އީރާނުގެ އިންޓެލިޖެންސް މިނިސްޓަރު އަވަހާރަކޮށްލައިފި ކަމަށް އިޒްރޭލުން ބުނެފި: ހަނގުރާމަ އާ މަރުހަލާއަކަށް
އިޒްރޭލުގެ ޑިފެންސް މިނިސްޓަރު ކަޓްޒް މިއަދު ވިދާޅުވެފައިވަނީ، އީރާނުގެ އިންޓެލިޖެންސް މިނިސްޓަރު އިސްމާއިލް ޚާތިބު އަވަހާރަކޮށްލާފައިވާ ކަމަށެވެ. މި ހަބަރާއެކު މި ސަރަހައްދުގައި ހިނގަމުންދާ ހަނގުރާމަ އާ މަރުހަލާއަކަށް ބަދަލުވެފައިވާކަމަށް އޭނާ ވަނީ ފާހަގަކުރައްވާފައެވެ. އީރާނުގެ އިސް ހުރިހާ އޮފިޝަލުން މަރާލުމުގެ ހުއްދަ ދީފައިވާކަމަށް ވެސް ކަޓްޒް ވިދާޅުވެފައިވާއިރު، މިއީ މެދުއިރުމަތީގެ ސުލްހަ މަސަލަސްކަމަށް އޮތް ބިރެއް އިތުރުކުރާނެ ކަމެކެވެ.
ކަޓްޒްގެ މި ބަޔާނަކީ އިޒްރޭލާއި އީރާނާ ދެމެދު އޮތް ޒަމާންވީ ވާދަވެރިކަން އިތުރަށް ބޮޑުވެ، ހަނގުރާމައިގެ އާ އުސޫލެއް ފަށާފައިވާކަން ދައްކުވައިދޭ ކަމެކެވެ. އޭނާ ވިދާޅުވި ގޮތުގައި، މި ހަނގުރާމަ މިހާރު ވަނީ އާ މަރުހަލާއަކަށް ބަދަލުވެފައި ކަމަށާއި، މި ބަދަލާއެކު އީރާނުގެ ސަރުކާރުގެ އެންމެ އިސް ފަރާތްތަކަށް ސީދާ އަމާޒުކުރުމުގެ ހުއްދަ ލިބިފައިވާ ކަމަށެވެ.
އީރާނުގެ އިންޓެލިޖެންސް މިނިސްޓަރު އިސްމާއިލް ޚާތިބު އަވަހާރަކޮށްލާފައިވާ ކަމަށް އިޒްރޭލުން ބުނިނަމަވެސް، މި ހާދިސާގެ ތަފްސީލުތަކެއް އަދި ހާމަކޮށްފައެއް ނުވެއެވެ. މި ހަބަރުގެ ސައްހަކަން މިނިވަން ފަރާތަކުން ކަށަވަރުކުރެވިފައެއް ނުވެއެވެ. ނަމަވެސް، މިފަދަ ހަބަރެއް އިޒްރޭލުގެ އިސް މިނިސްޓަރެއް ދެއްވުމުން މުޅި ސަރަހައްދުގައި ވަނީ ބޮޑު ހަލަބޮލިކަމެއް އުފެދިފައެވެ. މި ހާދިސާ ހިނގާފައިވާ ގޮތާއި، އޭގެ ފަހަތުގައި ތިބި ފަރާތްތަކާ ބެހޭ ގޮތުން އިތުރު މައުލޫމާތު މިވަގުތު ލިބިފައެއް ނުވެއެވެ.
އިޒްރޭލުގެ މި ބަޔާނަށް ރައްދުދެމުން އީރާނުން ބުނެފައިވަނީ، އިސްވެރިން ޝަހީދުކޮށްލުމަކުން ހާސިލްވާނެ އެއްވެސް ކަމެއް ނޯންނާނެ ކަމަށެވެ. އަދި އީރާނުގެ އިސް މަގާމުތަކުގައި ތިބޭ ފަރާތްތަކުގެ ބަދަލުގައި އެތައް ބަޔަކު ތިބޭނެ ކަމަށް ވެސް އެގައުމުން ވަނީ ބުނެފައެވެ. މިހަނގުރާމަ ނިންމާނީ ﷲ ގެ އިރާދަފުޅާއި އެކު މުޅި ޔަހޫދީ ދައުލަތް އެއްކޮށް ނެތިކޮށްލާފަ ކަމަށް މީގެ ކުރިންވެސް އީރާނުންވަނީ ގަދަފަދަ އިންޒާރު ދީފައެވެ.
