ރަމަޟާން ނިމުމާއެކު އީރާނުން ހަނގުރާމައިގެ ނުރައްކާތެރި އިންޒާރު ދީފި: ދުޝްމަނުންނަށް ވޭނާއި ބިރުވެރިކަން
މުސްލިމުންގެ ބަރަކާތްތެރި މަސް، ރަމަޟާން މަސް ނިމިގެން ދިއުމާއެކު، އީރާނުގެ އަސްކަރިއްޔާއިން ވަނީ އެގައުމުގެ ދުޝްމަނުންނަށް އަމާޒުކޮށް ހަރުކަށި އިންޒާރެއް ދީފައެވެ. ރަމަޟާން މަހުގެ ތެރޭގައި ހަނގުރާމަކުރުން މަނާކަމަށް ވުމުން، ބައެއް ބާވަތުގެ ހަތިޔާރާއި އަސްކަރީ ވަސީލަތްތައް ބޭނުންކުރުން ފަސްކުރި ކަމަށް ބުނެ އީރާނުން، މިހާރު ރަމަޟާން މަސް ނިމިފައިވާތީ، ކުރިއަށް އޮތްތަނުގައި ދެވޭ ހަމަލާތައް ޔަހޫދީންނާއި އެގައުމުގެ ދުޝްމަނުންނަށް ވޭނާއި ބިރުވެރިކަން ގެނެސްދޭނެ ކަމަށް ބުނެފައިވެއެވެ. މި އިންޒާރުގައި، އީރާނުގެ އަސްކަރީ ބާރުގެ ހައިރާންކުރަނިވި މަންޒަރުތަކެއް ފެނިގެންދާނެކަމަށް ވެސް ވަނީ ފާހަގަކޮށްފައެވެ.
އީރާނުގެ އަސްކަރިއްޔާއިން ބުނި ގޮތުގައި، އިސްލާމީ އުއްމަތަށް ބަރަކާތްތެރި ރަމަޟާން މަހަކީ ހަނގުރާމަކުރުން މަނާކުރާ މަހެކެވެ. މިގޮތުން، ރަމަޟާން މަހުގެ މާތްކަމާއި އިހުތިރާމް ހިފެހެއްޓުމުގެ ގޮތުން، އެމުއްދަތުގެ ތެރޭގައި ބައެއް ބާވަތުގެ ހަތިޔާރު ބޭނުންކުރުމުން ދުރުހެލިވިއެވެ. އަދި އަސްކަރީ ބައެއް ވަސީލަތްތައް ބޭނުންކުރުން ވެސް ވަގުތީ ގޮތުން މަޑުޖައްސާލެވިފައިވާ ކަމަށް އެގައުމުން ވަނީ ހާމަކޮށްފައެވެ. މިއީ ސީދާ ކޮން ބާވަތެއްގެ ހަތިޔާރެއް ނުވަތަ ވަސީލަތެއް ކަމެއް އީރާނުން ވަނީ ހާމަކޮށްފައެއް ނުވެއެވެ. ނަމަވެސް މިފަދަ ބަޔާނަކީ ސަރަހައްދީ ހަމަނުޖެހުންތައް ހޫނުވެފައިވާ ދަނޑިވަޅެއްގައި ސަމާލުކަންދޭންޖެހޭ ކަމެކެވެ.
ރަމަޟާން މަސް ނިމުމާއެކު، އީރާނުގެ އަސްކަރިއްޔާއިން ނެރުނު ބަޔާނެއްގައި، ކުރިއަށް އޮތް ތަނުގައި އެގައުމުގެ އަސްކަރީ ގާބިލުކަން ފެނިގެންދާނެ ކަމަށް ވަނީ ހާމަކޮށްފައެވެ. އެބަޔާނުގައި ބުނެފައިވަނީ، މިކަމުގެ ސަބަބުން އީރާނުގެ ދުޝްމަނުންނާއި، އެގައުމާ އެކުވެރި ގައުމުތަކަށްވެސް ބޮޑު ހައިރާންކަމެއް ލިބިގެންދާނެ ކަމަށެވެ. "ރަމަޟާން މަސް ނިމުމާއެކު، ދުޝްމަނުންނާއި އެމީހުންނަށް ބައިއަތު ހިފާ އެމީހުންގެ އެކުވެރިންވެސް ބިރުގަންނަ ފަދަ ނުރައްކާތެރި ކަންތައްތަކެއް ކުރިޔަށް އޮތް ދުވަސްތަކުގައި ފެނިގެންދާނެ. އެބައިމީހުން އެކަމާ ރޮއެ ހިތާމަކުރާނެ،" އީރާނުގެ އަސްކަރިއްޔާގެ ބަޔާނުގައި ވެއެވެ. މި ބަޔާނުގައި "ޔަހޫދީން" މިބަސް ސީދާ ބޭނުންކޮށްފައި ނެތް ނަމަވެސް، އީރާނުގެ ރަސްމީ މީޑިއާއިން މިފަދަ އިންޒާރުތައް ދެނީ އިސްރާއީލަށް އަމާޒުކޮށްކަން ފާހަގަކުރެވެއެވެ.
އީރާނުގެ އަސްކަރިއްޔާއިން ރަމަޟާން މަހަށްފަހު ދިން މި އިންޒާރަކީ، މެދުއިރުމަތީގެ ސަރަހައްދުގައި ކުރިއަށް އޮތްތަނުގައި ހަމަނުޖެހުންތައް އިތުރުވެދާނެ ކަމުގެ ސިގްނަލެކެވެ. ރަމަޟާން މަހުގެ ތެރޭގައި ހަމަލާތައް މަޑުޖައްސާލި ކަމަށް ބުނެފައިވާއިރު، ދުޝްމަނުންނަށް "ވޭނާއި ބިރުވެރިކަން" ގެނެސްދޭނެ ކަމަށް ދިން އިންޒާރުން ދައްކުވައިދެނީ، އީރާނުގެ އަސްކަރީ ސިޔާސަތުގައި ހަރުކަށިކަން އިތުރުވެފައިވާ މަންޒަރެކެވެ.
