އިސްރާއީލުގެ އެއްބަސްވުންތަކާ ޚިލާފުވުމުގެ ރައްދެއްގެ ގޮތުން ހިޒްބުﷲ އިން 41 އަސްކަރީ އޮޕަރޭޝަނެއް ހިންގައިފި

ލުބުނާނުގެ ދެކުނުގެ ސަރަޙައްދުތަކަށާއި، އިސްރާއީލުގެ އުތުރުގެ ސަރަޙައްދުތަކުގައި ހުރި އިސްރާއީލުގެ އަސްކަރީ މަރުކަޒުތަކަށް އަމާޒުކޮށް ހިޒްބުﷲ ޖަމާޢަތުން ވަރުގަދަ ޙަމަލާތަކެއް ދީފިއެވެ. މިދިޔަ ހޯމަ ދުވަހު ދިން މި ޙަމަލާތަކަކީ އިސްރާއީލުން ޙަމަލާ ހުއްޓާލުމުގެ އެއްބަސްވުމާ ތަކުރާރުކޮށް ޚިލާފުވެ، ލުބުނާނުގެ އާންމުންނަށް ދެމުންދާ ޙަމަލާތަކަށް ދިން ވަރުގަދަ ރައްދެއް ކަމަށް އެ ޖަމާޢަތުން ބުނެއެވެ. އެއްދުވަސް ތެރޭގައި ޖުމްލަ 41 އަސްކަރީ އޮޕަރޭޝަނެއް ހިންގާފައިވާ ކަމަށް ހިޒްބުﷲ އިން ހާމަކޮށްފައިވެއެވެ. މި ޙަމަލާތައް އަމާޒުކޮށްފައިވަނީ އިސްރާއީލުގެ ސިފައިން ޖަމާވެފައި ތިބި ތަންތަނަށާއި، "އަޔަން ޑޯމް" ވައިގެ ދިފާޢީ ނިޒާމުތަކުގެ އިތުރުން އުތުރުގެ ވަޒަންވެރިން އުޅޭ ސަރަޙައްދުތަކަށް ކަމަށް ހިޒްބުﷲ އިން ބުނެއެވެ.

ހިޒްބުﷲ އިން ނެރުނު ބަޔާނެއްގައިވާ ގޮތުން، މި ޙަމަލާތަކުގައި ގިނަ އަދަދެއްގެ ރޮކެޓާއި ޑްރޯން ބޭނުންކޮށްފައިވެއެވެ. މި ޙަމަލާތަކުގެ ތެރޭގައި، އުތުރު އިސްރާއީލުގެ ކިރްޔަތު ޝްމޯނާ، މައަލޮޓް-ތަރްޝީހާ އަދި ވައިގެ ދިފާޢީ ކޮންޓްރޯލް ބޭހަކަށް ރޮކެޓް ޙަމަލާތަކެއް ދިނުން ހިމެނެއެވެ. މީގެ އިތުރުން، ގޮވާތަކެތި ހަރުކޮށްފައިވާ ޑްރޯންއެއް ބޭނުންކޮށްގެން "އަޔަން ޑޯމް" މިސައިލް ފޮނުވާ އާލާތަކަށް ސީދާ ޙަމަލާދީފައިވާ ކަމަށް ހިޒްބުﷲ އިން ވަނީ ހާމަކޮށްފައެވެ. މިފަދަ ޙަމަލާއެއް ދިނުމަކީ އިސްރާއީލުގެ ވައިގެ ދިފާޢީ ނިޒާމުގެ ނާޒުކުކަން ހާމަވާ ކަމެއް ކަމަށް ބައެއް ސިފައިންގެ ތަޖުރިބާކާރުން ބުނެއެވެ. މިކަމުގެ ސަބަބުން މި ސަރަޙައްދުގައި ހަނގުރާމަ ބޮޑުވެދާނެ ކަމުގެ ކަންބޮޑުވުންތައް އިތުރުވެފައިވެއެވެ.

އިސްރާއީލުގެ ހަމަލާތަކަށް ދިން ރައްދު

ހިޒްބުﷲ އިން މި ދިން ބޮޑު ހަމަލާތައް ދިނީ އިސްރާއީލުން ލުބުނާނުގެ ސަރަހައްދުތަކަށް ތަކުރާރުކޮށް ދެމުންދާ ހަމަލާތަކަށް ރައްދު ދިނުމުގެ ގޮތުންނެވެ. އިސްރާއީލުން ވަނީ ހަމަލާ ހުއްޓާލުމަށް ކޮށްފައިވާ އެއްބަސްވުންތަކާ ޚިލާފުވެ، ލުބުނާނުގެ އާންމުން ދިރިއުޅޭ ސަރަޙައްދުތަކަށާއި، އަސްކަރީ ނޫން ތަންތަނަށް ހަމަލާ ދީފައެވެ. މި ހަމަލާތަކުގެ ސަބަބުން ލުބުނާނުގެ ގިނަ ބަޔަކަށް ގެއްލުންވެ، ވަޒަންވެރިން ހިޖުރަކުރުމަށް މަޖުބޫރުވެފައިވެއެވެ. ހިޒްބުﷲ އިން ބުނެފައިވާ ގޮތުގައި، އެ ޖަމާޢަތުގެ އޮޕަރޭޝަންތަކަކީ ލުބުނާނުގެ ރައްޔިތުންނާއި އެ ބިމުގެ ދިފާޢުގައި ދެމުންދާ ހަމަލާތަކެކެވެ. އިސްރާއީލުން އެއްބަސްވުންތަކާ ޚިލާފުވާހާ ހިނދަކު ރައްދު ދެމުންދާނެ ކަމަށް އެ ޖަމާޢަތުން ވަނީ ބުނެފައެވެ.

