ނަޝީދަށް އާންމު މެންބަރުން މާފަށް އެދެން ނުޖެހޭ: މީކާއިލް
އެމްޑީޕީގެ ޗެއާޕާސަން ކަމަށް ވާދަކުރައްވާ މީކާއިލް އަހުމަދު ނަސީމް މިއަދު ވިދާޅުވެފައިވަނީ، އެއްވެސް ލީޑަރެއްގެ ކިބައިން އެ ޕާޓީގެ އާންމު މެންބަރުން މާފަށް އެދެން ނުޖެހޭ ކަމަށެވެ. އެމްޑީޕީގެ ލީޑަރުންނަކީ އާންމު މެންބަރުންގެ ބުރަ މަސައްކަތާއި ގުރުބާނީގެ ސަބަބުން ލީޑަރުންނަށް ވެފައިވާ ބަޔަކު ކަމަށް އޭނާ ފާހަގަކުރެއްވިއެވެ. މިފަދައިން މީކާއިލް ވިދާޅުވެފައިވަނީ، ކުރީގެ ރައީސް މުހައްމަދު ނަޝީދު، ރިޔާސީ އިންތިހާބުގެ ކުރިން އެމްޑީޕީ ދޫކޮށްލެއްވުމަށް މާފަށް އެދިވަޑައިގެންނެވުމަށްފަހު، އެމްޑީޕީގެ މެންބަރުންވެސް އެމަނިކުފާނުގެ އަރިހުން މާފަށް އެދެން ޖެހޭ ކަމަށް ވިދާޅުވި ހާދިސާއާ ގުޅިގެންނެވެ. މީކާއިލްގެ މި ބަސްފުޅުތަކަކީ އެމްޑީޕީގެ އެތެރޭގެ ސިޔާސީ މަޝްރަހު އިތުރަށް ހޫނުވެފައިވާ ދަނޑިވަޅެއްގައި ނިކުތް ބަސްފުޅުތަކެކެވެ.
ނަޝީދުގެ ދުވާފަރު ދަތުރުގައި ދެއްވި ޖަވާބު
ފާއިތުވި ދުވަސްތަކުގެ ތެރޭގައި، ރިޔާސީ އިންތިހާބާ ދިމާކޮށް އެމްޑީޕީ ދޫކޮށްދިޔުމަކީ މާފަށް އެދެން ޖެހޭ ކަމަށް ބުނެ، އާންމު މެންބަރަކު ވަނީ ރ. ދުވާފަރުގައި ކުރީގެ ރައީސް މުހައްމަދު ނަޝީދާ ސުވާލުކޮށްފައެވެ. އެ ސުވާލަށް ޖަވާބު ދެއްވަމުން ރައީސް ނަޝީދު ވަނީ އެކަމަށްޓަކައި އާންމު މެންބަރުންގެ އަރިހުން މާފަށް އެދިވަޑައިގެންފައެވެ. ނަމަވެސް، އެމަނިކުފާނު ވަނީ އެމްޑީޕީގެ މެންބަރުން ވެސް އެމަނިކުފާނުގެ އަރިހުން މާފަށް އެދެން ޖެހޭ ކަމަށް ވިދާޅުވެފައެވެ. މި ބަސްފުޅުތަކާ ގުޅިގެން ޕާޓީގެ އާންމު މެންބަރުންގެ މެދުގައި ވަނީ ގިނަ ބަހުސްތަކެއް އުފެދިފައެވެ.
މީކާއިލްގެ ރައްދު
ރައީސް ނަޝީދު އެފަދައިން ވިދާޅުވެފައިވާތީ، އެމްޑީޕީގެ ޗެއާޕާސަން ކަމަށް ވާދަކުރައްވާ މީކާއިލް އަހުމަދު ނަސީމް ހއ. ކެލެއަށް ވަޑައިގަތުމުން އެ ރަށުގެ އެމްޑީޕީގެ އާންމު މެންބަރަކު ވަނީ އެކަމާ ގުޅޭ ގޮތުން ސުވާލު އުފައްދައިފައެވެ. އެ ސުވާލަށް ޖަވާބު ދެއްވަމުން މީކާއިލް ވިދާޅުވީ، ރައީސް ނަޝީދު ނޫނީ އެހެން އެއްވެސް މީހެއްގެ އަރިހުން އެމްޑީޕީގެ އާންމު މެންބަރުން މާފަށް އެދެން ޖެހޭ ކަމަށް އޭނާ ގަބޫލުފުޅު ނުކުރައްވާ ކަމަށެވެ. އެމްޑީޕީގެ އާންމު މެންބަރުންނަށް އޮތީ ޕާޓީގެ އަސާސްތަކާއި އުސޫލުތަކަށް ލޯޔަލްވުން ކަމަށް އޭނާ ފާހަގަކުރެއްވިއެވެ.
މީކާއިލް އިތުރަށް ވިދާޅުވީ، ޕާޓީގެ ލީޑަރުންނަކީ އެ ބޭފުޅުންނަށް ހެދީ އެމްޑީޕީގެ އާންމު މެންބަރުން ކަމަށެވެ.
