައްދަލުވުމެއްގައި ތިއްބަވަނިކޮށެވެ. އިޒްރޭލުގެ ރައްކާތެރިކަމުގެ މަސްދަރުތަކުން ދޭ މައުލޫމާތުތަކަށް ބަލާއިރު، މި ހަމަލާ ދީފައި ވަނީ ޒަމާނީ، ވަރަށް ފުރިހަމައަށް އަމާޒު ހިފޭ މިސައިލްއެއް ބޭނުންކޮށްގެންނެވެ. ހަމަލާގެ ސަބަބުން ބާނިއާގެ އިތުރުން އިތުރު ބަޔަކަށް ވެސް އަނިޔާވެފައިވާ ކަމަށް އަދި ފުރާނަޔަށް ގެއްލުން ލިބިފައިވާ ކަމަށް ވެ އެވެ. ނަމަވެސް، ބޮޑުވަޒީރު ނަތަންޔާހޫއަށް އެއްވެސް އަނިޔާއެއް ލިބިފައިވާ ކަމެއް ރަސްމީކޮށް ހާމަކޮށްފައެއް ނުވެ އެވެ. ހަމަލާ ދިން ވަގުތު މިސައިލް އައިސް ޖެހުނު ތަނާއި، ގެއްލުން ލިބުނު މިންވަރުގެ ތަފްސީލުތައް ސަރުކާރުން މިވަގުތުވަނީ ވަރަށް ބޮޑަށް ސިއްރުކޮށްފަ އެވެ.
ޑޭވިޑް ބާނިއާ އަކީ އިޒްރޭލުގެ ސަލާމަތީ ކަންކަމުގައި ދިގު ތަޖުރިބާއެއް ލިބިވަޑައިގެންފައިވާ ބޭފުޅެކެވެ. އޭނާ މޮސާޑްގެ ވެރިޔާގެ މަގާމަށް އައްޔަން ކުރެވުނީ އެތައް އަހަރުތަކެއް ވަންދެން އެ އިދާރާގެ ތެރޭގައި އެކި މަގާމުތައް ފުރުއްވުމަށްފަހު އެވެ. އޭނާގެ ޒަމާނުގައި މޮސާޑުން ވަނީ އީރާނުގެ ނިއުކްލިއަރ ޕްރޮގްރާމާ ގުޅޭގޮތުން ގިނަ ކަންކަން ހުއްޓުވުމަށް މަސައްކަތްކޮށް، އެތައް އޮޕަރޭޝަންތަކެއް ކާމިޔާބުކޮށްފަ އެވެ. އޭނާއަކީ އިޒްރޭލުގެ ސަލާމަތީ ކައުންސިލްގެ މުހިންމު މެންބަރެއްގެ ގޮތުގައި ބެލެވުނު ބޭފުޅެކެވެ. އޭނާގެ މަރަކީ އިޒްރޭލުގެ އިންޓެލިޖެންސް ކޮމިއުނިޓީއަށް ލިބުނު ވަރަށް ބޮޑު ހީނަރުކަމެއް ކަމަށް އިޒްރޭލުގެ މީޑިއާތަކުން ރިޕޯޓުކުރެ އެވެ.
ބާނިއާ އާއި ނަތަންޔާހޫ ބައްދަލުކުރައްވަން ތިއްބެވި ވަގުތަކީ، މެދުއިރުމަތީގައި ސިޔާސީ ގޮތުންނާއި ސަލާމަތީ ގޮތުން ބޮޑެތި ބަދަލުތަކެއް އަންނަމުންދާ ދަނޑިވަޅެކެވެ. އީރާނުގެ ނިއުކްލިއަރ ޕްރޮގްރާމާއި، ސީރިއާގައި އީރާނުގެ ނުފޫޒު ފުޅާވަމުންދާ ކަންކަމަކީ އިޒްރޭލުން ކަންބޮޑުވާ ކަންކަމެވެ. މީގެ އިތުރުން ލުބްނާނާއި ޣައްޒާގައި ހަރަކާތްތެރިވާ އީރާނުގެ ތާއީދު ލިބިފައިވާ ޖަމާއަތްތަކުން އިޒްރޭލަށް އަމާޒުކޮށްދޭ ހަމަލާތަކާ ގުޅޭގޮތުން ވެސް މި ބައްދަލުވުމުގައި މަޝްވަރާކުރަމުން ދިޔުމަކީ އެކަށީގެންވާ ކަމެކެވެ. މޮސާޑްގެ ވެރިޔާގެ މަރަކީ އިޒްރޭލުގެ ސަލާމަތީ ކަންކަމަށް ފުން އަސަރެއް ކުރާނެ ކަމެއް ކަމަށް ބެލެވެ އެވެ.
މި ހަމަލާއާ ގުޅިގެން އިޒްރޭލުގެ ސަރުކާރުން ވަނީ ހަރުކަށި ބަސްތަކުން އީރާން ކުށްވެރިކޮށް، މީގެ ބަދަލު ހިފާނެ ކަމަށް އިންޒާރު ދީފަ އެވެ. އިޒްރޭލުގެ ދިފާއީ ވަޒީރު ވިދާޅުވެފައި ވަނީ "އިޒްރޭލަށް ހަމަލާދޭ ކޮންމެ ފަރާތަކަށް ވެސް ހަރުކަށި ރައްދެއް ދެވޭނެ" ކަމަށެވެ. އަނެއްކޮޅުން، އީރާނުގެ ރެވޮލިއުޝަނަރީ ގާޑްސްއިން ވަނީ މި ހަމަލާގެ ޒިންމާ ނަގައި، މިއީ "އިޒްރޭލުގެ ޖަރީމާތަކަށް ދިން ރައްދެއް" ކަމަށް ބުނެފަ އެވެ.
މި ހާދިސާއަކީ އިޒްރޭލާއި އީރާނާ ދެމެދު އޮތް ހަމަނުޖެހުމުގެ ތާރީޚުގައި ފާހަގަކޮށްލެވޭ ހާދިސާއެކެވެ. މޮސާޑްގެ ވެރިޔާ، އިޒްރޭލުގެ އެންމެ އިސް ބޮޑުވަޒީރާއެކު ބައްދަލުވުމެއްގައި ހުންނަވަނިކޮށް ދިން މި ހަމަލާއަކީ އީރާނުގެ ކެރިފޯރުންތެރިކަން ދައްކުވައިދޭ ކަމެއް ކަމަށް ބެލެވެ އެވެ. މިކަމުގެ ސަބަބުން ސަރަހައްދުގެ ސަލާމަތަށް ދިމާވާނެ ނުރައްކާތަކަށް ދުނިޔެއިން އަންނަނީ ކެތްމަދުކަމާއެކު ބަލަމުންނެވެ.
