ނަޝީދު ނޮހޮވިއްޖެނަމަ ޕާޓީ ދޫކޮށްދާނެ ކަމުގެ ނުސީދާ އިންޒާރެއް މާރިޔާ ދެއްވައިފި؛ މީކާއީލް ނޮހޮވިއްޖެނަމަ ޕާޓީ ދޫކޮށްދާނީ މީކާއިލް މަންމަ އެކަނި

އެމްޑީޕީގެ ޗެއާޕާސަންކަމަށް ކުރިމަތިލައްވާ ކުރީގެ ރައީސް މުހައްމަދު ނަޝީދުގެ ކެމްޕޭން ހަރަކާތެއްގައި، ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވާހަކަފުޅު ދައްކަވަމުން، ރައީސް ނަޝީދު އެމްޑީޕީގެ ޗެއާޕާސަން ކަމަށް ހޮވިވަޑައިނުގަތްނަމަ އެމަނިކުފާނުގެ ބައިވެރިން ޕާޓީ ދޫކޮށް ދިއުމުގެ ފުރުސަތު އޮތްކަމުގެ ނުސީދާ އިންޒާރެއް ދެއްވައިފިއެވެ. މީގެ އިތުރުން، ޗެއާޕާސަންކަމަށް ރައީސް ނަޝީދާ ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް ނަސީމްއަށް ވަރަށް ބޮޑަށް ފާޑުކިޔުން އަމާޒުކުރައްވައި، އޭނާއަކީ ސިޔާސީ ގޮތުން "ކުޑަކުއްޖެއް" ކަމަށް ސިފަކުރައްވާފައިވެއެވެ. މި ބަސްފުޅުތަކަކީ އެމްޑީޕީގެ ތެރޭގައި އުފެދިފައިވާ ދެ ބައިވުމާއި، އަންނަން އޮތް ޗެއާޕާސަން އިންތިހާބުގައި އެކަންކަން ފެނިގެންދާނެކަމުގެ ހެއްކެއްކަމަށް ގިނަ ބަޔަކު ދެކެއެވެ.

މާރިޔާ އަހުމަދު ދީދީގެ ބަސްފުޅުތަކުގެ ތެރެއިން އެންމެ ބޮޑަށް ފާހަގަވެގެން ދިޔައީ މީކާއީލް ނަސީމްގެ ސިޔާސީ ބަރުދަނާ މެދު އުފެއްދެވި ސުވާލުތަކެވެ. އެގޮތުން މާރިޔާ ވިދާޅުވީ މީކާއީލް ޕާޓީ ދޫކޮށް ވަކިވެވަޑައިގެންފިނަމަ އޭނާގެ ފަހަތުން ޕާޓީ ދޫކޮށް ދާނީ ހަމައެކަނި އޭނާގެ މަންމަ، މަރިޔަމް ޒުބައިރު (މަންދީ ޒުބައިރު) އެކަނިކަމަށް ދޭހަވާފަދަ މޭރުމަކުންނެވެ. މަންދީ ޒުބައިރަކީ އެމްޑީޕީގެ އޮފީހުގައި ގިނަ އަހަރުތަކެއް ވަންދެން މަސައްކަތްކުރައްވާ ބޭފުޅެއްކަން ފާހަގަކުރައްވައި މާރިޔާ ވިދާޅުވީ، މީކާއީލްގެ ފަހަތުން ޕާޓީ ދޫކޮށްދާނެ އެހެން އެއްވެސް މެންބަރަކު ނުހުންނާނެ ކަމަށެވެ. މީކާއީލްއަކީ ސިޔާސީ މައިދާނުގައި ކަންކަން ނޭނގި، "ކުޑަކުއްޖެއް" ފަދައިން ހުރި ބޭފުޅެއް ކަމަށް ސިފަކުރެއްވުމުން، އޭނާގެ ސިޔާސީ ވިސްނުމާއި ހަރުދަނާކަމާ މެދު ސުވާލު އުފެއްދިފައިވެއެވެ.

އެމްޑީޕީގެ ތެރޭގައި އުފެދިފައިވާ ދެބަޔަށް ބެހުން އިތުރަށް ހާމަކޮށްދެމުން، މާރިޔާ ވަނީ މީކާއީލްގެ ކެމްޕޭން ޓީމާ ގުޅޭގޮތުން ބައެއް ބަސްފުޅުތައް ވިދާޅުވެފައެވެ. އޭނާ ވިދާޅުވީ، 2012 ވަނަ އަހަރު އެމްޑީޕީގެ ވެރިކަން އަނިޔާވެރިކޮށް ވައްޓާލުމުގައި އެންމެ އިސްކޮށް އުޅުނު ފަރާތްތައް މިހާރު ތިބީ މީކާއީލްގެ ޓީމުގައި ކަމަށެވެ. އަދި މި ބޭފުޅުން މަސައްކަތް ކުރަމުންދަނީ އެމްޑީޕީ "ޖަހައިގަންނަން" ނުވަތަ އެޕާޓީގެ ކޮންޓްރޯލް ނަގަން ކަމަށް މާރިޔާ ތުހުމަތުކުރެއްވިއެވެ. "އަޅުގަނޑުމެންގެ ވެރިކަން ޖަހައިގަނެގެން މިހާރު އެ ދަނީ ޕާޓީ ޖަހައިގަންނަން. ކުޑަކުޑަ ކުއްޖެއް ބައިންދައިގެން އެކަން ކުރުމަށްޓަކައި މަސައްކަތްކުރަމުންދަނީ،" މާރިޔާ ވިދާޅުވިއެވެ. މި ބަސްފުޅުތަކުން ދޭހަވަނީ މީކާއީލްގެ ކެމްޕޭންގެ ފަހަތުގައި ތިބީ ޕާޓީގެ މަސްލަހަތު ނޫން އެހެން އެޖެންޑާއެއް ހިންގަން މަސައްކަތްކުރާ ބަޔަކު ކަމަށް ރައީސް ނަޝީދުގެ ފެކްޝަނުން ދެކޭކަމެވެ.

