އެމެރިކާގެ ބިލިއަނުން ޚަރަދު: އީރާނުގެ ނިޒާމު ބަދަލުކުރުމުގެ މަސައްކަތް ނާކާމިޔާބު

އީރާނުގެ ސިޔާސީ މައިދާނަށް ބާރުފޯރުވުމަށް އެމެރިކާއިން ކުރަމުންދާ މަސައްކަތްތަކަކީ އެތައް އަހަރުތަކެއްގެ ތާރީޚެއް ހުރި ކަންތައްތަކެކެވެ. އެގޮތުން، އެންމެ އެއް ހަފްތާގެ ތެރޭގައި 6 ބިލިއަން ޑޮލަރަށްވުރެ ގިނަ ފައިސާ ޚަރަދުކޮށްގެންވެސް، އެމެރިކާއަށް ބޭނުންވި މަޤްސަދު ހާސިލުނުވާ ކަމަށް ބައިނަލްއަޤްވާމީ މުޙައްލިލުން ބުނެއެވެ. އެމެރިކާގެ މައިގަނޑު މަޤްސަދަކީ އީރާނުގެ ބާރު ކަނޑުވާލައި، އެ ޤައުމަކީ ބަލިކަށި ބަޔަކަށް ހަދައި، ޚާމަނާއީގެ ވެރިކަން ބަދަލުކޮށް، އެމެރިކާއަށް ބޭނުންވާ ގޮނޑިކޮއްކޮ ސަރުކާރެއް ޤާއިމުކުރުމެވެ.

އެމެރިކާއިން އީރާނާ ދެކޮޅަށް ހިންގާ އޮޕަރޭޝަންތަކުގެ މައިގަނޑު މަޤްސަދުތަކުގެ ތެރޭގައި އީރާނުގެ ނުފޫޒު ދުނިޔޭގެ މައިދާނުން ކަނޑުވާލުން ހިމެނެއެވެ. ޚާއްސަކޮށް މެދުއިރުމަތީގައި އީރާނުގެ އިތުރުވަމުންދާ ބާރާއި ނުފޫޒަކީ އެމެރިކާގެ މަސްލަހަތުތަކަށް އޮތް ބިރެއްގެ ގޮތުގައި އެ ޤައުމުން ދެކެއެވެ. މި މަޤްސަދުތައް ހާސިލުކުރުމަށް އެމެރިކާއިން ވަނީ އެތައް ގޮތަކުން މަސައްކަތްކޮށްފައެވެ. އެއީ އިޤްތިސާދީ ދަތިކުރުމުގެ ފިޔަވަޅުތަކާއި، ސިޔާސީ ގޮތުން އެކަހެރިކުރުމުގެ މަސައްކަތްތަކާއި، އަދި އީރާނުގެ ތެރޭގައި ހަރަކާތްތެރިވާ އިދިކޮޅު ފަރާތްތަކަށް އެހީތެރިކަން ފޯރުވުމާއި، ފޮރުވިގެން ހިންގާ އޮޕަރޭޝަންތައް ހިމެނެއެވެ. މީގެ އިތުރުން މީޑިއާ ބޭނުންކޮށްގެން އީރާނުގެ ސަރުކާރާ ދެކޮޅަށް ޕްރޮޕަގެންޑާ ފެތުރުމުގެ މަސައްކަތްތައްވެސް އެމެރިކާއިން ކުރަމުންދެއެެވެ.

ނަމަވެސް، މި ހުރިހާ މަސައްކަތްތަކާ އެކުވެސް އީރާނުގެ އިސްލާމީ ޖުމްހޫރިއްޔާއަށް އެމެރިކާއަށް ބޭނުންވާ ބަދަލުތައް ގެނެވޭ ގޮތެއް ނުވިއެވެ. ޚާއްސަކޮށް ވެރިކަމުގެ އޮނިގަނޑަށް ބަދަލު ގެނައުމަށް ކުރެވުނު މަސައްކަތްތައް ވަނީ ނާކާމިޔާބުވެފައެވެ. އީރާނުގެ ވެރިކަމަށް އޭގެ ދާޚިލީ މަސައްކަތްތަކުން އަންނަ ބަދަލުތައް މެނުވީ، ބޭރުގެ ބާރަކަށް އެ ޤައުމުގެ ސިޔާސީ ނިޒާމު ހިމެނޭ ގޮތަށް ބަދަލެއް ނުގެނެވޭކަން ވަނީ ސާބިތުވެފައެވެ. ސިޔާސީ ތަހުލީލުކުރާ ފަރާތްތަކުން ބުނާ ގޮތުގައި، ވެރިކަމުގެ އެންމެ މަތީ ފަންތީގައި ތިބި ބޭފުޅުން ނައްތައިލުމުގެ ނުވަތަ ބާރުކަނޑުވާލުމުގެ މަސައްކަތްތައް ހިމެނުނު ނަމަވެސް، އީރާނުގެ ނިޒާމު ވަނީ އޭގެ ދެމިހުރުން ކަށަވަރުކޮށްދީފައެވެ. މިފަދަ ހަމަލާތަކަށްފަހުވެސް، އީރާނުގެ ވެރިކަމަށް އަންނަނީ ދާޚިލީ ސަޕޯޓާއި ޝަރުޢީ ހަމަތަކުގެ މަތިން ވެރިކަން ކުރިއަށް ގެންދާނެ ބޭފުޅުންނެވެ. އެހެންކަމުން، އެމެރިކާއަށް އީރާނުގެ ވެރިކަމުގެ މައްޗަށް އެދެވޭ ގޮތަކަށް ބާރުފޯރުވޭ ގޮތެއް ނުވެއެވެ.

