އީރާނަށް ޙަމަލާ ދިނުމަށް ރޭވި މޮސާޑް-ސީއައިއޭއާ ގުޅުންހުރި 250 އެޖެންޓުން ހައްޔަރުކޮށްފި
އީރާނުގެ ސަލާމަތީ ބާރުތަކުން، ޔަހޫދީ ދައުލަތުގެ ޖާސޫސީ އިދާރާ މޮސާޑާއި އެމެރިކާގެ ސެންޓްރަލް އިންޓެލިޖެންސް އެޖެންސީ (ސީއައިއޭ) އާ ގުޅުންހުރި ކަމަށް ތުހުމަތު ކުރެވޭ 250 އަށް ވުރެ ގިނަ މީހުން ހައްޔަރުކޮށްފައިވާ ކަމަށް އެގައުމުގެ މީޑިއާ ރިޕޯޓުތަކުން ބުނެފިއެވެ. މިމީހުން ހައްޔަރުކޮށްފައިވަނީ އީރާނުގެ ސަލާމަތަށް ނުރައްކާވާ ފަދަ ޙަރަކާތްތަކެއް ހިންގުމަށް، ޚާއްސަކޮށް ޙަމަލާ ދިނުމަށް ޖާސޫސްކޮށް، މަޢުލޫމާތު އެއްކުރަމުން ދަނިކޮށް ކަމަށް އީރާނުގެ އިންޓެލިޖެންސް މިނިސްޓްރީން ވަނީ ހާމަކޮށްފައެވެ.
މި ބޮޑު އޮޕަރޭޝަނަކީ އީރާނުގެ ސަލާމަތީ ބާރުތަކުގެ ފުޅާ ދާއިރާއެއްގެ ބަޔަކު ގުޅިގެން ހިންގި އޮޕަރޭޝަނެކެވެ. އީރާނުގެ ރަސްމީ މީޑިއާގައި ބުނެފައިވާ ގޮތުގައި މި މީހުންނަކީ ގިނަ ދުވަސްތަކެއްގެ ތެރޭގައި ސިއްރުން އީރާނުގައި ޙަރަކާތްތެރިވަމުން ދިޔަ ބައެކެވެ. އެމީހުން ވަނީ އީރާނުގެ އަސްކަރީ، ނިއުކްލިއަރ އަދި އިޤްތިޞާދީ މުހިންމު ސަރަޙައްދުތަކުން މަޢުލޫމާތު އެއްކޮށް، ބޭރުގެ ފަރާތްތަކަށް ފޮނުވާފައިވާ ކަމަށް ތުހުމަތު ކުރެވެއެވެ. މީގެ އިތުރުން، އީރާނުގެ ސަލާމަތީ ބާރުތަކުން ބުނާ ގޮތުގައި، މިމީހުންގެ ތެރޭގައި އީރާނުގެ ސިސްޓަމްތަކަށް ސައިބަރ ހަމަލާ ދިނުމަށާއި، ހަލަބޮލި ޙަރަކާތްތައް ހިންގުމަށް މަސައްކަތްކުރި ފަރާތްތައް ވެސް ހިމެނެއެވެ.
އީރާނުން މިހާ ގިނަ އަދަދެއްގެ ޖާސޫސުން ހައްޔަރުކުރިކަމަށް ތުހުމަތުކުރެވޭ މައްސަލައަކީ، އެގައުމުގެ ސަލާމަތާއި ރައްކާތެރިކަމަށް އޮތް ބޮޑު ނުރައްކަލެއްގެ ހެކި ކަމަށް ސިޔާސީ މާހިރުން ދެކެއެވެ. އީރާނުން ބުނާ ގޮތުގައި، މިމީހުންނަކީ މޮސާޑް އަދި ސީއައިއޭއިން ފައިސާ ދީގެން ޙަރަކާތްތެރި ކުރުވާ، އެކި ގޮތްގޮތުން ތަމްރީނު ދީފައިވާ ބައެކެވެ. މިޖާސޫސުންގެ ތެރެއިން ގިނަ ބަޔަކު ހައްޔަރުކޮށްފައިވަނީ އީރާނުގެ އެކި ސަރަޙައްދުތަކުންނެވެ. އޭގެ ތެރޭގައި ޚާއްސަ ގޮތެއްގައި މުހިންމު އިސްތިރާތީ ސަރަޙައްދުތަކާއި ސިނާއީ މަސައްކަތްތައް ކުރާ ސަރަޙައްދުތައް ހިމެނެއެވެ.
