ޓުރަމްޕާ ދެކޮޅު 'ނޯ ކިންގް' އެއްވުންތައް ހަމަނުޖެހުންތަކަށް ބަދަލުވެ، އެމެރިކާ ހަލަބޮލިކަމުގެ ތެރޭގައި
އެމެރިކާގައި ރައީސް ޑޮނަލްޑް ޓުރަމްޕްގެ ސަރުކާރާ ދެކޮޅަށް ފެށުނު "ނޯ ކިންގް" ނުވަތަ "ރަސްކަމެއް ނޫން" ގެ ނަމުގައި ކުރިއަށްދިޔަ ސުލްހަވެރި އެއްވުންތައް، މިހާރު ވަނީ ގައުމީ ހަމަނުޖެހުންތަކަކަށް ބަދަލުވެ، އެމެރިކާގެ އެކި ސިޓީތަކާއި ސްޓޭޓްތައް ހަލަބޮލިކަމުގެ ތެރެއަށް ވެއްޓިފައެވެ. ސުލްހަވެރިކަމާއެކު ފެށުނު މުޒާހަރާތައް ހަމަނުޖެހުމަށް ބަދަލުވީ، ފުލުހުންނާއި އާންމުންގެ މެދުގައި ކުރިމަތިލުންތައް ބޮޑުވެ، ސަރުކާރުގެ ތަންތަނަށް ގެއްލުން ދިނުމާއި، އާންމު ހިމާޔަތަށް ބުރޫއެރުމުންނެވެ. މިހާރުގެ ހާލަތަކީ އެމެރިކާގެ ތާރީހުގައި ފަހުގެ މުއްދަތެއްގައި ދެކެފައިނުވާފަދަ ހަލަބޮލި ހާލަތެކެވެ.
"ނޯ ކިންގް" ހަރަކާތަކީ ރައީސް ޓުރަމްޕްގެ ވެރިކަމުގެ ފިކުރާއި، ގައުމު ހިންގަވާ ގޮތާމެދު އާންމުންގެ ތެރޭގައި އޮތް ނުރުހުން ފާޅުކުރުމަށް ފެށުނު ހަރަކާތެކެވެ. މި ހަރަކާތުގެ ބައިވެރިން ގަބޫލުކުރާ ގޮތުގައި، ޓުރަމްޕްގެ ސިޔާސަތުތަކާއި އަމަލުތަކުން އެމެރިކާގެ ޑިމޮކްރަސީއަށް ބުރޫއަރައި، ގާނޫނު އަސާސީގެ އަސާސްތަކާ ހިލާފު ކަންކަން ކުރެވެމުންދެއެވެ. "ރަސްކަމެއް ނޫން" މި ޝިއާރުން ދައްކައިދެނީ އެމެރިކާގައި ރަސްކަމެއް ނެތްކަމާއި، އެއްވެސް ވެރިއަކު ރަސްކަމެއް ކުރަން ނުޖެހޭނެކަމުގެ ހަރުކަށި ދިފާއެވެ. އެމީހުން ދަނީ ޓުރަމްޕްގެ ވެރިކަމަކީ އެމެރިކާގެ ޑިމޮކްރެޓިކް ނިޒާމަށް ނުރައްކަލެއް ކަމަށް ބުނެ އަޑުއުފުލަމުންނެވެ.
ފެށުނުއިރު ސުލްހަވެރި އެއްވުންތައް، ވަރަށް ކުރު މުއްދަތެއްގެ ތެރޭގައި ހަމަނުޖެހުންތަކަށް ބަދަލުވިއެވެ. މައިގަނޑު ސަބަބުތަކުގެ ތެރޭގައި ފުލުހުންގެ ބާރުގެ ބޭނުންކުރުން އިތުރުވުމާއި، މުޒާހަރާކުރާ ފަރާތްތަކުން ފުލުހުންނަށް ދިމާކުރުން ހިމެނެއެވެ. ވޮޝިންގްޓަން ޑީ.ސީ. އާއި، ނިއުޔޯކް، ލޮސް އެންޖަލިސް، އަދި ޝިކާގޯ ފަދަ ބޮޑެތި ސިޓީތަކުގައި ފުލުހުންނާއި މުޒާހަރާކުރާ ފަރާތްތަކާ ދެމެދު ބޮޑެތި ކުރިމަތިލުންތައް ހިނގާފައިވެއެވެ. ފުލުހުން ވަނީ ކަރުނަ ގޭހާއި ރަބަރު ބަޑި ބޭނުންކޮށް، އެއްވުންތައް ރޫޅާލަން މަސައްކަތްކޮށްފައެވެ.