އިޤްތިސާދީ ގޮތުން އީރާނަށް ދަތިކުރުމަށް އެމެރިކާއިން އަޅާފައިވާ ފިޔަވަޅުތަކުގެ ސަބަބުން އެ ޤައުމުގެ އިޤްތިސާދަށް ބޮޑެތި ގޮންޖެހުންތަކެއް ކުރިމަތިވެފައި ވިޔަސް، އީރާނުން ވަނީ މި ހާލަތާ އެއްގޮތަށް ހޭނިފައެވެ. އެގޮތުން، ޗައިނާއާއި ރަޝިޔާ ފަދަ ޤައުމުތަކާ ގުޅިގެން އިޤްތިސާދީ ގުޅުންތައް ބަދަހިކޮށް، އެމެރިކާގެ ދަތިކުރުމުގެ ފިޔަވަޅުތަކުގެ އަސަރު ކުޑަކުރުމަށް މަސައްކަތް ކުރަމުންދެއެވެ. އަދި 6 ބިލިއަން ޑޮލަރަކީ، އީރާނުގެ ދާޚިލީ ހަމަނުޖެހުންތައް އުފައްދައި، ސަރުކާރާ ދެކޮޅަށް މީހުން ނެރުމަށް އެމެރިކާއިން ޚަރަދުކުރި ބޮޑު އަދަދެއްކަމަށް ބައެއް ރިޕޯޓްތައް ބުނެއެވެ. ނަމަވެސް، މިހާ ބޮޑު ޚަރަދެއް ކޮށްގެންވެސް އެމެރިކާއަށް ބޭނުންވާ ނަތީޖާ ނުނެރެވުނުކަން ވަނީ ފާހަގަވެފައެވެ.

އީރާނުގެ ސިޔާސީ ނުފޫޒު މެދުއިރުމަތީގައި ވަނީ ވަރަށް ބޮޑަށް ފުޅާވެފައެވެ. ލުބުނާނާއި ސޫރިޔާ އަދި ޔަމަން ފަދަ ޤައުމުތަކުގައި އީރާނުގެ އެހީތެރިކަމާއެކު ހަރަކާތްތެރިވާ ޖަމާއަތްތަކަކީ، އެމެރިކާއާއި އެ ޤައުމުގެ ސަރަޙައްދީ އެކުވެރިންނަށް ބޮޑު ގޮންޖެހުމެކެވެ. މި ސަރަޙައްދުގައި އީރާނުގެ ބާރު ކަނޑުވާލުމަށް އެމެރިކާއިން ކުރި އެތައް މަސައްކަތެއްވެސް ވަނީ ނާކާމިޔާބުވެފައެވެ. އީރާނުން އޭގެ ސަރަޙައްދީ މަސްލަހަތުތައް ދިފާޢުކުރުމަށްޓަކައި އެކުވެރި ގުޅުންތައް ބަދަހިކުރުމުގެ ސިޔާސަތެއް ގެންގުޅެއެވެ. އަދި ބައިނަލްއަޤްވާމީ މައިދާނުގައި އީރާނު އެކަހެރިކުރުމަށް އެމެރިކާއިން ކުރި މަސައްކަތްތައްވެސް ވަނީ މުޅިން ކާމިޔާބު ނުވެފައެވެ. މިސާލަކަށް، ނިއުކްލިއަރ އެއްބަސްވުމުން އެމެރިކާ ވަކިވުމުންވެސް، އީރާނުން ވަނީ އެހެން ބާރުތަކާ އެކު އެއްބަސްވުމަށް ދެމިހުރުމަށް މަސައްކަތްކޮށްފައެވެ.

މިއަދާ ހަމައަށް އީރާނުގެ މައްޗަށް ބާރުފޯރުވުމަށް އެމެރިކާއިން ކުރި ބިލިއަނުން ޑޮލަރުގެ ޚަރަދުތަކާއި ސިޔާސީ އަދި އިޤްތިސާދީ ގޮންޖެހުންތައް، އެމެރިކާއަށް ބޭނުންވި މަޤްސަދަށް ވާސިލުވުމަށް އެދެވޭ ގޮތަކަށް އެހީތެރިވެދީފައެއް ނުވެއެވެ. އީރާނުގެ އިސްލާމީ ޖުމްހޫރިއްޔާއަކީ ދާޚިލީ ގޮތުން ވަރުގަދަ އަދި ބޭރުގެ ބާރުތަކުގެ ނުފޫޒުން ރައްކާތެރިވާން ދަސްކޮށްފައިވާ ޤައުމެއްކަން މިކަމުން ހާމަވެއެވެ. ކުރިއަށް އޮތް ތަނުގައިވެސް އެމެރިކާއާއި އީރާނާ ދެމެދު އޮތް ނުތަނަވަސްކަން ހައްލުވުމުގެ ބަދަލުގައި އިތުރަށް ގޯސްވެގެންދިއުމުގެ ފުރުސަތު ބޮޑު ކަމަށް ސިޔާސީ ބައެއް މުޙައްލިލުން ލަފާކުރެއެވެ.