މީކާއީލް ނަސީމް ކުރިން ވިދާޅުވެފައިވަނީ، އޭނާ ޗެއާޕާސަންކަމަށް ހޮވިވަޑައިނުގެންފިނަމަ އެހެން ބޭފުޅެއްގެ ފަހަތަށް ޖެހިވަޑައިގަންނަވާނެ ކަމަށެވެ. މާރިޔާ މިކަމަށް އިޝާރާތް ކުރައްވައި ވިދާޅުވީ، އެއީ މީކާއީލަށް ސިޔާސީ ކަންކަން އޮޅިފައިވާ މިންވަރު ހާމަވާ ކަމެއް ކަމަށެވެ. އަދި އޭނާގެ ފަހަތުން ދާނެ މީހަކު ހޯދަން ޖެހޭ ކަމަށާއި، ޒުވާންކަމުގެ ރޫހުގައި މީކާއީލަށް މާ ބޮޑަށް ކަންކަން އޮޅިފައިވާ ކަމަށްވެސް މާރިޔާ ވަނީ ފާހަގަކުރައްވާފައެވެ. މާރިޔާގެ މި ބަސްފުޅުތަކުން ހާމަވަނީ މީކާއީލްގެ ސިޔާސީ ވިސްނުމާއި ތަޖުރިބާގެ މައްސަލަތަކެއް އެބަހުރިކަމަށް ރައީސް ނަޝީދުގެ ފެކްޝަނުން ދެކޭކަމެވެ.

މާރިޔާގެ ވާހަކަފުޅުގެ އެންމެ މުހިންމު ނުކުތާއަކީ، އެމްޑީޕީގެ ޗެއާޕާސަންކަމަށް ރައީސް މުހައްމަދު ނަޝީދު ހޮވިވަޑައިނުގަތްނަމަ، ޕާޓީގެ ތެރޭގައި ބޮޑެތި ބަދަލުތަކެއް އަންނާނެކަމުގެ ނުސީދާ އިންޒާރެވެ. މީކާއީލްގެ ޓީމާ ދެކޮޅަށް މާރިޔާ ކުރެއްވި ހޫނު ހަމަލާތަކުން ދޭހަވަނީ، ރައީސް ނަޝީދަށް ތާއީދުކުރާ ފަރާތްތައް މި އިންތިހާބަށް ދެކޭ ގޮތެވެ. އެމަނިކުފާނު ނުހޮވިއްޖެނަމަ، ޕާޓީގެ ތެރޭގައި އޮންނަ އެއްބައިވަންތަކަން ހީނަރުވެ، ބައެއް މެންބަރުންނާއި، އެމަނިކުފާނަށް ވަރުގަދަ ތާއީދުކުރާ ފަރާތްތަކުން ޕާޓީ ދޫކޮށް ދިއުމުގެ ފުރުސަތު ބޮޑުކަމުގެ އިޝާރާތެއް މާރިޔާގެ ވާހަކަފުޅުގައި އެބަހުއްޓެވެ.

އެމްޑީޕީގެ ޗެއާޕާސަންކަމުގެ އިންތިހާބު ކައިރިވަމުންދާ ވަރަކަށް، ޕާޓީގެ އެތެރޭގައި އޮންނަ ސިޔާސީ ހޫނުކަން އިތުރުވަމުންދާކަން މާރިޔާ އަހުމަދު ދީދީގެ މި ވާހަކަފުޅުތަކުން ވަރަށް ސާފުކޮށް ހާމަވެއެވެ. ރައީސް ނަޝީދަށް ވަރުގަދަ ތާއީދެއް އޮތްކަން ހާމަކޮށް، ވާދަވެރި ފަރާތްތަކަށް ހޫނު ރައްދެއް ދެއްވުމަކީ، މި އިންތިހާބު ޕާޓީގެ ކުރިމަގަށް ވަރަށް މުހިންމު އިންތިހާބަކަށް ވާނެކަމުގެ ހެއްކެކެވެ. އަދި މި އިންތިހާބުގެ ނަތީޖާއާއެކު އެމްޑީޕީގެ ތެރޭގައި ކޮންކަހަލަ ބަދަލުތަކެއް އަންނާނެތޯ ބެލުމަކީ ސިޔާސީ މައިދާނަށް ޝައުގުވެރިވާ އެންމެންގެ ސަމާލުކަން ހުއްޓިފައިވާ ކަމެކެވެ.

މި ބަސްތަކުން ހާމަވަނީ ވާދަވެެި އިންތިހާބެއްގައި ވާދަކުރުމުގެ ފަންނު ނަޝީދުގެ ފެކްޝަންގައި ނެތްކަން ކަމަށް ގިނަބަޔަކު ދެކި ވަނީ ފާޑުކިޔާފައެވެ