މެސީ އިސްރާއީލަށް އެހީވި ކަމަށް ބުނެ ފެތުރޭ ވާހަކަތަކާ ގުޅިގެން ބޮޑެތި ފާޑުކިޔުންތަކެއް

މެސީ އިސްރާއީލަށް އެހީވި ކަމަށް ބުނެ ފެތުރޭ ވާހަކަތަކާ ގުޅިގެން ބޮޑެތި ފާޑުކިޔުންތަކެއް

ދުނިޔޭގެ އެންމެ މަޝްހޫރު އެއް ފުޓްބޯޅަ ކުޅުންތެރިޔާ، ލިއޮނަލް މެސީ އިސްރާއީލަށް 1.5 މިލިއަން ޑޮލަރު ހަދިޔާކޮށްފައިވާ ކަމަށް ބުނެ، ސޯޝަލް މީޑިއާގައި ފެތުރެމުންދާ ވާހަކަތަކާއެކު އޭނާއަށް ވަރަށް ބޮޑަށް ފާޑުކިޔުންތައް އަމާޒުވެއްޖެއެވެ. ދުނިޔޭގެ އެކި ކަންކޮޅުތަކުން، ޚާއްސަކޮށް މުސްލިމް ގައުމުތަކާއި ފަލަސްތީނަށް ތާއީދުކުރާ ފަރާތްތަކުން، މިކަމާ ގުޅިގެން ނުރުހުން ފާޅުކުރަމުން އެބަދެއެވެ. މިފަދަ ވާހަކަތަކަކީ މެސީގެ ގްލޯބަލް މަގުބޫލުކަމަށް އަސަރުކުރާނެ ކަމެއްގެ ގޮތުގައި ގިނަ ބަޔަކު ދަނީ ދެކެމުންނެވެ. އޭނާއަކީ ދުނިޔޭގެ ފުޓްބޯޅަ ކުޅުންތެރިންގެ ތެރެއިން އެންމެ ގިނަ ފަހަރު ބެލޮން ޑޯ އެވޯޑް ހާސިލްކޮށްފައިވާ ކުޅުންތެރިޔާ ކަމުން، އޭނާގެ ކޮންމެ ހަރަކާތަކަށް ވެސް އާއްމުންގެ ބޮޑު ސަމާލުކަމެއް ލިބެއެވެ.

މެސީ އިސްރާއީލަށް 1.5 މިލިއަން ޑޮލަރު ހަދިޔާކުރި ކަމަށް ބުނެ ފެތުރެމުންދާ ވާހަކަތައް ފެށުނީ ކޮން ގޮތަކުންކަން ސާފުކޮށް އެނގޭކަށް ނެތެވެ. ނަމަވެސް، މީގެ ކުރިން ވެސް މިފަދަ ވާހަކަތަކެއް ފެތުރިފައިވާ ކަމަށް ބައެއް ފަރާތްތަކުން ބުނެއެވެ. ޚާއްސަކޮށް 2014 ވަނަ އަހަރު ގާޒާގައި ހިނގި ހަނގުރާމައާ ގުޅިގެން، އިސްރާއީލަށް އެހީތެރިވުމަށްޓަކައި މެސީ އެ އަދަދު ހަދިޔާކުރި ކަމަށް ބައެއް މީޑިއާ ރިޕޯޓްތަކުގައި ބުނެފައިވެއެވެ. އެ ރިޕޯޓްތަކުގައި އިޝާރާތްކޮށްފައިވަނީ އިސްރާއީލުގެ ކުޅުންތެރިންނާއެކު މެސީ ފޮޓޯ ނެގުމަށް އިންކާރުކުރި ކަމަށް ބުނެ ފެތުރިފައިވާ ވާހަކަތަކަށްފަހު، މިފަދަ ހަދިޔާއެއް ދިން ކަމަށެވެ. ނަމަވެސް، މިވާހަކަތަކަކީ ތެދު ވާހަކަތަކެއް ކަމަށް ރަސްމީ އެއްވެސް ފަރާތަކުން ކަށަވަރުކޮށްދީފައެއް ނުވެއެވެ. މީގެ އިތުރުން، އެ އަދަދު ދިނީ އިސްރާއީލަށް ބޭސްފަރުވާއަށް އެހީވުމަށް ކަމަށް ވެސް ބައެއް ރިޕޯޓްތަކުން ބުނެއެވެ. މިކަންކަން މިހާތަނަށް ވެސް ވަނީ ސައްހަނޫން މައުލޫމާތެއްގެ ގޮތުގައި ދެމިފައެވެ.

މެސީއާ ގުޅޭގޮތުން ފެތުރެމުންދާ މި ވާހަކަތަކާއެކު، ސޯޝަލް މީޑިއާގައި އޭނާއަށް އަމާޒުވެފައިވާ ފާޑުކިޔުންތައް ވަރަށް ބޮޑެވެ. ޓްވިޓަރ، ފޭސްބުކް، އިންސްޓަގްރާމް އަދި ޓިކްޓޮކް ފަދަ ޕްލެޓްފޯމްތަކުގައި #BoycottMessi އަދި #MessiHatesPalestine ފަދަ ހެޝްޓެގްތައް ބޭނުންކޮށްގެން މެސީއަށް ފާޑުކިޔުންތައް އަމާޒުކުރަމުން އެބަދެއެވެ. ފަލަސްތީނަށް ތާއީދުކުރާ ފަރާތްތަކުންނާއި، އިސްރާއީލުގެ ސިޔާސަތުތަކާ ދެކޮޅު ފަރާތްތަކުން ވަނީ މެސީގެ އަމަލު ކުށްވެރިކޮށްފައެވެ. ބައެއް މީހުން ވަނީ މެސީގެ ޖާޒީތައް ދިއްލާލައި، ނުވަތަ ހާލާކުކޮށްލާ ވީޑިއޯތައް ވެސް ހިއްސާކޮށްފައެވެ. އަދި އޭނާގެ އިޝްތިހާރުތައް ބޮއިކޮޓް ކުރުމަށް ވެސް ގޮވާލާފައިވެއެވެ. މިފަދަ ޕޯސްޓްތައް ހާހުން ގުނާ އަދަދަށް ޝެއާވެ، ކޮމެންޓް ކުރަމުންދާއިރު، މެސީގެ މަގުބޫލުކަމަށް މިކަމުގެ ސަބަބުން ވަރަށް ބޮޑަށް އަސަރުކުރާނެ ކަމަށް ވަނީ ބެލިފައެވެ.