ލުބުނާނުގެ ދެކުނުގެ ސަރަހައްދުތަކުގައި ޒަޔަނިސްޓުންގެ ހަމަލާތަކުގެ ސަބަބުން ބޮޑެތި އަލިފާން ރޯވެއްޖެ
ލުބުނާނާއި އިސްރާއީލް ބޯޑަރު ސަރަހައްދުގައި ހިނގަމުންދާ ހަމަލާތަކުގެ ތެރެއިން ލުބުނާނުގެ ދެކުނުގެ ސަރަހައްދުތަކަށް ޔަހޫދީ ޒަޔަނިސްޓް ސިފައިން ވަދެ އަލިފާން ރޯކޮށްފިއެވެ. މި ހަމަލާތަކުގެ ސަބަބުން އެ ސަރަހައްދުގެ ދަނޑުވެރިކަމަށް ބޮޑެތި ގެއްލުންތަކެއް ލިބި، އެތައް ރައްޔިތުންނެއްގެ ދިރިއުޅުމަށް ނޭދެވޭ އަސަރުތަކެއް ވަނީ ކޮށްފައެވެ. ބޯޑަރު ސަރަހައްދުގައި ހާލަތު ގޯސްވަމުންދާތީ، އާންމުންގެ މެދުގައި ކަންބޮޑުވުން ވަނީ އިތުރުވެފައެވެ.
މިދިޔަ އޮކްޓޯބަރު މަހުގެ ހަތްވަނަ ދުވަހުން ފެށިގެން ފަލަސްތީނުގެ ޣައްޒާއަށް އިސްރާއީލުން ދެމުންދާ ނަސްލު ނައްތާލުމުގެ ހަމަލާތަކާ ގުޅިގެން، ލުބުނާނުގެ ހިޒްބުﷲ އާއި އިސްރާއީލްގެ ސިފައިންނާ ދެމެދު ބޯޑަރުގައި ހަމަލާތައް ވަނީ ވަރަށް ބޮޑަށް ގަދަވެފައެވެ. ދުވާލަކު އެތައް ފަހަރެއްގެ މަތިން ދެފަރާތުންވެސް ރޮކެޓް ހަމަލާތަކާއި އާޓިލަރީ ބަޑީގެ ހަމަލާތައް ބަދަލުކުރެއެވެ. މީގެ ސަބަބުން ދެފަރާތުގެވެސް ބޯޑަރު ސަރަހައްދުގައި ދިރިއުޅޭ އެތައް ހާސް ރައްޔިތުން ވަނީ އެމީހުންގެ ގެދޮރު ދޫކޮށް އެހެން ސަރަހައްދުތަކަށް ހިޖުރަ ކޮށްފައެވެ.
އެންމެ ފަހުގެ ހަމަލާތައް ދީފައިވަނީ ލުބުނާނުގެ ދެކުނުގެ ރަށްތަކާއި ދަނޑުބިންތަކަށެވެ. އިސްރާއީލުގެ ސިފައިން ދިން އާޓިލަރީ ބަޑީގެ ހަމަލާތަކާއި ވައިގެ ހަމަލާތަކުގެ ސަބަބުން، ހިކިފައި ހުރި ގަސްގަހާގެހީގައި އަލިފާން ރޯވެ، ވަރަށް ބޮޑަށް ފެތުރިގެން ދިޔައެވެ. މި އަލިފާންގަނޑުތަކުގެ ސަބަބުން ލުބުނާނުގެ ގިނަ އަދަދެއްގެ ދަނޑުބިންތަކާއި، ޒައިތޫނި ގަސްތައް ހަލާކުވެ، އެ ސަރަހައްދުގެ ދިރޭ ތަކެއްޗަށްވެސް ބޮޑެތި ގެއްލުންތަކެއް ލިބިފައިވާކަމަށް ރިޕޯޓްތައް ބުނެއެވެ.
ލުބުނާނުގެ ރަސްމީ ފަރާތްތަކުން ބުނާ ގޮތުގައި، މި އަލިފާންގަނޑުތައް ކޮންޓްރޯލް ކުރުމަށް ފަޔަރ ފައިޓަރުންނަށް ވަނީ ގިނަ ގޮންޖެހުންތަކަކާ ކުރިމަތިވެފައެވެ. ސަބަބަކީ ބޯޑަރު ސަރަހައްދުގައި ހަމަލާތައް ހުއްޓާނުލާ ކުރިއަށް ދިއުމެވެ. އަލިފާނުގެ ދުން ބޮޑުވުމުގެ ސަބަބުން، އެ ސަރަހައްދުގައި ދިރިއުޅޭ އާންމުންގެ ސިއްހީ ހާލަތުވެސް ވަނީ ގޯސްވެފައެވެ. އެތައް ބަޔަކަށް ނޭވާލާ ނިޒާމުގެ މައްސަލަތައް ކުރިމަތިވެފައިވާކަމަށް ހޮސްޕިޓަލް ރިޕޯޓްތައް ދައްކައެވެ.
މި އަލިފާންގަނޑުތަކުގެ ސަބަބުން އެތައް ހާސް އޭކަރުގެ ދަނޑުބިން ހަލާކުވެ، ލުބުނާނުގެ އިޤްތިޞާދަށް ވަނީ ބޮޑެތި ގެއްލުންތަކެއް ވެފައެވެ. ޚާއްސަކޮށް ދަނޑުވެރިކަމަށް ބަރޯސާވެފައިވާ މި ސަރަހައްދުގައި، ދަނޑުވެރިންނަށް އެތައް މިލިއަން ޑޮލަރުގެ ގެއްލުންތަކެއް ވެފައިވާކަމަށް އަންދާޒާ ކުރެވެއެވެ. މީގެ އިތުރުން، ގިނަ އަދަދެއްގެ ރައްޔިތުންގެ ގެދޮރު ހަލާކުވެ، އެމީހުންގެ ދިރިއުޅުމުގެ ބިންގާ ވަނީ ބިނާނުކުރެވޭ ވަރަށް ގޯސްވެފައެވެ.
އަދި މިފަހަރު ޒޔަނިސްޓުންގެ ހަމަލަތައް ހުރީ އާނމުންގެ މުދަލާއި ގެދޮރަށް ކަމަށް ވުމީ މިކަމުގެ ކަންބޮޑުވުން އިތުރުވާ ކަމެއް ކަމުގައެވެ.
ބައިނަލްއަޤްވާމީ ބައެއް ފަރާތްތަކުން ވަނީ ދެފަރާތަށްވެސް ހަމަލާތައް ހުއްޓާލުމަށް ގޮވާލާފައެވެ. އަދި ސަރަހައްދުގައި ހަމަޖެހުން ޤާއިމު ކުރުމަށްޓަކައި، ހަމަލާތައް ކޮންޓްރޯލް ކުރުމަށް މަސައްކަތް ކުރުމަށްވެސް ވަނީ އިލްތިމާސްކޮށްފައެވެ. ނަމަވެސް، މިހާތަނަށް ހަމަލާތައް ހުއްޓާލުމުގެ އެއްވެސް ނިޝާނެއް ފެންނާކަން ނެތެވެ.
