އީރާނުގެ ވަރުގަދަ ރައްދު ހަމަލާތަކާއެކު އިސްރާއީލުގެ ކިބުރުވެރިކަން ފުނޑުފުނޑުވެއްޖެ
މެދުއިރުމަތީގެ ސިޔާސީ މައިދާނަށް ބޮޑެތި ބަދަލުތަކެއް އަންނަ މަންޒަރު މިއަދު ފެނިގެން ހިނގައްޖެއެވެ. އިސްރާއީލުގެ ކިބުރުވެރިކަމާއި، މުސްލިމް އުންމަތުގެ ޤަދަރު ކެނޑުމަށް އެ ޤައުމުން ހިންގާ ހަރަކާތްތަކަށް ރައްދު ދިނުމުގެ ގޮތުން، އީރާނުން ދިން ވަރުގަދަ ހަމަލާތަކަކީ، ސަރަހައްދުގެ ހަމަޖެހުން ނަގާލާނެ ބޮޑު ކަމެއް ކަމަށް ގިނަ ބަޔަކު ދެކެއެވެ. އީރާނުން ފޮނުވާލި އެތައް ސަތޭކަ ޑްރޯނާއި މިސައިލުގެ ސަބަބުން، އިސްރާއީލުގެ ދިފާޢީ ނިޒާމަށް ބޮޑު ގޮންޖެހުމަކާ ކުރިމަތިލާން ޖެހުނު ކަމަށް ރިޕޯޓްތައް ބުނެއެވެ. މި ހަމަލާތަކާއެކު އިސްރާއީލުގެ ކިބުރުވެރިކަން ފުނޑުފުނޑުވެ، އެ ޤައުމުގެ އެތެރޭގައި ބިރުވެރިކަން ވަދެފައިވާ ކަމަށް ބެލެވެއެވެ.
އީރާނުން އިސްރާއީލަށް ދިން ހަމަލާތަކުގައި ބޭނުންކޮށްފައި ވަނީ އެކި ބާވަތްތަކުގެ ޑްރޯނާއި، ކްރޫޒް މިސައިލާއި، ބެލިސްޓިކް މިސައިލެވެ. މި ހަމަލާތައް ފޮނުވާލާފައި ވަނީ އިރާނުގެ ސިފައިންނާއި، އެ ޤައުމުން ތާއީދުކުރާ ސަރަހައްދުގެ ޖަމާޢަތްތަކުންނެވެ. އިސްރާއީލުގެ ވައިގެ ސަރަހައްދަށް މި ހަމަލާތައް ވަނުމުގެ ކުރިން، ސީރިޔާ އާއި އިރާޤުގެ ވައިގެ ސަރަހައްދުތައް ހުރަސްކޮށް އައުމުން، ދަތުރުކުރަން ޖެހުނު ދުރުމިނުގެ ސަބަބުން އިސްރާއީލަށް ދިފާޢުވުމަށް ކޮންމެވެސް ވަރެއްގެ ފުރުސަތެއް ލިބުނެވެ. ނަމަވެސް، މި ހަމަލާތައް ފޮނުވާލާފައިވާ އަދަދާއި ބާވަތްތަކުގެ ސަބަބުން، އިސްރާއީލުގެ ދިފާޢީ ނިޒާމަށް ބޮޑު ޕްރެޝަރެއް ކުރިމަތިވި ކަމަށް އެނގެއެވެ. މި ހަމަލާތަކުގެ އަސަރު ކެޑިގެންދިޔަ ކަމަށް އިސްރާއީލުން ބުނި ނަމަވެސް، ބޮޑެތި ގެއްލުންތަކެއް ލިބި މުޅި އިޒްރާއީލްގެ އިގްތިސޯދު އިނދަޖެހޭވަރުގެ ގެއްލުންތައް ލިބިފައިވާކަމަށް މީޑިއާތަކުން ރިޕޯޓްކޮށްފައިވެއެވެ.
އީރާނުން ދިން މި ހަމަލާތަކުގެ ސަބަބުން އިސްރާއީލުގެ އެތެރޭގައި ބިރުވެރިކަމާއި ނުތަނަވަސްކަން އުފެދިފައިވާކަން ފާހަގަކުރެވެއެވެ. ކުރިން ޤަބޫލުކުރެވިފައި އޮތީ އިސްރާއީލުގެ ދިފާޢީ ބާރު ވަރަށް ވަރުގަދަ ކަމަށާއި، އެ ޤައުމަށް ނުރައްކަލެއް ކުރިމަތިނުވާނެ ކަމަށެވެ. ނަމަވެސް، އީރާނުގެ މި ހަމަލާތަކުން އެކަން ބަދަލުކޮށްލާފައިވާ ކަމަށް ބެލެވެއެވެ. އިސްރާއީލުގެ ކިބުރުވެރިކަމާއި، އަބަދުވެސް އަމިއްލައަށް ރައްކާތެރިކަން ޤާއިމުކުރެވޭނެކަމުގެ ދަޢުވާ މިއަދު މިވަނީ ފުނޑުފުނޑުވެފައެވެ. އެ ޤައުމުގެ ރައްޔިތުންނަށް ދުވަހުގެ ބޮޑު ބައެއް ބަންކަރުތަކުގައި ހޭދަކުރަން ޖެހުމުން، އެތެރޭގެ ހާލަތު ވަނީ ގޯސްވެފައެވެ. އީރާނުން ފޮނުވާލި ކޮންމެ މިސައިލަކާއި ޑްރޯން ހަމަލާއަކުން، ޔަހޫދީންގެ ހިތްތަކަށް ބިރުވެރިކަން ވަދެ، އެކަމުގެ ނަތީޖާ އިންތިހާއަށް ދިގުދެމިގެން ހިނގައިދާނެ ކަމުގެ ބިރު ވަނީ އިތުރުވެފައެވެ.
