އެމެރިކާގެ އިންޒާރުތަކަށް ބެލުމެއްނެތި އީރާނާއެކު އޮތް އިގްތިސާދީ ގުޅުން ވަރުގަދަކުރުމަށް އޮމާނުން ހާއްސަ ގަރާރެއް ނެރެފި
އީރާނާއެކު އޮންނަ ވިޔަފާރީގެ ގުޅުންތައް ފުޅާކޮށް، އިގްތިސާދީ އެއްބާރުލުން އިތުރަށް ހަރުދަނާކުރުމަށްޓަކައި އޮމާންގެ ސުލްތާން ހައިތަމް ބިން ތާރިގް ހާއްސަ އެގްޒެކެޓިވް ޑިކްރީއެއްގައި ސޮއިކުރައްވައިފިއެވެ. މިއީ ދެ ގައުމުގެ ދެމެދުގައި އޮތް ޒަމާންވީ ގުޅުން އާ ހަރުފަތަކަށް ގެންދިއުމަށް އެޅުނު މުހިންމު ފިޔަވަޅެކެވެ.
މި ގަރާރުގެ ދަށުން އީރާނާއި އޮމާނާ ދެމެދު ކުރެވޭ ވިޔަފާރީގެ މުއާމަލާތްތަކަށް ލުއިފަސޭހަ ގޮތްތަކެއް މަގުފަހިވެގެންދާނެ ކަމަށް ބެލެވެއެވެ. މެދުއިރުމަތީގެ ސިޔާސީ މަޝްރަހަށް ބޮޑެތި ބަދަލުތަކެއް އަންނަމުންދާ މި ދަނޑިވަޅުގައި، އޮމާނުން އިސްކަންދެނީ އީރާނާއެކު އޮތް ޕާޓްނަޝިޕް ދުރުހެލިވުމުގެ ބަދަލުގައި އިތުރަށް ވަރުގަދަކުރުމަށެވެ.
މަސްރަހު ދިރާސާކުރާ ފަރާތްތަކުން ގަބޫލުކުރާ ގޮތުގައި، ގަލްފު ސަރަހައްދުގެ ބާރުގެ ބެލެންސް ގިނަ ބަޔަކު ހީކުރި ވަރަށް ވުރެ ހަލުވި މިނެއްގައި ބަދަލުވަމުންދާކަން މި ނިންމުމުން ހާމަވެއެވެ. އޮމާނަކީ އަބަދުވެސް ސަރަހައްދީ ހަމަޖެހުމަށް މަސައްކަތްކުރާ އަދި ގައުމުތަކުގެ މެދުގައި މެދުވެރިއެއްގެ ދައުރު އަދާކުރާ ގައުމެކެވެ.
އިގްތިސާދީ މާހިރުން ފާހަގަކުރާ ގޮތުގައި މި އެއްބަސްވުމުގެ ސަބަބުން ދެ ގައުމުގެ ދެމެދުގައި އިންވެސްޓްމަންޓްތައް އިތުރުވެ، ހަކަތައާއި ދަތުރުފަތުރުގެ ދާއިރާއިން އާ ފުރުސަތުތަކެއް ހުޅުވިގެންދާނެއެވެ. މިއީ އޮމާންގެ އިގްތިސާދު ސިންދަފާތުކުރުމަށް ކުރާ މަސައްކަތުގެ ތެރެއިން އެޅުނު މުހިންމު ފިޔަވަޅެއްގެ ގޮތުގައިވެސް ސިފަކުރެވެއެވެ.
