ރާއްޖެއިން ހިމަބިހި ޖެހުނު މީހުންގެ އަދަދު 11 އަށް

ރާއްޖެއިން މުޅިން ނައްތާލެވިފައިވާ ކަމަށް ދުނިޔޭގެ ޞިއްޙަތު ޖަމްޢިއްޔާ (ޑަބްލިޔުއެޗްއޯ) އިން ކަނޑައަޅާފައިވާ ބަލި، ހިމަބިހި ޖެހުނު މީހުންގެ އަދަދު 11 އަށް އަރައިފިއެވެ. މިހާރުގެ މި ހާލަތަކީ، މުޅި ސަރަހައްދުގައި މި ބަލި ފެތުރެމުންދާތީ، ރާއްޖެއިން ވެސް މި ބައްޔަށް ޢަމަލީ ގޮތުން އަޅާ ފިޔަވަޅުތަކަށް އިތުރު ބާރެއް ދޭންޖެހިފައިވާ ކަމަށް އިންޒާރެއް ކަމަށް ސިއްހީ ތަޖުރިބާކާރުން ވިދާޅުވެއެވެ.

މިދިޔަ ދިހަވަރަކަށް އަހަރުގެ ތެރޭގައި ރާއްޖެއިން ހިމަބިހި ނައްތާލެވުނުކަން ޑަބްލިޔުއެޗްއޯއިން ތަޞްދީޤުކޮށްފައިވާއިރު، މިހާރު މި ބަލި އަލުން ފެތުރެން ފެށުމަކީ ސިއްޙީ ދާއިރާއަށް ދިމާވެފައިވާ ބޮޑު ގޮންޖެހުމެކެވެ. ރާއްޖޭގެ ބޯޑަރުތައް ހުޅުވި، ބޭރުގެ ފަތުރުވެރިންނާއި ދިވެހިންވެސް އެކި ބޭނުންތަކުގައި ބޭރު ޤައުމުތަކަށް ދަތުރުކުރުން އިތުރުވުމާއެކު، އަވަށްޓެރި ޤައުމުތަކުގައި މިހާރު ފެތުރެމުންދާ ހިމަބިއްސަށް ރާއްޖެ ހުޅުވިފައިވާކަމަށް ފެނެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާ ގޮތުގައި މިދިޔަ ހަފްތާގައިވެސް ރާއްޖެއިން ވަނީ ހިމަބިހި ޖެހުނު ދެ މީހަކު ފެނިފައެވެ. މިއާއެކު މި އަހަރުގެ މިހާތަނަށް ރާއްޖެއިން މިބަލި ޖެހުނު މީހުންގެ ޖުމްލަ އަދަދު މިވަނީ 11 އަށް އަރާފައެވެ. އެންމެ ގިނަ މީހުންނަށް މިބަލި ޖެހިފައިވަނީ މިނިމުނު މެއި މަހުގެ ތެރޭގައެވެ. މި މައުލޫމާތުތަކުން ދައްކާ ގޮތުގައި ހިމަބިހީގެ ކޭސްތައް ރާއްޖޭގައި އިތުރުވަމުން އަންނަނީ ހަލުވި ކަމާއި އެކުގައެވެ. މިއީ ރައްޔިތުންނާއި ކަމާބެހޭ ފަރާތްތަކުން އިތުރަށް ސަމާލުވާންޖެހޭ ކަމެކެވެ.

މި ބަލި ފެތުރޭ މިންވަރު ކޮންޓްރޯލް ކުރުމަށްޓަކައި ސިއްޙީ ކަމާބެހޭ ފަރާތްތަކުން ވަނީ ޚާއްޞަ ފިޔަވަޅުތަކެއް އަޅާފައެވެ. އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ވަނީ ހިމަބިހި ޖެހޭ މީހުންނަށް ޚާއްޞަކޮށްފައިވާ ޑެސްކެއް ޤާއިމުކޮށް ޚިދުމަތްދޭން ފަށާފައެވެ. މީގެ އިތުރުން ހޮސްޕިޓަލްތަކުން ޚިދުމަތް ހޯދުމަށް ދާ ފަރާތްތަކުން ޚާއްޞަ ސަމާލުކަމެއް ދިނުމަށް ވަނީ އިލްތިމާސްކޮށްފައެވެ. ކޮންމެހެން ދާންޖެހިގެން ނޫނީ ހޮސްޕިޓަލްތަކަށް ޒިޔާރަތް ނުކުރުމަށާއި، ބަލީގެ އެއްވެސް އަލާމާތެއް ހުރިނަމަ، ހޮސްޕިޓަލަށް ދިއުމުގެ ކުރިން ފޯނުން ގުޅައިގެން މަޢުލޫމާތު ހޯދުމަށްވެސް ވަނީ އިރުޝާދު ދީފައެވެ.