މި ހައްޔަރުކުރުންތަކާ ގުޅިގެން އީރާނުގެ އިންޓެލިޖެންސް މިނިސްޓަރު ވަނީ ބޭރުގެ ޖާސޫސީ އިދާރާތަކަށް ހަރުކަށި އިންޒާރެއް ދެއްވާފައެވެ. އެމަނިކުފާނު ވިދާޅުވީ އީރާނުގެ ސަލާމަތަށް ނުރައްކާ ކުރާ ކޮންމެ ފަރާތަކާ ދެކޮޅަށް ހަރުކަށި ފިޔަވަޅު އަޅާނެ ކަމަށާއި، އީރާނަކީ އެފަދަ ޙަރަކާތްތަކަށް ފުރުސަތު ދޭނެ ގައުމެއް ނޫން ކަމަށެވެ. މީގެ އިތުރުން، މި އޮޕަރޭޝަނުގެ ތެރެއިން ގިނަ އަދަދެއްގެ މޮބައިލް ފޯނާއި، ކޮމްޕިއުޓަރާއި، ޖާސޫސީ ކަންކަމަށް ބޭނުންކުރާ ސާމާނު ހޯދިފައިވާ ކަމަށް ވެސް ރިޕޯޓުތައް ބުނެއެވެ.
އީރާނުން ބޭރުގެ ޖާސޫސީ އިދާރާތަކާ ގުޅުންހުރި ކަމަށް ތުހުމަތުކުރެވޭ މީހުން ހައްޔަރުކުރި މިއީ ފުރަތަމަ ފަހަރެއް ނޫނެވެ. މީގެ ކުރިން ވެސް އެގައުމުން ވަނީ މޮސާޑާއި ސީއައިއޭއާ ގުޅުންހުރި ކަމަށް ބުނާ އެތައް ބަޔަކު ހައްޔަރުކޮށް، ބައެއް މީހުންނަށް މަރުގެ ޙުކުމް ވެސް ކޮށްފައެވެ. މިފަދަ ހަރަކާތްތައް އީރާނުން ސިފަކުރަނީ، އެގައުމުގެ ސިޔާދަތީ މިނިވަންކަމަށް އޮތް ބޮޑު ނުރައްކަލެއްގެ ގޮތުގައެވެ. ޚާއްސަކޮށް، ޔަހޫދީ ދައުލަތާއި އެމެރިކާއާ އީރާނާ ދެމެދު އޮންނަ ގުޅުން ހީނަރުވެ، ޚިލާފުތައް ބޮޑުވެފައިވާ މި ދަނޑިވަޅުގައި، މިފަދަ ހައްޔަރުކުރުންތަކަކީ ސަރަޙައްދީ ހަމަޖެހުމަށް އިތުރު ނުރައްކަލެއް ކަމަށް ބެލެވެއެވެ.
އީރާނުގެ އިންޓެލިޖެންސް މިނިސްޓްރީން ބުނާ ގޮތުގައި، މި އޮޕަރޭޝަނަކީ އީރާނުގެ އެތެރޭގެ ސަލާމަތް ކަށަވަރުކުރުމަށް ކުރިއަށް ގެންދެވުނު ކާމިޔާބު މަސައްކަތެކެވެ. އަދި މިފަދަ ޖާސޫސީ ޝިކާރަތަކުން އީރާނަށް އެޅޭ ނުރައްކަލުން ރައްކާތެރިވުމަށްޓަކައި، އިތުރު ފިޔަވަޅުތައް އަޅަމުން ގެންދާނެ ކަމަށް ވެސް އެފަރާތުން ވަނީ ހާމަކޮށްފައެވެ.
އީރާނުން މޮސާޑް އަދި ސީއައިއޭއާ ގުޅުންހުރި ކަމަށް ތުހުމަތުކުރެވޭ 250 މީހުން ހައްޔަރުކުރުމަކީ، އެގައުމުގެ ސަލާމަތީ ބާރުތަކުގެ ޤާބިލުކަން ދައްކުވައިދޭ ކަމެކެވެ. މިއީ ސަރަޙައްދުގައި ހަމަނުޖެހުންތައް އިތުރުވަމުންދާ ދަނޑިވަޅެއްގައި، ބޭރުގެ ޖާސޫސީ ޙަރަކާތްތަކާ ދެކޮޅަށް އީރާނުން އަޅާ ހަރުކަށި ފިޔަވަޅެއްގެ ގޮތުގައި ފެނިގެންދެއެވެ.
