ރާއްޖޭގައި މަރުވި އިޓަލީ ޑައިވަރުންގެ ޕޯސްޓްމޯޓަމް: ސަބަބު ހޯދަން ތަހުގީގު ފުޅާކޮށްފި
ރާއްޖޭގައި ޑައިވިންއަށް ގޮސް އުޅެނިކޮށް ހިނގި ހިތާމަވެރި ހާދިސާއެއްގައި މަރުވި އިޓަލީގެ ފަސް ފަތުރުވެރިންގެ ހަށިގަނޑުތަކުގެ އޮޓޯޕްސީ ނުވަތަ ޕޯސްޓްމޯޓަމް ހެދުމުގެ މަސައްކަތް އިޓަލީގައި ފަށައިފިއެވެ. މިހާތަނަށް ބެލި ބެލުމުން މަރުވާން މެދުވެރިވި ސީދާ ސަބަބެއް އަދި ދެނެގަނެވިފައި ނުވާ ކަމަށް އިޓަލީގެ ކަމާބެހޭ ފަރާތްތަކުން ހާމަކޮށްފައިވެއެވެ. މި މަރުތަކުގެ ހަގީގަތް ހޯދުމަށް އިޓަލީގެ ކަމާބެހޭ ފަރާތްތަކުން ވަނީ ފުޅާ ދާއިރާއެއްގައި ތަހުގީގުތައް ފަށާފައެވެ.
ގެއްލުނު ފަތުރުވެރިން ހޯދުމުގެ މަައްކަތުގެ ފޮޓޯ ގެލެރި. ބެއްލެވުމަށް ސްލައިޑް ކޮށްލާ
ޕޯސްޓްމޯޓަމްގެ ތަފްސީލުތައް
މި ތަހުގީގީ މަސައްކަތްތައް އިޓަލީގެ ލޮމްބާޑީ ސަރަހައްދުގެ ވައެރޭސޭގައި ހުންނަ ގަލަރޭޓް ހޮސްޕިޓަލުގައި ފެށިފައިވަނީ އިއްޔެއެވެ. މިހާތަނަށް ކުރެވުނު ތަހުލީލުތަކުން ހަށިގަނޑުގައި އާދަޔާ ހިލާފު އެއްވެސް ކަމެއް ހުރިކަން ފާހަގަކުރެވިފައެއް ނުވެއެވެ. ނަމަވެސް، މަރުގެ ސަބަބާ މެދު ވަކި ގޮތެއް ނިންމޭނީ ހަށިގަނޑުން ނެގިފައިވާ ސުންކުތަކުގެ ޓޮކްސިކޮލޮޖީ އަދި ހިސްޓޮލޮޖިކަލް ތަހުލީލުތަކަށް ފަހުގައި ކަމަށް މެޑިކޯ-ލީގަލް މާހިރުން ވަނީ ވިދާޅުވެފައެވެ. މި ތަހުލީލުތަކުން މަރުގެ އަސްލު ސަބަބު ދެނެގަތުމަށް ބޮޑު އެހީއެއް ލިބިގެންދާނެއެވެ.
މި އޮޕަރޭޝަންތައް ކޯޑިނޭޓް ކުރައްވަނީ ޕަވިއާ ޔުނިވާސިޓީގެ އިންސްޓިޓިއުޓް އޮފް ފޮރެންސިކް މެޑިސިންގެ ފަރާތުން ކަނޑައަޅާފައިވާ ފޮރެންސިކް ސައިންޓިސްޓް ލޫކާ ތަޖާނާއެވެ. އޭނާ ހާމަކުރެއްވި ގޮތުގައި، މިހާތަނަށް އެންމެ ބޮޑަށް ބެލެވެނީ އެ މީހުން މަރުވީ ނޭވާ ހާސްވެ، ގެނބިގެން ކަމެވެ. ނަމަވެސް މިކަން ކަށަވަރު ކުރެވޭނީ އިތުރު ތަހުލީލުތައް ހެދުމަށްފަހުއެވެ.
ހާދިސާ ހިނގިގޮތާއި މަރުވި ފަރާތްތައް
މި ހާދިސާ ހިނގާފައިވަނީ މިމަހު 22 ވަނަ ދުވަހު، ރާއްޖޭގެ ވ. އަތޮޅުގެ ސަރަހައްދުގައި ހުރި ހޮހަޅައަކަށް ޑައިވިންއަށް ދިޔަ ގުރޫޕަކަށެވެ. މި ހިތާމަވެރި ހާދިސާގައި މަރުވެފައިވަނީ ތިރީގައި މިވާ ފަސް ފަތުރުވެރިންނެވެ.
