އީރާނުން ދިން މިސައިލް ހަމަލާތަކެއްގައި އިޒްރޭލުގެ 7 މުހިންމު އަސްކަރީ މަރުކަޒު ސުންނާފަތިކޮށްލައިފި
އީރާނުން އިޒްރޭލަށް މިސައިލް ހަމަލާތަކެއް ދީ، އެގައުމުގެ މުހިންމު ދެ އެއާބޭސްއާއި ފަސް އަސްކަރީ މަރުކަޒު ގޮއްވާލާފައިވާ ކަމަށް ރިޕޯޓްތައް ބުނެފިއެވެ. މި ހަމަލާތަކަކީ އިސްރާއީލުގެ ދިފާއީ ނިޒާމު ފޫއަޅުވާލައި ދެވުނު، ފަހުގެ ތާރީޚެއްގައި އެގައުމަށް ދެވުނު އެންމެ ވަރުގަދަ އަދި އެންމެ ނުރައްކާތެރި ހަމަލާތަކެއްގެ ގޮތުގައި ވަނީ ފާހަގަކުރެވިފައެވެ.
މި ހަމަލާތަކުގެ ސަބަބުން އިޒްރޭލުގެ އަސްކަރީ ގާބިލުކަމަށް ބޮޑެތި ހުރަސްތަކެއް ކުރިމަތިވެދާނެ ކަމަށް ބެލެވެއެވެ. ހާއްސަކޮށް، ވައިގެ އަސްކަރިއްޔާގެ ދެ މަރުކަޒު (އެއާބޭސް) އެއްކޮށް ސުންނާފަތިވެފައިވާ ކަމަށް ރިޕޯޓްތައް ބުނާއިރު، މިކަމުގެ ސަބަބުން އިޒްރޭލުގެ ވައިގެ ދިފާއީ އަދި ހަމަލާދިނުމުގެ ގާބިލުކަން ވަރަށް ބޮޑަށް ދަށްވެގެންދާނެ ކަމަށް އަސްކަރީ މާހިރުން ލަފާކުރެއެވެ. މީގެ އިތުރުން ގޮއްވާލެވުނު ފަސް އަސްކަރީ ކޭމްޕަކީ އިޒްރޭލުގެ ސިފައިން ތަމްރީނުކުރުމާއި ހަތިޔާރު ރައްކާކުރުން ފަދަ ކަންކަމަށް ބޭނުންކުރަމުން އައި މުހިންމު މަރުކަޒުތަކެއް ކަމަށްވެސް މައުލޫމާތު ލިބެއެވެ.
މި ހަމަލާތަކުގައި އިޒްރޭލުގެ އަސްކަރިއްޔާގެ އިސް ބައެއް ވެރިންނާއި ލީޑަރުން މަރާލެވިފައިވާ ކަމަށްވެސް މައުލޫމާތު ލިބެއެވެ. ނަމަވެސް މަރާލެވުނު މީހުންގެ ތަފްސީލީ މައުލޫމާތެއް އިޒްރޭލުގެ ރަސްމީ އިދާރާތަކުން އަދި ހާމަކޮށްފައެއް ނުވެއެވެ. މިއީ ސަރަހައްދުގެ ހަމަނުޖެހުންތައް އިތުރަށް ގޯސްވެ، ކުރިމަތިލުންތައް ގިނަވެދާނެ ކަމުގެ ނިޝާނެއް ކަމަށް ސިޔާސީ ފަރާތްތަކުން ދެކެއެވެ. ރަސްމީ އެއްވެސް އިދާރާއަކުން މިހާތަނަށް މި ހަމަލާތަކާ ބެހޭގޮތުން އެއްވެސް މައުލޫމާތެއް ހާމަކޮށްފައި ނުވުމުން، ހަބަރުގެ ސައްހަކަން ކަށަވަރުކުރުމަށް ދަތިތަކެއް ކުރިމަތިވެފައިވެއެވެ. ނަމަވެސް ސަރަހައްދުގެ މީޑިއާތަކުން މި ހާދިސާއަށް ބޮޑު ސަމާލުކަމެއް ދީފައިވާއިރު، ބައެއް ރިޕޯޓްތައް ބުނާ ގޮތުގައި މި ހަމަލާތައް ދިނީ އީރާނުން ދުސްތީ މިސައިލް ނިޒާމެއް ބޭނުންކޮށްގެންނެވެ.
މި ހާދިސާއާ ގުޅިގެން މެދުއިރުމަތީގެ ސިޔާސީ މަސްރަހު ނުހަނު ބޮޑަށް ހޫނުވެފައިވެއެވެ. އީރާނާއި އިޒްރޭލު ދެމެދުގައި ގިނަ ދުވަސްތަކެއް ވަންދެން ނުތަނަވަސްކަން އޮތްނަމަވެސް، މިފަދަ ސީދާ އަދި ވަރުގަދަ ހަމަލާއެއް ދިނުމަކީ ކުރިއަށް އޮތްތަނުގައި ހަމަނުޖެހުންތައް އިތުރަށް ގޯސްވެ، އަސްކަރީ ކުރިމަތިލުންތައް ގިނަވެގެންދާނެ ކަމަށް މަސްރަހު ދިރާސާކުރާ ފަރާތްތަކުން ލަފާކުރެއެވެ. ބައިނަލްއަގްވާމީ އެތައް ފަރާތްތަކަކުން މިހާރުވެސް މިކަންކަމަށް ކަންބޮޑުވުން ފާޅުކޮށްފައިވާއިރު، މިކަމުގެ ސަބަބުން ސަރަހައްދުގެ ސަލާމަތާއި ހަމަޖެހުމަށް ބޮޑެތި ނުރައްކާތަކެއް ކުރިމަތިވެދާނެ ކަމަށް ބެލެވެއެވެ.
މި ހަމަލާތަކަކީ އިޒްރޭލުގެ ދިފާއީ ނިޒާމު ފޫއަޅުވާލުމަށްފަހު ދެވުނު ކާމިޔާބު ހަމަލާއަކަށް ވާއިރު، މިކަމުގެ ސަބަބުން އިޒްރޭލުގެ އަސްކަރީ ގާބިލުކަމާ މެދު ސުވާލު އުފެދި، ކުރިއަށް އޮތްތަނުގައި އެގައުމުގެ ދިފާއީ ސްޓްރެޓަޖީތައް ބަދަލުކުރުމަށް މަޖުބޫރުވެދާނެ ކަމަށްވެސް ބައެއް މާހިރުން ދެކެއެވެ. މިކަމުގެ ނަތީޖާއެއްގެ ގޮތުން މެދުއިރުމަތީގައި އޮތް ބާރުގެ ގުޅުންތަކަށް ބަދަލުތަކެއް އަތުވެދާނެ ކަމަށްވެސް ބެލެވެއެވެ.