ހަމަނުޖެހުންތައް އެމެރިކާގެ އެކި ސްޓޭޓްތަކަށް ވަނީ ފެތުރިފައެވެ. ކެލިފޯނިއާ އިން ފެށިގެން ފްލޮރިޑާ އަށް ދެމިގެންދާ މި ހަމަނުޖެހުންތަކުގެ ސަބަބުން ގައުމުގެ އެތެރޭގެ ސަލާމަތަށް ބޮޑު ގޮންޖެހުމެއް ކުރިމަތިވެފައިވެއެވެ. މުޒާހަރާކުރާ ފަރާތްތަކުން ވަނީ ސަރުކާރުގެ މުދަލަށް ބޮޑެތި ގެއްލުންތަކެއް ދީފައެވެ. ފެޑެރަލް އިމާރާތްތަކުގެ ދޮރުތަކާއި ދޮރުފަތްތައް ތަޅާލައި، ސަރުކާރުގެ އުޅަނދުތަކަށް އަލިފާން ރޯކޮށް، މަގުތަކުގައި ފިހާރަތަކާއި އަމިއްލަ ވިޔަފާރިތަކަށް ލޫޓްފަށާފައިވެއެވެ. މިކަމުގެ ސަބަބުން ބިލިޔަން ޑޮލަރުގެ ގެއްލުންވެ، އާންމު ދިރިއުޅުމަށް ބުރޫއަރާފައިވެއެވެ. ބައެއް ސްޓޭޓްތަކުގައި ކާފިއު އިއުލާންކޮށް، ގައުމީ ސަލާމަތީ ބާރުތައް ވަނީ ހަރަކާތްތެރިވާން ފަށާފައެވެ.
މި ހަމަނުޖެހުންތައް ކޮންޓްރޯލްކުރުމަށް އެމެރިކާ ސަރުކާރުން ގިނަ މަސައްކަތްތަކެއް ކުރަމުންދެއެވެ. ގައުމީ ގާޑިއަން ބާރުތައް ހަރަކާތްތެރިކުރުމާއި، ކާފިއު އިއުލާންކުރުމަކީ މިކަމަށްޓަކައި އެޅި ފިޔަވަޅުތަކެވެ. ރައީސް ޓުރަމްޕް ވަނީ މި ހަމަނުޖެހުންތަކުގެ ފަހަތުގައި އޮތީ "ޓެރަރިސްޓް" ގްރޫޕްތަކެއް ކަމަށް ތުހުމަތުކުރައްވައި، ގަދަ ބާރުން ހަމަނުޖެހުންތައް ހުއްޓުވާނެކަމަށް އިއުލާންކުރައްވާފައެވެ. ނަމަވެސް، މުޒާހަރާކުރާ ގިނަ ބަޔަކު ދަނީ މިއީ ޓްރަމްޕްގެ ސިޔާސަތު ތަކާއި އެކު އެމެރިކާ ބަލިކަށިވެ އަދި ދުނިޔޭގެ ކުރިމަތީގައި އެކަހެރިވަމުން ދާދިއުމާއި އަދި އިޒްރޭލް ފަސްޓް މި ޝިޔާާރާއި ދެކޮޅުކަން ދެއްކުމަށް ފެށިގެންއައި ސުލްހަވެރި އިހުތިޖާޖުތަކެއް ކަމަށާއި ނަމަވެސް ޓްރަމްޕްގެ ގޮތްދޫނުކުރުމުން އެހެން މަރުހަލާއަކަށް މިހާރު މުޒާހަރާތައް ދިޔައީ ކަމަށެވެ. އަދި އެފަރާތްތަކުން ބުނަމުން ދަނީ މިހާރުން މިހާރަށް ޓްރަމްޕްގެ ޖާހިލު ވަކިތަކުން އެމެރިކާ މިންޖުވާން ޖެހޭ ކަމަށާއި ނޫންނަމަ ގައުމު އެކީ ފުނޑާލާނެ ކަމުގައެވެ. އަދި ޓްރަމްޕްގެ އިސްތިއުފާއަށްވެސް މުޒާހަރާގެ ބައިވެރިންވަނީ ގޮވާފައެވެ.