މި ހަމަލާތަކަކީ ސީދާ އީރާނުން އިސްރާއީލަށް ދިން ހަމަލާތަކެއް ނަމަވެސް، މުސްލިމް އުންމަތުގެ ހިތްތަކަށް އުފާވެރިކަމެއް ގެނެސްދީފައިވާ ކަމަށް ބެލެވެއެވެ. މުސްލިމް ޤައުމުތަކުގެ ބާރާއި އިއްޒަތް ދައްކާލި ތާރީޚީ ވަގުތެއްގެ ގޮތުގައި މި ހަމަލާތައް ގިނަ ބަޔަކު ސިފަކުރެއެވެ. ޚާއްސަކޮށް ފަލަސްތީނުގެ މުސްލިމުންނަށް އިސްރާއީލުން ކުރާ އަނިޔާތަކަށް ރައްދު ދިނުމަށް އެހެން ޤައުމުތަކުން ފަސްޖެހިފައި ތިބިއިރު، އީރާނުން ނެގި މި ފިޔަވަޅަކީ މުސްލިމުންގެ ހިތްވަރު އާލާކޮށްދިން ކަމެއް ކަމަށް ދެކެވެއެވެ. މިއީ އިސްލާމީ އުންމަތުގެ މުޖާހިދުންގެ ހިތްވަރާއި ޢަޒުމް ދައްކާލި ވަގުތެއް ކަމަށާއި، މިފަދަ ހިތްވަރަކުން ނަޞްރު ލިބޭނެ ކަމުގެ އުއްމީދު އިތުރުވެގެން ދިޔަ ކަމަށް ގިނަ ބަޔަކު ބުނެއެވެ.
އީރާނުން ދިން ހަމަލާތަކަކީ އިސްލާމީ އުންމަތުގެ މުޖާހިދުންނަށް ލިބުނު ނަޞްރެއްގެ ގޮތުގައި ސިފަކުރުން ގިނަ ބަޔަކު ޤަބޫލުކުރެއެވެ. އިސްރާއީލުގެ ލަޝްކަރުގެ ބާރާއި، އެ ޤައުމުން މުސްލިމް ޤައުމުތަކަށް ކުރާ ދަޢުވާތައް ބަލިކޮށްލުމަށް އީރާނުން ދިން މި ހަމަލާތަކަކީ، އެންމެން ހައިރާންކޮށްލި ކަމެކެވެ. މިއީ މުސްލިމުންނަށް ލިބުނު ވަރުގަދަ ނަޞްރެއް ކަމުގައި ދެކޭއިރު، އިސްލާމީ ޝަޢާއިރުތަކަށް އިހުތިރާމްކޮށް، މުސްލިމުންގެ ޤަދަރު އުފުލައިލުމަށް ހިތްވަރުގަދަ ސިފައިންނަށް ނަޞްރުދެއްވުން އެދި ގޮވެމުންދާ އަޑުތައް މިވަނީ އިތުރުވެފައެވެ.
އީރާނުން އިސްރާއީލަށް ދިން މި ވަރުގަދަ ރައްދު ހަމަލާތަކާއެކު މެދުއިރުމަތީގެ ސިޔާސީ މައިދާނުގައި އައު ބާރެއް އުފެދިފައިވާކަން ފާހަގަކުރެވެއެވެ. އިސްރާއީލުގެ ކިބުރުވެރިކަމާއި، ސަރަހައްދުގައި އެ ޤައުމުގެ ނުފޫޒު މިހާރަށްވުރެ ބޮޑަށް ހީނަރުވެގެން ދިޔުމުގެ ފުރުސަތު ބޮޑެވެ. މި ހަމަލާތަކުން ސާބިތުކޮށްދީފައިވަނީ، މުސްލިމް އުންމަތަށް ކުރާ އަނިޔާތަކަށް ރައްދު ދިނުމުގެ ބާރު ހުރިކަމާއި، އިސްރާއީލުގެ ދިފާޢީ ނިޒާމަކީ ބަލިކުރެވޭނެ ނިޒާމެއް ކަމެވެ. މި ހަމަލާތަކުގެ ދިގުދެމޭ ނަތީޖާއެއްގެ ގޮތުން، ސަރަހައްދުގެ ސަލާމަތީ ކަންކަމަށް އާ ބަދަލުތަކެއް އަތުވެދާނެ ކަމަށް މުޙައްލިލުން ލަފާކުރެއެވެ. މިއީ މުސްލިމުންގެ ބާރާއި އިއްޒަތް ދައްކާލި ތާރީޚީ ވަގުތެއްގެ ގޮތުގައި އަބަދުވެސް ހަނދާންކުރެވޭނެއެވެ.
