ނަތަންޔާހޫ އާއި ބެން ގްވީރް މަރުވި ކަމުގެ އަޑުތަކާ ގުޅިގެން އިސްރާއީލުގައި ބޮޑެތި މުޒާހަރާތައް
އީރާނުން ދިން މިސައިލް ހަމަލާތަކުގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ސަލާމަތީ ކަންކަމާ ބެހޭ ވަޒީރު އިޓާމާ ބެން ގްވީރް މަރުވި ކަމުގެ އަޑުތައް ފެތުރި، އެކަމާ ގުޅިގެން އިސްރާއީލުގެ އެކި ސަރަހައްދުތަކުގައި ބޮޑެތި މުޒާހަރާތަކެއް ފެށިފައިވާ ކަމަށް ރިޕޯޓްތައް ބުނެއެވެ. މީގެ ހަފްތާއެއްހާ ދުވަސް ކުރިން ދިން މި މިސައިލް ހަމަލާތަކަށްފަހު، މި އަޑުތައް ފެތުރެން ފެށުމުން، ގިނަ އަދަދެއްގެ މީހުން ވަނީ މަގުތަކަށް ނުކުމެ، އެމީހުންގެ ހިތްހަމަ ނުޖެހުން ފާޅުކޮށްފައެވެ. މުޒާހަރާގެ ބައިވެރިން ވަނީ އަލިފާން ރޯކޮށް، ސަރުކާރު އިމާރާތްތަކާ ދިމާލަށް މިސްރާބު ޖަހާފައެވެ.
އީރާނުން ދިން މިސައިލް ހަމަލާތަކަށްފަހު، ނަތަންޔާހޫ އާއި ބެން ގްވީރް މަރުވި ކަމުގެ އަޑުތަކެއް އިސްރާއީލުގެ މީސް މީޑިއާގައި ވަރަށް ބާރަށް ފެތުރިގެން ދިޔައެވެ. މި އަޑުތައް ފެތުރިގެން ދިޔަ ވަގުތު، މިހާރުވެސް ނަތަންޔާހޫގެ ސަރުކާރަށް ނުރުހުންވެފައިވާ ގިނަ އަދަދެއްގެ އިސްރާއީލުގެ ރައްޔިތުން ވަނީ މަގުތަކަށް ނުކުމެފައެވެ. ޚާއްސަކޮށް ޓެލް އަވީވް، ޖެރޫސަލަމް އަދި ހައިފާ ފަދަ ބޮޑެތި ޝަހަރުތަކުގައި ހިންގި މުޒާހަރާތަކުގައި، ގިނަ ބަޔަކު ބައިވެރިވެފައިވެއެވެ. މި މުޒާހަރާތައް ފެށިފައިވަނީ ރޭގަނޑުގެ ވަގުތެއްގައި ކަމަށް ވާއިރު، އަލިފާން ރޯކޮށް، ޓަޔަރުތަކަށް އަލިފާން ޖަހައިގެން މުޒާހަރާގެ ބައިވެރިން ވަނީ އެމީހުންގެ ރުޅިވެރިކަން ފާޅުކޮށްފައެވެ. ބައެއް ރިޕޯޓްތައް ބުނާ ގޮތުގައި، މުޒާހަރާގެ ބައިވެރިންގެ ތެރޭގައި ނަތަންޔާހޫއަށް ވަރަށް ބޮޑަށް ދެކޮޅު ފަރާތްތައް ހިމެނެއެވެ.