ހިމަބިއްސަކީ ވަރަށް ފަސޭހައިން އެކަކު ގައިން އަނެކަކުގެ ގަޔަށް އަރާ ބައްޔެކެވެ. މި ބަލި ފެތުރުން ހުއްޓުވުމަށް އެންމެ މުހިންމު ކަމަކީ ވެކްސިން ޖެހުމެވެ. ހިމަބިހި ވެކްސިންގެ ދެ ޑޯޒް ފުރިހަމަ ކުރުމަކީ މި ބަލިން ރައްކާތެރިވުމަށްޓަކައި ވަރަށް މުހިންމު ކަމެކެވެ. ޚާއްޞަކޮށް ކުޑަކުދިންނާއި، ދަތުރުފަތުރު ގިނައިން ކުރާ މީހުން އަދި ސިއްޙީ ޚިދުމަތްދޭ މީހުން މިކަމަށް އިތުރަށް ސަމާލުވުމަށް ސިއްޙީ ތަޖުރިބާކާރުން އިލްތިމާސް ކުރައްވައެވެ. މީގެ އިތުރުން އާންމު ސާފުތާހިރުކަމަށް ސަމާލުކަން ދިނުމާއި، އަތްދޮވުން އަދި ކެއްސާ ކިނބިހި އެޅުމުގައި އަނގަ އާއި ނޭފަތް ރަނގަޅަށް ނިވައިކުރުން ފަދަ އާންމު ސިއްޙީ އާދަތައް ދެމެހެއްޓުމަކީވެސް މި ބަލި ފެތުރުން މަދުކުރުމަށް އެޅޭނެ މުހިންމު ފިޔަވަޅުތަކެކެވެ.

އެޗްޕީއޭއިން ވިދާޅުވަނީ ހިމަބިހި ފެތުރިގެންދާ މިންވަރު ކައިރިން ބަލަމުންދާ ކަމަށާއި، ބަލި ކޮންޓްރޯލް ކުރުމަށް ބޭނުންވާ ހުރިހާ ފިޔަވަޅެއް އަޅަމުންދާ ކަމަށެވެ. މި ބަލީގެ އަލާމާތްތައް ފެނިއްޖެނަމަ، އަވަހަށް ޑޮކްޓަރަށް ދެއްކުމަށް އެޗްޕީއޭއިން އިލްތިމާސްކުރެއެވެ. ބަލި މީހުންނާއި ކޮންޓެކްޓްވި ފަރާތްތައް ދެނެގަނެ، ބަލި ފެތުރޭނެ މަގުތައް ބަންދުކުރުމަށްވެސް މަސައްކަތް ކުރަމުންދާ ކަމަށް މައުލޫމާތު ލިބެއެވެ.

މި ހާލަތަކީ، ރާއްޖޭގެ ޢާންމު ސިއްޙަތު ރައްކާތެރިކުރުމަށްޓަކައި ސަރުކާރާއި، ޢާންމު ރައްޔިތުން ގުޅިގެން މަސައްކަތް ކުރުން މުހިންމުކަން ދައްކުވައިދޭ ކަމެކެވެ. ހިމަބިއްސަކީ ފަރުވާކުރެވެން ހުރި ބައްޔެއް ނަމަވެސް، ރައްކާތެރިކަމުގެ ފިޔަވަޅުތައް ނޭޅިއްޖެނަމަ، ސިއްޙީ ނުރައްކާތައް ބޮޑުވެ، ޚާއްޞަކޮށް ކުޑަކުދިންނަށް ނުރައްކާވާ ބައްޔެކެވެ. އެހެންކަމުން، ސިއްޙީ ކަމާބެހޭ ފަރާތްތަކުން ދެއްވާ އިރުޝާދުތަކަށް ބޯލެނބުމާއި، ވެކްސިން ޖެހުން ފަދަ ރައްކާތެރިކަމުގެ ފިޔަވަޅުތައް އަޅައިގެން މި ބަލިން އަވަހަށް ރައްކާތެރިވެވޭނެ ކަމަށް އުންމީދު ކުރަމެވެ.