އުރުދުޣާން: "ހޮލޮކޯސްޓަށް ފަހު އިސްރާއީލަށް ކުރިމަތިވި އެންމެ ބޮޑު ކާރިސާއަކީ ނަތަންޔާހޫ"
ތުރުކީވިލާތުގެ ރައީސް ރަޖަބު ތައްޔިބު އުރުދުޣާން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ވަރަށް ބޮޑަށް ފާޑުވިދާޅުވެ، އެމަނިކުފާނަކީ ހޮލޮކޯސްޓަށް ފަހު އިސްރާއީލަށް ކުރިމަތިވި އެންމެ ބޮޑު ކާރިސާ ކަމަށް ވިދާޅުވެއްޖެއެވެ. މިބަސްފުޅުތަކާއެކު، އުރުދުޣާން ވަނީ އިސްރާއީލުގެ އާންމު ރައްޔިތުންގެ ހިޔާލުތަކަށް އިޝާރާތް ކުރައްވައިފައެވެ.
ރައީސް އުރުދުޣާން މި ބަސްފުޅުތައް ވިދާޅުވެފައިވަނީ، އިސްރާއީލުގެ އާންމު ރައްޔިތުން ކޮންމެ ރެއަކު ބޮންއަޅާ ހިޔާވަހިތަކުގައި ވަގުތު ހޭދަކުރަންޖެހިފައިވާ ކަމަށާއި، އެމީހުންވެސް މިއަދު ފާޅުގައި ބުނަމުންދަނީ، "ހޮލޮކޯސްޓް" އަށް ފަހު އެ ގައުމަށް ކުރިމަތިވި އެންމެ ބޮޑު މުސީބާތަކީ ނަތަންޔާހޫ ކަމަށެވެ. އެމަނިކުފާނު މި ބަސްފުޅުތަކުން ދައްކުވައިދެއްވާފައިވަނީ، ނަތަންޔާހޫގެ ސިޔާސަތުތަކާމެދު އިސްރާއީލުގެ އާންމު ރައްޔިތުންގެ މެދުގައިވެސް ހިތްހަމަނުޖެހުން އުފެދިފައިވާ މިންވަރެވެ. މިފަދަ ބަހެއް ބޭނުންކުރެއްވުމަކީ، ހަމައެކަނި ނަތަންޔާހޫއަށް އަމާޒުކުރެއްވި ބަހެއް ނޫންކަމަށް ބައެއް ސިޔާސީ މާހިރުން ދެކެއެވެ. އެހެންނަމަވެސް، އިސްރާއީލުގެ ސިޔާސަތުތައް ދައްކުވައިދޭ ހަރުކަށިކަމަށް ދެއްވި ރައްދެއް ކަމަށްވެސް ވެދާނެއެވެ.
ރައީސް އުރުދުޣާން އަކީ ފަލަސްތީނު ދައުލަތަށް ވަރަށް ބޮޑަށް ތާއީދުކުރައްވާ ބޭފުޅެކެވެ. އެމަނިކުފާނު ވަނީ މީގެކުރިންވެސް އިސްރާއީލުގެ ސިޔާސަތުތަކަށް ތަކުރާރުކޮށް ފާޑުވިދާޅުވެފައެވެ. ޔޫ.އެން. ޖެނެރަލް އެސެމްބްލީ އާއި އެހެނިހެން ބައިނަލްއަގްވާމީ މަޖިލިސްތަކުގައި ވެސް އެމަނިކުފާނު ވަނީ ފަލަސްތީނަށް އަނިޔާވެރިވާކަމަށް ވިދާޅުވެ، އިސްރާއީލަށް ގޮންޖައްސަވާފައެވެ. ނަތަންޔާހޫގެ ސަރުކާރުގެ އަނިޔާވެރިކަން ދުނިޔެއަށް ހާމަކުރުމަށް އުރުދުޣާން އަބަދުވެސް މަސައްކަތް ކުރައްވައެވެ. މިފަހަރުގެ ބަސްފުޅުތަކަކީ ވެސް އެ ސިޔާސަތުގެ ތެރެއިން ނުކުތް ބަސްފުޅުތަކެއް ކަމަށް ބެލެވެއިރު، އެއީ ތުރުކީގެ ފޮރިން ޕޮލިސީގައި ފަލަސްތީނުގެ މައްސަލައަށް ދެވޭ އިސްކަން ދައްކުވައިދޭ ކަމެކެވެ.
