އީރާނުން އިޒްރޭލާއި އެމެރިކާއަށް ވަރުގަދަ އިންޒާރެއް: 'މުޅި ސަރަހައްދު ނަރަކައަކަށް ހަދާލާނަން'
އީރާނުން އެމެރިކާއާއި އިޒްރޭލަށް ވަރުގަދަ އަދި ނުރައްކާތެރި އިންޒާރެއް ދީފިއެވެ. އީރާނުގެ އަސްކަރިއްޔާއިން ބުނެފައިވަނީ، މި ސަރަހައްދުގައި ހިނގަމުންދާ ހަމަނުޖެހުންތައް އިތުރަށް ގޯސްވެ، އީރާނުގެ މިނިވަންކަމާއި ސަރަހައްދީ ހަމަޖެހުމަށް އުދުވާނީ ހަމަލާއެއް ދީފިނަމަ، މުޅި މެދުއިރުމަތީ ސަރަހައްދަކީ އެމެރިކާއާއި އިޒްރޭލުގެ ސިފައިންނަށް "ނަރަކައަކަށް" ވެގެންދާނެ ކަމަށެވެ. މި އިންޒާރު އައިސްފައިމިވަނީ، ދުނިޔޭގެ ތެލުގެ ބޮޑު ބައެއް އުފުލާ ހޯރްމޫޒް ކަނޑުއޮޅީގެ ސަރަހައްދުގައި އީރާނުން ހަރަކާތްތައް ވަރުގަދަ ކުރުމާއި ގުޅިގެން ބައިނަލްއަގުވާމީ މާކެޓްތަކަށް އޭގެ ނޭދެވޭ އަސަރުކުރަމުންދާ ނާޒުކު ދަނޑިވަޅެއްގައެވެ.
އީރާނުގެ އަސްކަރީ މަރުކަޒެއް ކަމަށްވާ ޚާތަމުލް އަންބިޔާ ސެންޓްރަލް ހެޑްކުއާޓާސްގައި ބޭއްވުނު ނޫސްވެރިންގެ ބައްދަލުވުމެއްގައި، އީރާނުގެ ރަސްމީ ތަރުޖަމާނު އިބްރާހީމް ޒުލްފިގާރީ ވިދާޅުވީ، އީރާނާ ދެކޮޅަށް ހިންގާ އެއްވެސް އުދުވާނީ އަމަލަކަށް ދޭ ރައްދު މިފަހަރު ކުޑަ ނުވާނެ ކަމަށެވެ. އޭނާ ހާމަކުރެއްވި ގޮތުގައި، މިފަހަރުގެ ރައްދުވާނީ މުޅި ސަރަހައްދަށް ފެތުރިގެންދާ ފަދަ ވަރުގަދަ އަދި ހަލާކުކުރަނިވި ހަމަލާތަކެއް ކަމަށާއި، އީރާނު ބަލިކުރުމުގެ ހުވަފެން ދެކޭ ފަރާތްތައް ތިބީ "ނުރައްކާތެރި ދަލެއްގައި" ޖެހިފައި ކަމަށެވެ.
މި ބަސްފުޅުތަކުން ދޭހަވަނީ، އީރާނުގެ ދިފާއީ އަދި ހަމަލާދިނުމުގެ ގާބިލުކަން މަތިވެފައިވާ ކަމާއި، އެ ގައުމުގެ ސަރަހައްދީ ސަލާމަތަށް އޮތް ކޮންމެ ބިރަކަށްވެސް އީރާނުން އަޅާނެ ފިޔަވަޅުތައް ހަރުކަށިވާނެ ކަމެވެ. ޒުލްފިގާރީ އިތުރަށް ވިދާޅުވީ، އީރާނުގެ ސިފައިންނަކީ ހަނގުރާމައަށް ތައްޔާރުވެފައިވާ ވަރުގަދަ ސިފައިންތަކެއް ކަމަށާއި، ކޮންމެ ވަގުތެއްގައިވެސް ދުޝްމަނުންނަށް ރައްދުދިނުމަށް ތިބީ ފުރިހަމައަށް ތައްޔާރަށް ކަމަށެވެ.