ބޯޑަރު ސަރަޙައްދުގައި ހިނގި ކުރިމަތިލުންތައް

މިދިޔަ ހޯމަ ދުވަހު ދިން ޙަމަލާތަކުގެ ތެރޭގައި ލުބުނާނުގެ ދެކުނު ބޯޑަރު ސަރަޙައްދުގެ އަވަށްތަކަށް ވަދެގަންނަން މަސައްކަތްކުރާ އިސްރާއީލުގެ އިސްތިޢުމާރީ ސިފައިންނާ ދެކޮޅަށް ވަރުގަދަ ކުރިމަތިލުންތަކެއް ވަނީ ހިނގާފައެވެ. ޚާއްޞަކޮށް ދިއްބީން، އަލް-ގަންތަރާ، ޔަހްމޯރު އަލް-ޝަޤީފް އަދި ބިއުފޯޓް ކާސަލް ކައިރީގައި އިސްރާއީލުގެ އަސްކަރީ އުޅަނދުތަކަށާއި ސިފައިންނަށް އަމާޒުކޮށް ކޮޅުފިއްތައިގެން ވަނީ ޙަމަލާދީފައެވެ. މި ސަރަޙައްދުތަކަކީ ދެފަރާތުން ވެސް އަބަދުވެސް ހަމަލާ ބަދަލުކުރާ ނާޒުކު ސަރަޙައްދުތަކެކެވެ. މި ކުރިމަތިލުންތަކުގެ ސަބަބުން ދެފަރާތަށް ވެސް ގެއްލުންތައް ލިބިފައިވާ ކަމަށް ރިޕޯޓުތައް ބުނެއެވެ. މިފަދަ ބިންގަނޑުން ދެވޭ ހަމަލާތަކަކީ އިސްރާއީލުގެ ސިފައިންނަށް ބޮޑު ގޮންޖެހުމަކަށް ވެފައިވާ ކަމަށް ބައެއް ފަރާތްތަކުން ފާހަގަކުރެއެވެ.

ސަރަޙައްދީ ހަމަޖެހުމަށް ކުރިމަތިވެފައިވާ ބިރު

ހިޒްބުﷲ އާއި އިސްރާއީލާ ދެމެދު މިހާރު ހިނގާ ކޯޅުންތަކުގެ ސަބަބުން ސަރަޙައްދީ ހަމަޖެހުން ވަރަށް ބޮޑަށް ގޯސްވެފައިވާ ކަމަށް ބައިނަލްއަޤްވާމީ މުޖުތަމަޢުން ކަންބޮޑުވުން ފާޅުކުރެއެވެ. ޚާއްޞަކޮށް ލުބުނާނުގެ ދެކުނާއި އިސްރާއީލުގެ އުތުރުގެ ބޯޑަރު ސަރަޙައްދުގައި ހަމަލާތައް އާދަޔާ ޚިލާފަށް ގިނަވެ، މި ކޯޅުންތައް ފުޅާވެދާނެ ކަމުގެ ބިރު ވަނީ ބޮޑުވެފައެވެ. އދ އާއި އެހެނިހެން ބައިނަލްއަޤްވާމީ ޖަމާޢަތްތަކުން ވަނީ ދެފަރާތުން ވެސް ހަމަލާތައް ހުއްޓާލުމަށާއި، ހަމަޖެހުމަށް މަސައްކަތްކުރުމަށް ގޮވާލާފައެވެ. ނަމަވެސް، ހިޒްބުﷲ އިން ބުނާ ގޮތުގައި، އިސްރާއީލުން ޙަމަލާ ހުއްޓާލުމުގެ އެއްބަސްވުންތަކާ ޚިލާފުވާހާ ހިނދަކު އެ ޖަމާޢަތުގެ ރައްދު ދިނުންތައް ހުއްޓައެއް ނުލާނެއެވެ. މިކަމުގެ ސަބަބުން މި ސަރަޙައްދުގައި ހަނގުރާމަ އިތުރަށް ގަދަވެދާނެ ކަމުގެ ބިރު ވަނީ އުފެދިފައެވެ.