ނަތަންޔާހޫ އާއި އޭނާގެ ސަރުކާރަށް ދެކޮޅު ވުމަކީ، އިސްރާއީލުގައި އާ ކަމެއް ނޫނެވެ. ހަމާސްއާ ދެކޮޅަށް ޣައްޒާގައި ހިންގަމުންދާ ހަނގުރާމަ އާއި، ހަނގުރާމަ ހިންގާ ގޮތުގެ ސަބަބުން، ނަތަންޔާހޫގެ ލީޑަރޝިޕާ މެދު ސުވާލު އުފައްދާ ގިނަ ބަޔަކު އުޅެއެވެ. މީގެ އިތުރުން، އިގްތިސާދީ ދަތިކަން، ސަރުކާރުގެ ކޮރަޕްޝަން އަދި ޝަރުޢީ ނިޒާމަށް ގެނައުމަށް މަސައްކަތް ކުރި ބަދަލުތަކާ ގުޅިގެންވެސް ނަތަންޔާހޫއަށް ވަރަށް ބޮޑަށް ފާޑުކިޔުންތައް އަމާޒުވެފައިވެއެވެ. މި މުޒާހަރާތަކަކީ ނަތަންޔާހޫގެ މަރަށް އުފާކުރުމުގެ ހަރަކާތްތަކެއް ކަމަށް ބުނެވޭ އަޑުތައް ފެތުރެމުންދާއިރު، މިއީ އެނާގެ ސިޔާސަތުތަކަށް އޮތް ނުރުހުންތެރިކަން ހާމަވާ ކަމެއް ކަމަށް ގިނަ ފަރާތްތަކުން ދެކެއެވެ.
މުޒާހަރާތައް ހޫނުވުމާ އެކު، އިސްރާއީލުގެ ސަލާމަތީ ބާރުތަކުން ވަނީ އެކި ސަރަހައްދުތަކަށް ގޮސް، ހަމަނުޖެހުން ހައްދުފަހަނަޅައިދިޔަ ތަންތަނުގައި އަމަން ބެނެހެއްޓުމަށް މަސައްކަތް ކޮށްފައެވެ. މުޒާހަރާގެ ބައިވެރިން ބައިބައި ކުރުމަށްޓަކައި ކަރުނަ ގޭސް ބޭނުންކޮށް، ފުލުހުންނާއި ސަލާމަތީ ބާރުތަކުން ވަނީ ގިނަ އަދަދެއްގެ މީހުން ހައްޔަރުކޮށްފައެވެ. ސަރުކާރުގެ ފަރާތުން އަދި މިކަމާ ގުޅިގެން ރަސްމީ ބަޔާނެއް ނެރެފައި ނުވި ނަމަވެސް، ރަސްމީ ނޫން މަސްދަރުތަކުން ބުނާ ގޮތުގައި، މިހާރުވެސް ނަތަންޔާހޫ އާއި ބެން ގްވީރް ދިރިހުރިކަމަށާއި، މިފަދަ އަޑުތައް ފެތުރުމަކީ ހަމައެކަނި ހަގީގަތާ ޚިލާފު ދޮގު މައުލޫމާތު ކަމަށެވެ. އެހެން ނަމަވެސް، މުޒާހަރާގެ ބައިވެރިން ވަނީ ސަރުކާރުގެ ވާހަކަތައް ގަބޫލުކުރަން ދެކޮޅު ހަދާފައެވެ.
މިފަދަ ހާދިސާތަކަކީ އިސްރާއީލުގެ ސިޔާސީ މަންޒަރުގައި ބޮޑެތި ބަދަލުތަކެއް ގެނައުން އެކަށީގެންވާ ކަމެކެވެ. ނަތަންޔާހޫގެ ސަރުކާރަށް އޮތް ނުރުހުންތެރިކަން އިތުރުވެ، ހަމަނުޖެހުންތައް އިތުރުވެގެން ދިޔުމަކީ ގައުމުގެ ހަމަޖެހުމަށް ނޭދެވޭ އަސަރުތަކެއް ކުރާނެ ކަމެކެވެ. ބޮޑެތި މުޒާހަރާތަކެއް ފެށުމަކީ، އިސްރާއީލުގެ ރައްޔިތުންގެ ހިތްތަކުގައި ސަރުކާރާ މެދު އޮތް އިތުބާރު ކުޑަވެފައިވާ މިންވަރު ހާމަވާ ކަމެކެވެ. މިކަމުގެ ސަބަބުން، ކުރިއަށް އޮތް ދުވަސްތަކުގައި އިސްރާއީލުގެ ސިޔާސީ މަސްރަހު އިތުރަށް ހަލަބޮލިވެގެން ދިޔުމަކީ އެކަށީގެންވާ ކަމެއް ކަމަށް ސިޔާސީ މާހިރުން ދެކެއެވެ.