ޖިއަންލޫކާ ބެނެޑެޓީ (44 އަހަރު)
ފެޑެރިކޯ ގުއަލްޓިއޭރީ (30 އަހަރު)
މޮނިކާ މޮންޓެފަލްކޯން (52 އަހަރު - ޔުނިވާސިޓީ އޮފް ޖެނޯއާގެ ޕްރޮފެސަރެއް)
ޖިއޯޖިއާ ސޮމަކާލް (20 އަހަރު - މޮނިކާގެ ދަރިފުޅު)
މުރިއަލް އޮޑެނީނޯ (31 އަހަރު)
މަރުވި ފަރާތްތަކުގެ ތެރެއިން މޮނިކާ މޮންޓެފަލްކޯން، އޭނާގެ ދަރިފުޅު ޖިއޯޖިއާ ސޮމަކާލް، މުރީއެލް އޮޑެނިނޯ އަދި ފެޑެރީކޯ ގުއަލްޓިއަރީގެ ހަށިގަނޑުތައް ހޮހޮޅައިގެ އެންމެ އަޑިން، ތިން ވަނަ ޗެމްބަރުގެ ދޮރުމަތިން ކަހަލަ ގޮތަކަށް ފެނިފައިވެއެވެ. އެމީހުންގެ ހަށިގަނޑުތައް އޮތީ 165 ފޫޓު އަޑީގައެވެ. އެމީހުންގެ ޑައިވިން އިންސްޓްރަކްޓަރު، ޖިއަންލޫކާ ބެނެޑެޓީގެ ހަށިގަނޑު ފެނިފައިވަނީ އެ ޗެމްބަރަށް ވަންނަ ދޮރު ކައިރިންނެވެ. އޭނާގެ ހަށިގަނޑު މީގެކުރިން ވަނީ ފޮނުވާލާފައެވެ.
ތަހުގީގު ކުރިއަށްދާ ގޮތް
ޖިއަންލޫކާ ބެނެޑެޓީ އަދި ފެޑެރިކޯ ގުއަލްޓިއޭރީގެ އޮޓޯޕްސީ އިއްޔެ ނިންމާލާފައިވާއިރު، މޮނިކާ މޮންޓެފަލްކޯން، ޖިއޯޖިއާ ސޮމަކާލް އަދި މުރިއަލް އޮޑެނީނޯގެ އޮޓޯޕްސީ މިއަދުގެ ވަގުތެއްގައި ކުރިއަށްދާނެއެވެ. އިޓަލީގެ ޕްރޮސެކިއުޓަރުން އަންނަނީ މި މައްސަލައިގައި އިތުރު ތަހުގީގުތައް ހިންގަމުންނެވެ. ވަކިން ހާއްސަކޮށް، ޕްރޮފެސަރ މޮނިކާ މޮންޓެފަލްކޯން އާއި އޭނާގެ ޓީމު ރާއްޖެއަށް ކުރި މި ދަތުރަކީ ޔުނިވާސިޓީގެ ރަސްމީ ސައިންޓިފިކް މިޝަނެއްގެ ބައެއްތޯ ނުވަތަ އަމިއްލަ ދަތުރެއްތޯ ބެލުމުގެ މަސައްކަތް ކުރަމުންދެއެވެ. ޔުނިވާސިޓީން ބުނަމުންދަނީ އެއީ ޔުނިވަސިޓީގެ ރަސްމީ މަސައްކަތެއް ނޫން ކަމަށެވެ. ނަމަވެސް އާއިލާތަކުގެ ވަކީލުން ވަނީ އެކަމާ ސުވާލު އުފައްދާފައެވެ. މިކަމުގެ ސަބަބުން މި މައްސަލަ އިތުރަށް ގޯސްވެ، ތަހުގީގުތައް ފުޅާވެގެން ގޮސްފިއެވެ.
މީގެ އިތުރުން، ޑައިވަރުން ބޭނުންކުރި "ގޯ-ޕްރޯ" ކެމެރާތަކުގެ ފުޓޭޖްތައް ދިރާސާކޮށް، އެ މީހުންނަށް އެހާ ފުނުގައި އޮތް ނުރައްކާތެރި ހޮހަޅައަކަށް ވަދެވުނު ސަބަބު ދެނެގަތުމަށް ވެސް އަންނަނީ މަސައްކަތް ކުރަމުންނެވެ. މި ފުޓޭޖްތަކުން ހާދިސާ ހިނގަން މެދުވެރިވި ކަންކަމަށް އަލިއަޅުވާލާނެ ކަމަށް އުންމީދު ކުރެވެއެވެ.
ފޮރެންސިކް މާހިރު ލޫކާ ތަޖާނާގެ ފައިނަލް ރިޕޯޓް ކުރިއަށް އޮތް 90 ދުވަހުގެ ތެރޭގައި ކޯޓަށް ހުށަހަޅާނެ ކަމަށް ރިޕޯޓްތައް ބުނެއެވެ. މި ހާދިސާއާ ގުޅިގެން ރާއްޖޭގެ ކަމާބެހޭ ފަރާތްތަކުން ވެސް ވަނީ މައުލޫމާތު އެއްކޮށް، އިޓަލީގެ ތަހުގީގުތަކަށް އެއްބާރުލުން ދެމުންނެވެ. މި ހާދިސާގެ ފުރިހަމަ ހަގީގަތް ހާމަވުމަށް ދުނިޔޭގެ އެކި ކަންކޮޅުތަކުން އަންނަނީ އިންތިޒާރު ކުރަމުންނެވެ.
